1 Corintios
4 Ñucanchijtaca Cristota sirvijcuna cashcata, Dios pacalla charicushcacunata cuidaj mayordomocuna cashcata tucui gentecuna ricuchunmi munanchij. 2 Shuj amoca paipaj mayordomo paiman mingashcata alli pajtachichunmi munan. 3 Ñucata cancuna juzgajpipish, juezcuna juzgajpipish ima mana canchu. Ñucallatajpish mana juzgari tucunichu. 4 Ñuca yuyaipica ima mana allita rurashcataca mana yuyarinichu. Shina nishpaca cashcata rurajmi cani mana nicunichu. Ñucata juzgajca Jehová* Diosmi. 5 Chashna cashcamanta manaraj tiempo chayajpica pitapish ama juzgaichijchu. Ashtahuanpish Amito Jesús shamungacama shuyaichij. Paimi amsapi pacalla tiyacujcunataca luzman llujshichinga. Shinallataj gentecunapaj shungupi ima tiyashcatapishmi ricuchinga. Chaipimi cada uno imata rurashcamanta Diosca jatunyachinga.
6 Huauquicuna cancunapaj allipajmi ñucamantapish, Apolosmantapish parlashcani. Cancunapish: “Quillcachishcapi nishcallata ruraichij” nishca shimicunata catichunmi chashna parlashcani. Chashna rurashpaca mana jatun tucunguichijchu. Shinallataj shujtaca alli nishpa, caishujtaca mana alli nishpa mana rimanguichijchu. 7 ¿Canca shujtajcunata yalli cashcata cringapajca imatataj charinguiyari? ¿Manachu Dios tucuita canmanca cushca? Pai tucuita cushca cajpica, ¿ima nishpataj cambaj fuerzamanta tucuita charishca shina jatun tucunguiyari?
8 ¿Ñachu tucui cancuna munashcata charinguichij? ¿Ñachu charijcuna canguichij? ¿Ñachu cancunalla mandai callarircanguichij? Cancuna ña mandai callarishca cajpica allichari canman. Chashna cajpica ñucanchijpishmi cancunahuan ña mandacunchijman. 9 Diosca apostolcunataca huañuchishca cachunmi tucuicuna ricuchun ultimopi churashca yuyachin. Chaimantami ñucanchijca cai pachapaj, angelcunapaj, gentecunapajpish ricuna tucushcanchij. 10 Ñucanchijca Cristomantami yuyai illaj shina canchij. Ashtahuanpish cancunaca Cristomantami alli yuyaiyuj canguichij. Ñucanchijca irquillami canchij. Ashtahuanpish cancunaca sinchimi canguichij. Cancunataca jatunyachincunami. Ashtahuanpish ñucanchijtaca pꞌiñancunami. 11 Caicamaca yaricaihuan, yacunaihuanmi catinchij. Churana illaj,* macashca, maipi causanatapish mana charinchijchu. 12 Ñucanchij maquihuanmi sinchita trabajanchij. Cꞌamijpipish bendicianchijmi. Catirashpa llaquichijpipish pacienciahuanmi ahuantanchij. 13 Ñucanchijta yanga juchachishpa rimajpipish mana pꞌiñarishpami cutichinchij.* Cunancamami gentecunapajca cai pacha basura shina, millanana mapa shina canchij.
14 Cancunata pingaipi churangapajca caicunataca mana quillcacunichu. Ashtahuanpish ñuca cꞌuyashca huahuacunata shina aconsejangapajmi quillcacuni. 15 Cristota ima shina catinata yachachijcunataca 10.000 yachachijcunatami charinguichij. Shinapish mana achca yayacunata charinguichijchu. Cristo Jesushuan shuj shinalla cashcamantami ñucaca alli huillaicunata yachachishpa cancunapaj yaya tucushcani. 16 Shinaca ñuca ejemplota catichunmi cancunataca animani. 17 Chaimantami Timoteota cancunapajman cachani. Paica ñuca cꞌuyashca churi shinami. Amito Jesustapish tucui shunguhuanmi sirvicun. Paimi Cristo Jesusta sirvingapaj ñuca imata ruracujta yuyachinga. Caitaca ñucapish tucui ladocunapimi cada congregacionpi yachachicuni.
18 Cancunapuramanta maijancunaca visitanaman mana shamungachu yuyashpami jatun tucuncuna. 19 Jehová* Diospaj munai cajpica ñallami cancunata visitanaman risha. Chai jatun tucushcacuna ima shina parlajtaca mana ricusha ninichu. Ashtahuanpish Diospaj poderta paicuna charishcata o mana charishcatami ricusha nini. 20 Diospaj Gobiernota cazushcataca mana ñucanchij parlashca shimicunallahuanchu ricuchinchij, ashtahuanpish ruraicunahuanmi ricuchinchij. Chaicunami Diospaj poderta ñucanchij charishcata ricuchin. 21 ¿Imatataj munanguichij? ¿Cancunapajman rishpaca shuj varahuan richunchu munanguichij? Mana cashpaca ¿cꞌuyaihuan, llaquij shunguhuan richunchu munanguichij?