Jeremías
37 Jehoiaquimpaj churi Coniaspaj* randimi Josiaspaj churi Sedequías mandai callarirca. Babiloniamanta rey Nabucodonosorca* Sedequiastami Judá llajtapi rey cachun churarca. 2 Pero Sedequiaspish, paita catijcunapish, cai llajtamanta gentecunapish profeta Jeremiasman Jehová Dios huillachishca shimicunataca mana cazurcacunachu.
3 Rey Sedequiasca: “Ñucanchij Jehová Diosta ñucanchijmanta mañapai” nichunmi Selemiaspaj churi Jehucaltapish, Maaseyapaj churi sacerdote Sofoniastapish profeta Jeremiaspajman cacharca. 4 Jeremiasca paita manaraj prezupi churashcamantami gentecunapurapi purijlla carca. 5 Faraonpaj soldadocunaca Egiptomantami llujshishca carca. Jerusalén muyundijpi shayacuj caldeocunaca chaita yachaj chayashpami Jerusalenmanta anchurircacuna. 6 Chaimi Jehová Diosca profeta Jeremiasmanca cai shimicunata nirca: 7 “Jehová Dios, israelitacunapaj Diosca caitami nin: ‘Ñucata tapunaman cachaj Judá llajtamanta reymanca caitami nina canguichij: “Ricuichij, cancunata ayudanaman shamucuj faraonpaj soldadocunaca paicunapaj llajta Egiptomanmi tigrangacuna. 8 Caldeocuna tigrashpaca cai llajtahuanmi macanacungacuna. Cai llajtataca mishangacunami, ninahuanmi rupachingacuna” ninguichij. 9 Jehová Diosca caitami nin: “Cancunaca ‘Caldeocunaca ñami ringacuna, ñucanchijtaca ña mana llaquichingacunachu’ nishpa ama umarichijchu. Caldeocunaca mana ringacunachu. 10 Cancunahuan macanacucuj caldeocunapaj tucui soldadocunata cancuna tucuchijpipish paicunapuramanta saquirij chugririshca runacunami paicunapaj carpa huasicunamanta llujshishpa cai llajtataca ninahuan rupachinman”’” nircami.
11 Faraonpaj soldadocuna shamushcamanta caldeo soldadocuna Jerusalenmanta anchurishca qꞌuipami 12 Jeremiasca Jerusalenmanta llujshishpa benjaminitacunapaj allpaman rirca. Paipaj pueblomanta gentecunapurapi paipaj herenciata chasquingapajmi rirca. 13 Pero Benjamín Pungu nishcaman chayajpica guardiacunata mandaj Iriya shuti runami profeta Jeremiasta japirca. Iriyaca Selemiaspaj churi, Hananiaspaj nietomi carca. Paica profeta Jeremiasta japishpaca: “¡Canca caldeocunapaj ladomi tucucungui!” nircami. 14 Chaimi Jeremiasca: “¡Mana, chaica mana ciertochu! Ñucaca caldeocunapaj ladoca mana tucucunichu” nirca. Pero Iriya runaca mana uyarcachu. Ashtahuanpish Jeremiasta japishpami mandajcunapaj ñaupajman pusharca. 15 Mandajcunaca Jeremiashuanmi achcata pꞌiñarircacuna. Paitaca macashpami secretario Jehonatanpaj huasipi prezu churarcacuna. Chai huasitaca carcelta shinami rurashcacuna carca. 16 Jeremiastaca huasi pambata jutcushca ucupimi* ucujman caj cuartocunapi huichcashpa churarcacuna. Chaipimi paica achca punllacunata pasarca.
17 Chai qꞌuipami rey Sedequiasca Jeremiasta pushanaman cachashpa paipaj huasipi* paillata pacalla tapurca. Paica: “¿Jehová Diosca canmanca imata nishcachu?” nircami. Chaimi Jeremiasca: “¡Ari!” nirca. Shinallataj Jeremiasca: “¡Canca Babiloniamanta reypaj maquipimi entregashca cangui!” nircami.
18 Shinallataj Jeremiasca rey Sedequiastaca cashnami nirca: “¿Ñucata carcelpi churachunca cambaj ñaupajpipish, canta sirvijcunapaj ñaupajpipish, cai pueblopaj ñaupajpipish ima juchatataj rurashcaniyari? 19 ¿‘Babiloniamanta reyca cancunahuan macanacungapaj, cai llajtahuan macanacungapajca mana shamungachu’ nishpa huillaj cancunapaj profetacunaca cunanca maipitajyari? 20 Ñuca amito reylla, cunanca ñucata uyapai. Ñuca ima mañashcata rurapai, ama shina caichu. Ñucataca secretario Jehonatanpaj huasimanca ama tigra cachaichu. Chaipica ñucaca huañushamari” nircami. 21 Chaimi rey Sedequiasca Guardiacunapaj Patiopi Jeremiasta huichcashpa churachun mandarca. Paimanca llajtapi tanda tucuringacamami panaderocunapaj ñanmanta apamushpa shuj redondo tandata cujcuna carca. Jeremiasca Guardiacunapaj Patiopimi saquirirca.