Nombrashca Huauquicuna Timoteopaj Ejemplota Catichij

PASAJ huataca achca huaranga huauquicunatami ancianocuna y siervo ministerialcuna cachun nombrarcacuna. Quiquinpish chai nombramientotachari chasquircangui. Chaimantami cushilla sintiringui.

Shinapish asha manchaitachari charingui. Jason shuti shuj joven ancianoca: “Chai nombramientota cujpica achca trabajota rurana cashcamantami mana pudishachu nishpa yuyarcani” ninmi. Moisespish Jeremiaspish Jehová Dios mingashcata pajtachinataca mana pudinatami yuyarcacuna (Éxodo 4:10; Jeremías 1:6). ¿Quiquinpish chashna sintirishcanguichu? Pero, ¿ama chashna sintirishpa ñaupajman catingapajca imatataj rurana cangui? Timoteopaj causaimanta yachashun (Hechos 16:1-3).

TIMOTEOPAJ ALLI EJEMPLOTA CATICHIJ

Timoteo casi 20 huatacunata charijpimi apóstol Pabloca paihuan huillashpa purichun invitarca. Chaimi Timoteoca ñucaca shujtajcunaman yachachingapaj, consejocunata cungapajca jovenrajmi cani, mana pudishachu nishpa yuyashca canga (1 Timoteo 4:11, 12; 2 Timoteo 1:1, 2, 7). Pero 10 huatacuna qꞌuipaca Pabloca Filipos llajtapi caj huauqui panicunamanca: ‘Mandaj Jesús munajpica, Timoteotaca utcami cancunapajman cachasha nicuni’. Shinallataj pai shina ayudana munaita charijtaca, pi shujtajta mana charinichu nircami (Filipenses 2:19, 20).

¿Imamantataj Timoteoca ancianocunapaj shuj alli ejemplo can? Sujta yuyaicunata ricushun.

1. Shujtajcunamantami preocuparij carca. Pabloca Filipos llajtapi caj huauqui panicunamanca Timoteo shina ‘cancunamanta sustarijca pi mana tiyanchu’ nircami (Filipenses 2:20). Chaica ciertomi carca. Timoteoca huauqui panicuna Diospajman cꞌuchuyachunmi munarca. Paicunata ayudangapaj imata rurana cajpipish chaitami rurasha nirca.

Huauqui Williamca 20 huatacuna yallitami anciano shina sirvin. Paica shuj nombramientota chasquijcunataca: “Congregacionpi tucuita alli charinallapica ama yuyaichu. Huauqui panicunaman cꞌuyaita ricuchi. Paicuna imata minishtishcapi yuyai” nishpami consejota cun. Caipi yuyashun. Shuj busta manejaj runaca pasajerocunata pushashpa rinapaj randica terminalman puntual chayanallatami sustarin. Canpish ima mingashcata pajtachinallapi yuyashpaca chai runa shinami cangui.

2. Diosta sirvinatami punta lugarpi churarca. Pabloca, “tucuicunami paicunapaj allipajlla mashcancuna, Cristo Jesuspajca mana yuyancunachu”, pero Timoteoca mana paicuna shinachu can nircami (Filipenses 2:21). Filipos llajtapi caj huauqui panicuna Diosta ashtahuan sirvinapaj randi, paicunapaj munashcata ruranapi yuyajcuna cashcatami Pabloca ricurca. Pero Timoteoca mana chashnachu carca. Diosta ashtahuan sirvina oportunidad ricurijpica Isaías shinami: “Caipimi cani, ñucata cachahuai” nirca (Isaías 6:8).

Congregacionpi ima mingashcacunata, shujtaj ruraicunatapish ¿ima shinataj alli pajtachi tucungui? Pabloca ima ashtahuan importante cashcatami yachana canguichij nircami (Filipenses 1:10). Diospaj munaitarajmi pajtachishpa causana cangui. Huaquin ruraicunaca achca tiempo, fuerzastami quichun. Chai ruraicunatami saquina cangui. Pabloca Timoteotaca: “Qꞌuipa huiñaicunapaj millai munaita ruranamanta anchuri. Cashcata ruranata, alli crinata, cꞌuyaj canata, sumajta causanata catirai” nircami (2 Timoteo 2:22).

3. Jehová Diosta sirvingapajmi sinchita trabajarca. Pabloca Timoteomanta parlashpaca: “Pai alli cashcataca ñami yachanguichij. Yayandij churindij shinami, alli huillaipica sirvircanchij” nircami (Filipenses 2:22). Timoteoca mana qꞌuillachu carca. Paica Pablohuanmi tandalla, sinchita trabajarca. Chaimi alli amigocuna tucurca.

Diospaj organizacionpica achca trabajomi tiyan. Chaipi trabajashpaca cushillami sintiringui. Huauqui panicunahuanpish allimi apanacungui. Chaimanta, Diospajta ruranapi ocupado cai (1 Corintios 15:58, NM).

4. Imata yachashcatami pajtachirca. Pabloca Timoteotaca: ‘Canca ñuca yachachishcata catij, ñuca causashca shina causaj, ñuca yuyashca shinallataj yuyaj, ñuca shinallataj crij, ñuca shinallataj chaipitaj catiraj, ñuca shinallataj cꞌuyaj, ñuca shinallataj mana pꞌiñarijmi cangui’ nircami (2 Timoteo 3:10). