2 Crónicas
8 Rey Salomonca 20 huatacunapimi Jehová Diospaj huasitapish, paipaj propio huasitapish* shayachirca. 2 Chai qꞌuipaca rey Hiram cushca llajtacunatami Salomonca cutin shayachirca. Chaipimi Salomonca israelitacunata* causachun churarca. 3 Salomonca Hamat-Zobapi caj gentecunahuan macanacunaman rishpami misharca. Chashnami chai llajtata japirca. 4 Ashtahuanpish chaquishca pambapi caj Tadmor llajtatapish, Hamat lugarpi granocunata huaquichina llajtacunatapishmi cutin shayachirca. 5 Shinallataj Bet-Horón Alto llajtata, Bet-Horón Bajo llajtatapishmi shayachirca. Chai llajtacunataca muyundijta pircacunahuan, pungucunahuan, barracunahuanpishmi* shayachirca. 6 Shinallataj Baalat llajtata, Salomonpaj granocunata huaquichina tucui llajtacunata, carretacunata shayachina llajtacunata, caballopi purijcunapaj llajtacunatami shayachirca. Salomonca Jerusalén llajtapi, Líbano llajtapi, pai mandacushca tucui llajtacunapipishmi tucui pai shayachisha nishcata shayachirca.
7 Chai llajtacunapica Israel pueblomanta mana caj huaquin gentecunami causacurcarajcuna. Paicunaca hititacuna, amorreocuna, perizitacuna, heveocuna, jebuseocunami carcacuna. 8 Salomonca chai llajtapi saquirij paicunapaj huahua huahuacunataca sinchi trabajocunata rurachunmi tandachirca. Chai gentecunatami israelitacunaca mana tucuchircacuna. Paicunaca cunancamami chashna trabajancuna. 9 Pero Salomonca israelitacunamantaca ni maijanta paipaj trabajajcuna cachunca mana esclavota rurarcachu. Ashtahuanpish paicunaca paipaj macanacujcuna, paita sirvij soldadocunata pushajcuna, carretacunata manejajcunata pushajcuna, caballocunapi purijcunata pushajcunami carcacuna. 10 Shinallataj rey Salomonca pai ruracushca obrata ricuchunca 250 pushajcunatami charirca. Paicunaca chai obrapi trabajaj gentecunata mandajcunami carca.
11 Salomonca faraonpaj ushushitaca Davidpaj Llajtamanta pai rurashca huasiman huichiyachunmi cacharca. Paica: “Ñuca huarmi cashpapish Israel llajtata mandaj Davidpaj huasipica mana causanachu can. Jehová Diospaj Arca chayashca lugarcunaca jucha illajmi can” nircami.
12 Shinallataj Salomonca Jehová Diosmanmi rupachishca sacrificiocunata Jehová Diospaj altarpi curca. Chai altartaca paillatajmi Diospaj huasiman yaicuna corredor chꞌimba ladopi shayachishca carca. 13 Salomonca cada punlla imata rurana cashca shinami ruraj carca. Shinallataj ofrendacunataca Moisés mandashca shinami sabadocunapaj, llullu lunacunapaj,* huatapi quimsa fiestacunapajpish ruraj carca. Huatapi quimsa fiestacunaca: Levadura illaj tandata micuna fiesta, Semana nishca fiesta, Chuglla huasicunata rurana fiestami* carca. 14 Shinallataj paipaj yaya David mandashca shinallatajmi sacerdotecunataca grupocunapi sirvichun churarca. Levitacunatapish paicunapaj trabajana puestocunapimi churarca. Paicunataca Diosta alabachun, sacerdotecunapaj ñaupajpi punllanta imalla rurana cashcata rurachunmi churarca. Punguta cuidajcunatapish chꞌican chꞌican pungucunapajmi grupopi churarca. Chaitami Diosta sirvij David runaca mandashca carca. 15 Paicunaca sacerdotecunapaj, levitacunapaj rey mandashcamantaca mana caruyarcacunachu. Shinallataj huaquichina cuartocunapajpish imalla mandashcatami rurarcacuna. 16 Chashnami Salomonpaj obraca tucui alli organizado* carca. Cimientocunata churashca punllamanta Jehová Diospaj huasita tucuchingacamami alli organizashca carca. Shinami Jehová Diospaj huasica tucui tucuchishca carca.
17 Shinapish Salomonca mama cucha uripi caj Ezión-Guéber, Elot lugarcunamanmi rirca. Chaica Edom allpapimi carca. 18 Hiramca paita sirvijcunahuanmi barcocunata, barcopi trabajangapaj experienciata charijcunatapish cacharca. Paicunaca Salomonta sirvijcunahuanmi Ofirman rircacuna. Chaimantami 450 talento* orota apamushpa rey Salomonman entregarcacuna.