1 Corintios
10 Cunanca huauquicuna caita yuyarichij, ñucanchij ñaupa yayacunaca tucuicunami pꞌuyu llandu ucuta purircacuna. Shinallataj tucuicunami mama cuchata pasarcacuna. 2 Paicunaca pꞌuyu llandu ucuta rishpa, mama cuchatapish pasashpami tucuicuna Moisesta catijcuna shina bautizarircacuna. 3 Tucuicunami Dios cushca micunallatataj micurcacuna. 4 Shinallataj tucuicunami Dios cushca yacullatataj ubyarcacuna. Paicunata caticuj rumimantami paicunaca yacuta ubyarcacuna. Chai rumitaca Diosmi curca. Chai rumica Cristotami ricuchirca. 5 Shinapish paicunamanta achcacunaca Diostaca mana cushichircacunachu. Chaimantami chaquishca pambapi huañurcacuna.
6 Ñucanchijpish paicuna shinallataj millaita ruranata ama munangapajmi chaicunamanta yachai tucunchij. 7 Rurashcalla dioscunatapish ama adorashunchijchu. Paicunamanta maijancunaca chaitami rurarcacuna. Dios quillcachishcapi paicunamanta parlashpaca: “Gentecunaca micungapaj, ubyangapajmi tiyarircacuna. Chai qꞌuipaca cushicungapajmi jatarircacuna” ninmi. 8 Paicunamanta maijancuna shina ama huainayajcuna* cashunchijchu. Paicunaca huainayashcamantami* shuj punllallapi 23.000 runacuna huañurca. 9 Shinallataj Jehová* Diostapish ama yangamanta pꞌiñachishunchijchu. Maijancunaca chashna pꞌiñachishcamantami culebracuna canijpi huañurcacuna. 10 Ama quejarishunchijchu. Paicunamanta maijancunataca quejarishcamantami Diospaj angelca huañuchirca. 11 Paicuna chashna tucushcaca ñucanchijta yuyachingapajmi chashna tucurca. Cai tucuri punllacunapi ñucanchijpish paicuna shina ama tucungapajmi chashna quillcashca cashca.
12 Chaimanta maijanpish allimi shayacuni yuyajca ama urmangapaj cuidarichun. 13 Cancunapish tucui gentecuna charishca llaquicunallatatajmi* charinguichij. Shinapish Diosca pai nishcata pajtachij cashcamantami, cancuna apai tucunalla llaquicunata apachun saquinga. Cancunata ima llaquicuna japijpipish Diosllatajmi llaquicunata ahuantashpa catichun ayudanga.
14 Chaimanta ñuca cꞌuyashca huauquicuna, rurashcalla dioscunata adoranamanta caruyaichij. 15 Cancunamanca alli yachaj runacunaman shinami rimacuni. Ñuca nishcacuna alli cashcata o mana alli cashcataca cancunallataj ricuichij. 16 Diosta pagui nishca copa vinoca Cristopaj yahuartami ricuchin ¿nachu? Chaupishca tandapish Cristopaj cuerpotami ricuchin ¿nachu? 17 Shujlla tandami tiyan. Chai tandallamanta tucuicuna micushcamantami achcacuna cashpapish shujlla cuerpo canchij.
18 Israel llajtata yuyarichij. Altarpi rurashca sacrificiocunata micucushpaca, ¿manachu paicunaca Dioshuan micucushca shina carca? 19 Shinashpaca ¿caihuanca imatataj nisha nicuni? ¿Rurashcalla diosman cushca sacrificioca ima canchu? ¿Rurashcalla diospish ima canchu? 20 Mana ima canchu. Ashtahuanpish caitami nisha nini. Rurashcalla dioscunata adorajcunaca sacrificiocunata rurashpaca mana Diosmanchu cun, ashtahuanpish demoniocunamanmi* cun. Chaimantami cancunataca demoniocunahuan ama tandanacuchun nini. 21 Cancunaca Jehová* Diospaj copamantapish, demoniocunapaj copamantapish mana ubyai tucunguichijchu. Shinallataj “Jehová* Diospaj mesamantapish”, demoniocunapaj mesamantapish mana micui tucunguichijchu. 22 Chaita rurashpaca, ¿‘Jehová* Diostachu pꞌiñachisha nicunchij’? Ñucanchijca paita yalli sinchica mana canchijchu ¿nachu?
23 Tucuitami rurai tucunchij, shinapish mana tucuichu alli. Tucuitami rurai tucunchij, shinapish mana tucuichu sinchiyachin. 24 Chaimanta quiquinlla alli canata mashcanapaj randica, shujtajcunapaj allita mashcashpa catichij.
25 Mercadopi cꞌatushca aichataca imata mana tapushpa micuichijlla. Chashnami cancunapaj concienciapica alli sintiringuichij. 26 Quillcachishcapica: “Allpapish, allpapi ima tiyashcapish Jehová* Diospajmi” ninmi. 27 Jesusta mana catij runa cancunata invitajpica cancuna risha nishpaca ringuichijlla. Cancunapaj concienciapi alli sintiringapajca imata carajpipish mana tapushpa micunguichijlla. 28 Shinapish cancunaman maijanpish “Cai aichataca rurashcalla dioscunamanmi sacrificiota shina curca” nijpica ama micunguichijchu. Chashnami huillaj runatapish mana pandachinguichij. Ni maijanpaj concienciatapish mana llaquichinguichij. 29 Mana cambaj concienciamantachu parlacuni. Ashtahuanpish caishuj runapaj concienciamantami parlacuni. Ñucaca imata rurangapaj agllai tucushpapish shujtajcunapaj conciencia ñucata ama juchachichunmi chaitaca mana rurani. 30 Chai micunata micushpa, chai micunamanta Diosta mañashpapish, ¿shujtajcuna ñucata juchachichunca chaitaca ruranachu cani?
31 Chaimanta micucushpapish, ubyacushpapish, ima shujtaj ruraicunata ruracushpapish Diosta jatunyachingapaj tucuita ruraichij. 32 Judiocunatapish, griegocunatapish, Diospaj congregaciontapish ama ñitcachishpa llaquichichijchu. 33 Ñucalla alli canataca mana mashcanichu, ashtahuanpish shujtajcuna alli cachunmi mashcani. Dios paicunata quishpichichunmi tucui gentecunata cushichingapaj tucuita rurani.