Apocalipsis
10 Jahua pachamanta pꞌuyuhuan churarishca* achca poderta charij shujtaj ángel uriyamucujtami ricurcani. Paipaj umapica shuj cuichitami charirca. Paipaj ñahuica inti shinami carca. Paipaj chaquicunapish* nina lunyacuj sinchi pilarcuna shinami carca. 2 Paipaj maquipica shuj uchilla pascashca rollotami charirca. Alli lado chaquitaca mama cucha yacu jahuapimi churarca. Cutin lluqui lado chaquitaca allpa jahuapimi churarca. 3 Paica shuj león huacaricuj shinami sinchita caparirca. Pai caparijpimi canchis cꞌulun nishcacuna parlashca uyarirca.
4 Canchis cꞌulun nishcacuna parlajpica paicuna ima nishcatami ñalla quillcagrircani. Shinapish jahua pachamanta shuj rimashcami: “Canchis cꞌulun nishcacuna ima nishcataca pacalla huaquichi,* ama quillcaichu” nirca. 5 Mama cucha jahuapi, allpa jahuapi shayacujta ricushca angelca paipaj alli lado maquitami jahua pachaman alzarca. 6 Chashna alzashpami huiñai huiñaita causaj Diosmanta jurarca. Diosmi jahua pachatapish, chaipi ima tiyajtapish, allpatapish, chaipi ima tiyajtapish, mama cuchatapish, chaipi ima tiyajtapish rurarca. Chai angelca cashnami nirca: “Diosca mana uniyangachu. 7 Ashtahuanpish séptimo ángel paipaj trompetata ñalla tocagrij punllacunapimi Dios pacalla charicushca alli huillaicunaca pajtaringa. Chai huillaicunataca paita sirvij profetacunamanmi Diosca huillarca” nirca.
8 Jahua pachamanta rimashca ñucahuan cutin parlajtami uyarcani. Paica: “Mama cucha jahuapi, allpa jahuapi shayacuj ángel paipaj maquipi charicuj pascashca rollota japinaman ri” nircami. 9 Ñucaca ángel maipi cashcaman rishpami uchilla rollota cuchun mañarcani. Chaimi paica: “Rollota japi, micui. Cambaj huijsapica jayajmi tucunga. Shinapish cambaj shimipica miel shina mishquimi canga” nirca. 10 Chaimi angelpaj maquimanta uchilla rollota japishpa micurcani. Ñuca shimipica miel shinami mishqui carca. Shinapish micushca qꞌuipaca ñuca huijsapica jayajmi tucurca. 11 Shinallataj chai rimashcaca: “Pueblocunamanta, llajtacunamanta, rimaicunamanta, achca mandajcunamantapishmi cutin huillana cangui” nircami.