Romanos
11 Shinaca caitami tapuni: ¿Diosca paipaj pueblotaca pꞌiñashpachu shitashca? ¡Mana chashnachu! Ñucapish israelitami cani. Abrahanpaj huahua huahuacunamanta, Benjaminpaj familiamantami shamuni. 2 Diosca puntaman pai agllashca pueblotaca mana shitashpa saquircachu. ¿Dios quillcachishcapi Eliasmanta imata nishcataca manachu yachanguichij? Eliasca Diosta mañashpami Israel llajtamanta quejarirca. 3 “Jehová* Dioslla cambaj profetacunatami huañuchishcacuna. Cambaj altarcunatami ñutushpa tucuchishcacuna. Ñucallamari saquirishcani. Cunanca ñucatamari huañuchisha* nincuna” nircami. 4 Shinapish Diosca, ¿imatataj paimanca cutichirca? “Ñuca pueblomantaca Baalta adorangapaj mana cungurijcunaca 7.000 runacuna tiyanrajmi” nircami. 5 Cunan punllacunapipish chashnallatajmi asha agllashca israelitacuna tiyan. Diosca yallitaj llaquij* cashcamantami paicunataca agllarca. 6 Diosca mana paicunapaj ruraicunamantachu agllarca. Ashtahuanpish yallitaj llaquij cashcamantami agllarca. Paicunapaj ruraicunamanta agllashcacuna cashca cashpaca ña mana Dios yallitaj llaquij cashcamanta agllashcacunachu canman.
7 Shinaca ¿imatataj nishun? Israelitacunaca paicuna munashcataca mana tucuicuna japircacunachu. Ashtahuanpish Dios agllashcacunallami japircacuna. Caishujcunaca rumi shungumi tucurcacuna.* 8 Quillcachishcapi nishca shinaca: “Diosmi paicunataca cai punllacama paicunapaj ñahuicuna ama ricuchun, paicunapaj rinrincunapish ama uyachun huañujta dormicujta shina rurashca”. 9 Davidpish cashnami nirca: “Paicuna urmashpa llaquichishca cachunca paicunapaj jatun micuicunaca* lazyana angu shina, shuj trampa shina tucuchun. 10 Paicuna ama ricuchunpish paicunapaj ñahuicunaca amsayachishca cachun. Paicunapaj huashapish huiñaita curcuyachishca cachun” nircami.
11 Ñucaca caitami tapuni: ¿israelitacuna ñitcarishpaca ama cutin jataringapajchu urmarcacuna? ¡Mana chashnachu! Shinapish israelitacuna juchapi urmashcamantami shujtaj llajta gentecunaca quishpirircacuna. Chaimantami israelitacunaca paicunataca envidiarcacuna. 12 Israelitacuna juchapi urmashcamantami shujtaj llajta gentecunaca bendiciashca cashca. Israelitacuna ashalla bendicionta chasquishcamantami shujtaj llajta gentecunaca ashtahuan bendiciashca cashca. ¡Ña tucuicunata tandachijpicarin ashtahuan bendicioncunami tiyanga!
13 Shujtaj llajtamanta gentecuna, cunanca cancunamanca caitami nisha nini. Ñucaca shujtaj llajta gentecunapajman cachashca apóstol cashcamantami Diosta sirvinataca achcata valorani. 14 Ñuca llajta gentecunapish shujtaj llajta gentecunata envidiashpa, maijancunallapish quishpirichun nishpami chashna rurani. 15 Israelitacunata mana chasquishcamantami shujtaj llajta gentecunamanta maijancunaca Dioshuan alli apanacushcacuna. Shinapish israelitacunata cunan Dios chasquijpica paicunata huañuimanta causaiman cutin tigrachij shinami canga. 16 Punta ofrendata shina cungapaj japishca asha masa jucha illaj cajpica tucui masami jucha illaj can. Shinallataj yura sapi jucha illaj cajpica ramacunapish jucha illajmi can.
