2 Crónicas
24 Jehoasca canchis huatacunata charishpami rey tucurca. Paica 40 huatacunatami Jerusalenpica mandarca. Paipaj mamaca Beer-Sebamanta Zibíah shuti huarmimi carca. 2 Sacerdote Jehoiadadpaj punllacunapica Jehoasca Jehová Diospaj ñaupajpimi allicunata rurarca. 3 Sacerdote Jehoiadaca rey Jehoasmanca ishqui huarmicunatami mashcashpa curca. Jehoasca churicunapaj, ushushicunapaj yayami tucurca.
4 Tiempo qꞌuipaca Jehoasca paipaj shungupimi Jehová Diospaj huasita allichinata munarca. 5 Chaimi sacerdotecunata, levitacunata tandachishpaca: “Cada huata ñucanchij Diospaj huasita allichingapaj Judá llajtapi tiyaj llajtacunaman llujshishpa tucui israelitacunapaj cullquita tandaichij, chaitaca rato ruraichij” nirca. Pero levitacunaca chaitaca mana utca rurarcacunachu. 6 Chaimi reyca sacerdotecunata mandaj Jehoiadata cayashpaca cashna nirca: “¿Jehová Diosta sirvij Moisés mandashca shina Judamanta, Jerusalenmanta levitacuna Diospajlla chꞌicanyachishca impuestocunataca imamantataj mana apamuchun nishcangui? ¿Tandanacushca israelitacuna Diospajlla chꞌicanyachishca impuestocunataca imamantataj Leyta huaquichina arcata churashca carpa huasipajca mana apamuchun nishcangui? 7 Chai millai huarmi Ataliapaj churicunaca a la fuerzami Diospaj huasiman yaicurcacuna. Chashnami paicunaca Jehová Diospaj huasimanta Diospajlla chꞌicanyachishca cosascunataca Baal dioscunata adorangapaj utilizarcacuna” nircami. 8 Chaimi rey mandashca shina shuj cajata rurarcacuna. Chashna rurashpami chai cajataca Jehová Diospaj huasi pungu ñaupajpi churarcacuna. 9 Chai qꞌuipaca tucui Judapi, Jerusalenpi Jehová Diospajlla chꞌicanyachishca impuestocunata apamuna cashcatami huillarcacuna. Chaitaca Diosta sirvij Moisesmi chaquishca pambapi israelitacunaman mandashca carca. 10 Chaita uyashpami tucui chaipi cajcunapish, pushajcunapish cushicurcacuna. Paicuna cullquita apamushpami chai cajapica jundangacama* churajcuna carca.
11 Levitacuna chai cajapi achca cullqui tiyajta ricushpaca chai cajata reyman entregangapajmi apamujcuna carca. Chashna apamujpimi reypaj secretariopish, sacerdotecunata mandajpaj ayudajpish shamushpa chai cajamanta cullquita llujshichijcuna carca. Chashnami chai cajataca chai lugarllapitaj cutin churajcuna carca. Chaitaca tucui punllacunami chashna rurajcuna carca. Shina rurashpami achca cullquita tandarcacuna. 12 Reypish, Jehoiadapish Jehová Diospaj huasipi trabajocunata ima shina rurarishcata ricujcunamanmi chai cullquitaca cujcuna carca. Cutin paicunaca Jehová Diospaj huasita allichichunmi rumicunata pꞌaquishpa trabajajcunata, artesanocunata contratajcuna carca. Shinallataj Jehová Diospaj huasita allichingapajmi fierrohuan, cobrehuan trabajajcunatapish contratajcuna carca. 13 Chai trabajota ricujcuna trabajota callarichijpimi Diospaj huasita allichishpa ñaupajman catircacuna. Chashnami Diospaj huasitaca allichishpa ñaupa tiempopi cashca shinallataj sinchita shayachircacuna. 14 Diospaj huasita tucui tucuchishca huashaca chai sobrashca cullquitaca reymanpish, Jehoiadamanpishmi curcacuna. Paicunaca chai sobrashca cullquihuanca Jehová Diospaj huasipajmi cai shujtaj cosascunata rurarcacuna: Diosta adorangapaj cosascunata, ofrendacunata cungapaj cosascunata, copacunatami rurarcacuna. Shinallataj oromanta, cullquimanta shujtaj cosascunatapishmi rurarcacuna. Jehoiadá causacujpica tucui tiempomi Jehová Diospaj huasipi cada punlla rupachishca sacrificiocunata cujcuna carca.
15 Jehoiadaca achca huatacunata alli causashpami huañurca. Paica 130 huatacunata charishpami huañurca. 16 Paitaca Davidpaj Llajtapi, reycunapaj ladopimi pambarcacuna. Jehoiadaca Israel llajtapica Diospajpish, paipaj huasipajpishmi allicunata rurashca carca.
17 Jehoiadá huañushca qꞌuipaca Judamanta mandajcunaca reypaj ñaupajman shamushpami cungurircacuna. Chaimi reyca paicunata uyarca. 18 Paicunaca paicunapaj ñaupa yayacunapaj Jehová Diospaj huasita saquishpami adorana postecunata, rurashcalla dioscunata sirvi callarircacuna. Chashna juchata rurashcamantami Diosca Judá llajtahuanpish, Jerusalén llajtahuanpish yallitaj pꞌiñarirca. 19 Jehová Diosca paipajman tigramuchunca profetacunata cachanataca manataj saquircachu. Profetacunaca paicunahuan ima tucunatami huillaj carcacuna. Shinapish paicunaca mana uyasha nircacunachu.
20 Diosca paipaj jucha illaj espiritutami sacerdote Jehoiadapaj churi Zacariasman curca. Chaipimi paica chaipi cajcunamanta ashtahuan alto jahuaman shayarishpa: “Diosca: ‘¿Jehová Diospaj mandashcacunataca imamantataj mana cazunguichij? ¡Chashna rurashpaca imata mana chasquinguichijchu! Cancunaca Jehová Diostami saquishcanguichij. Chaimi Diospish cancunataca saquinga’ ninmi” nirca. 21 Shinapish paicunaca Zacariaspaj contra imata ruranatami yuyarircacuna. Chashnami rey mandajpi paitaca Jehová Diospaj huasi patiopi huañungacama rumicunahuan shitarcacuna. 22 Rey Jehoasca Jehoiadá mana tucurij cꞌuyaita paiman ricuchishcataca mana yuyarircachu. Ashtahuanpish Jehoiadapaj churi Zacariastami huañuchirca. Zacarías huañucushpaca: “Jehová Dios can imalla rurashcacunamanta castigachun” nircami.
23 Huata callaripica Siriamanta caj soldadocunaca Jehoashuan macanacungapajmi llujshircacuna. Chashnami Judá llajtatapish, Jerusalén llajtatapish llaquichinaman yaicurcacuna. Qꞌuipamanca chai llajtapi tiyaj tucui pushajcunatami huañuchircacuna. Ashtahuanpish paicunaca chai llajtamanta quichushca cosascunataca Damasco llajtamanta reymanmi cacharcacuna. 24 Paicunapaj ñaupaj yayacunapaj Jehová Diosta saquishcamantami Jehová Diosca Judapi caj soldadocuna achcacuna cajpipish Siria llajtamanta asha soldadocunapaj maquipi churarca. Chashnami Diosca Jehoasta castigasha nishcataca Siriocunahuan pajtachirca. 25 Siriocuna chaimanta rishpaca Jehoastaca llaquinaitami chugrichishpa* saquircacuna. Sacerdote Jehoiadapaj churicunata* huañuchishcamantami Jehoaspaj sirvijcunaca paipaj contra jatarircacuna. Jehoastaca paipaj camapimi huañuchircacuna. Chashna huañujpimi Davidpaj Llajtapi paitaca pambarcacuna. Pero reycunata pambanapica mana pambarcacunachu.
26 Caicunami Jehoaspaj contra jatarircacuna: Ammonmanta Simeatpaj churi Zabad, Moabmanta Simritpaj churi Jehozabadmi carca. 27 Jehoaspaj churicunamanta, paipaj contra achca cosascunata nishcacunamanta, Diospaj huasita ima shina allichishcamantaca Reycunapaj Libropimi registrashca tiyacun. Paipaj churi Amasiasmi catij rey tucurca.