Hechos
3 Diosta mañana horas cajpimi casi las tres de la tardeta Pedropish, Juanpish Diospaj huasiman huichiyacurcacuna. 2 Chaipimi huacharishcamantapacha purinata mana valij runata, Diospaj huasi* Sumaj nishca pungu cꞌuchullapi aparishpa churacurcacuna. Diospaj huasiman yaicujcunata caridadta mañachunmi chai runataca cada punlla chaipi churajcuna carca. 3 Chai runaca Pedropish, Juanpish Diospaj huasiman yaicugrijta ricushpami paicunata caridadta mañai callarirca. 4 Chaimi Pedropish, Juanpish chai runata ricurashpa saquirircacuna. Chashna ricurashpami Pedroca: “Ñucanchijta ricui” nirca. 5 Chaimi chai runaca imallatapish cungachari yuyashpa paicunata ricushpa saquirirca. 6 Ashtahuanpish Pedroca: “Canman cungapajca cullquitapish, orotapish mana charinichu. Shinapish ñuca imalla charishcatami cuni. ¡Nazareno nishca Jesucristopaj shutipi jatarishpa puri!” nircami. 7 Chashna nishpaca paipaj alli lado maquimanta japishpami jatarichirca. Shina jatarichijpimi chai runapaj chaquicunapish, chaqui mucucunapish chai rato sinchiyarca. 8 Chaimi saltashpa, shayarishpa puri callarirca. Chaimantaca paicunahuanmi Diospaj huasiman purishpa, saltashpa, Diosta alabashpa yaicurca. 9 Tucuicunami pai puricujta, Diosta alabacujtapish ricurcacuna. 10 Shina ricushpami Diospaj huasi Sumaj Pungu nishcapi caridadta mañashpa tiyaj runa cashcata cuentata curcacuna. Paicunaca chai runa puricujta ricushpami achcata mancharircacuna.
11 Salomón nishca Corredorpimi chai runaca Pedropi, Juanpi charirashpa shayacurca. Chashna chariracujpirajmi gentecunaca achcata mancharinacushpa paicuna maipi cashcaman callpashpa rircacuna. 12 Chaita ricushpami Pedroca cashna nirca: “Israel llajta runacunalla, ¿imamantataj achcata mancharishca canguichij? ¿Imamantataj ñucanchijta ricuracunguichij? ¿Ñucanchij podermanta, Diosta tucui shunguhuan adoracushcallamanta cai runata purichishcatachu yuyacunguichij? 13 Ñucanchij ñaupa yayacunapaj Dios, Abrahanpaj, Isaacpaj, Jacobpaj Diosmi paita Sirvijta jatunyachirca. Paica Jesusmi. Paitami cancunaca Pilatopaj maquipi entregarcanguichij. Pilato paita cacharichisha nijpipish cancunaca pꞌiñarcanguichijmi. 14 Ashtahuanpish shuj huañuchij runata cacharichichun mañashpami jucha illaj, cashcata ruraj runataca pꞌiñarcanguichij. 15 Cancunaca causaita cuchun agllashca Punta Pushajtami huañuchircanguichij. Shinapish Diosca huañushcacunapaj chaupimantami paitaca causachirca. Ñucanchijca chaita ricushcata huillajcunami canchij. 16 Jesuspaj shutimanta, ñucanchijpish paipaj shutipi feta churashcamantami cancuna ricucushca, cancuna rijsishca runapaj chaquicunaca sinchiyashca. Ari, Jesuspaj shutipi ñucanchij feta churashcamantami cai runaca tucui cancunapaj ñaupajpi alliyashca. 17 Cunanca huauquicuna cancunapish mana yachashcamanta, cancunata mandajcuna shinallataj rurashcataca yachanimi. 18 Ashtahuanpish Cristo llaquita apana cashcatami Diosca tucui profetacunaman huillachirca. Chai huillashcatami Diosca pajtachishca.
19 Chaimanta arrepintirichij, cancunapaj mana alli ruraicunamanta tigrarichij. Chashna rurajpimi Jehová* Diosca paillataj cancunapaj juchacunata perdonanga,* sumaj causaitapish cancunapaj apamunga. 20 Paimi cancunapaj nombrashca Cristota cachanga, paica Jesusmi. 21 Jesusca ñaupa punllacunapi causaj jucha illaj profetacunaman Dios huillashca shinami tucuita mushujyachina tiempocuna chayangacama jahua pachapi shuyana can. 22 Moisespish cashnami nirca: ‘Jehová* Diosca cancunapaj huauquicunamantami ñuca shina shuj profetata agllashpa cancunapajman cachanga. Paitami uyana canguichij, tucui pai imalla nishcatapish ruranami canguichij. 23 Ashtahuanpish chai profetata mana uyasha nijtaca* Diosmi tucuchinga’ nirca. 24 Profeta Samuelmanta callarishpaca tucui profetacunami cai punllacunamantaca huillarcacuna. 25 Chai profetacunami cancunapaj ñaupa yayacunahuan Dios ari ninacushcata parlarcacuna. Chai ari ninacushcaca cancunapajpishmi can. Diosca Abrahanmanmi: ‘Cambaj huahua huahuacunamantami* tucui cai allpa pachapi causaj familiacunaca bendiciashca canga’ nirca. 26 Diosca paita Sirvijta nombrashca qꞌuipami cancunata bendiciachun puntapica cacharca. Cancuna mana allita rurashcamanta arrepintirichunmi cada unota ayudangapaj chashna cacharca” nircami.