17 Alli olivo yuramantaca huaquin ramacunaca pꞌitishcami carca. Cutin shujtaj ramacunaca chai yurallapitajmi saquirirca. Shinapish canca sacha olivo yura cashpapish, alli olivo yura ramacuna chaupipimi churashca carcangui. Chaimantami canca alli olivo yura sapi yacucunata chasquicungui. 18 Ashtahuanpish caishuj ramacunata yalli cashcataca ama yuyaichu. Shujtaj ramacunata yalli cashcata yuyashpaca caita yuyari, yura sapitaca mana canchu charicungui. Ashtahuanpish yura sapimi cantaca charicun. 19 Shinapish cancunapuramantaca maijancunaca: “Ñucata churangapajmi caishuj ramacunataca pꞌitirca” ninguichijchari. 20 ¡Chaica chashnatajmi! Feta mana charishcamantami chai ramacunaca pꞌitishca carca. Cutin canca feta charishcamantami chai yurapi catingui. Chaimanta ama jatun tucuichu, chaipaj randica Diosta manchai. 21 Diosca olivo yurapaj quiquin ramacunata pꞌitishpaca, ¿manachu cantapish chashnallataj pꞌitinga? 22 Shinaca Dios llaquij cashcatapish, pꞌiñarij cashcatapish yuyari. Feta mana charishcamantami urmashcacunahuanca pꞌiñarishca can. Shinapish paipaj ñaupajpi alli ricuringapaj, imatapish rurashpa catijpica Diosca cantaca llaquingami. Mana chashna rurajpica cantapish yuramanta pꞌitingami. 23 Diosca cutinllatajmi ramacunataca yurapi churai tucun. Chaimantami israelitacuna feta charishcata ricuchi callarijpica cutinllataj chai yurapi churanga. 24 Canca sacha olivo yuramanta pꞌitishcami carcangui. Chashna cashpapish tarpushca olivo yurapimi churashca carcangui. ¡Olivo yuramanta pꞌitishca quiquin ramacunata cutin churanacarin jahuallami canga!
25 Huauquicuna, cancuna tucuita yachaj cashcata ama yuyachunmi Diosca pi mana yachai tucushcataca pacalla charicushca. Caita yachachunmi munani: Israel llajtamanta huaquin gentecunaca mana uyashun nincunachu. Shujtaj llajta gentecunamanta Dios agllashcacunata tucui tandachingacamami chashna canga. 26 Chashnami tucui Israel llajtaca quishpiringa. Dios quillcachishcapi nishca shinaca: “Sionmantami quishpichijca shamunga. Paica Jacobpaj huahua huahuacunapaj millai ruraicunatami anchuchinga. 27 Paicunapaj juchacunata perdonashpami paicunahuanca ari ninacusha” nircami. 28 Cierto, israelitacunamanta maijancunaca alli huillaicunata mana uyashcamantami Diospaj contra cancuna. Chaica cancunapaj allipajmi cashca. Shinapish paicunatami Diosca agllarca. Paicunataca paicunapaj ñaupa yayacunamantami Diosca cꞌuyan. 29 Diosca pai cushca regalocunamantaca mana arrepintiringachu. Shinallataj pai cayashca gentecunamantapish mana arrepintiringachu. 30 Cancunaca ñaupaca Diosta mana cazujcunami carcanguichij. Ashtahuanpish cunanca israelitacuna mana cazushcamantami Diosca cancunata llaquishca. 31 Cunanca israelitacunami mana cazujcuna can. Chaimi Diosca cancunamanca pai llaquij cashcata ricuchishca. Shinapish Diosca cancunata llaquishca shinallatajmi israelitacunamanpish llaquij cashcata ricuchi tucun. 32 Diosca tucui gentecunata llaquishcata ricuchingapajmi mana cazushcamanta tucuicunata prezupi shina saquishca.
33 ¡Diospaj bendicioncunaca yallitaj jatunmari! ¡Paica tucui imatapish yachajmi, paipaj alli yachaipish yallitaj jatunmari! ¿Pai ima shina juzgajtaca pitaj tucuita intindi tucungari? ¿Pai imata rurashcatapish pitaj tucuita yachai tucungari? 34 Dios quillcachishcapica “¿pitaj Jehová* Diospaj yuyaitaca yachaj chayashcari? ¿Pitaj paitaca imata rurana cashcata ni tucushcari?” ninmi. 35 Shinallataj “¿Dios pagachunca pitaj puntapica paiman imata cushcari?” ninmi. 36 Tucui ima tiyashcapish Diosmantami shamun, paimantami tiyan, paipajllatajmi can. Paica huiñaipaj jatunyachishca cachun. Chashna cachun.*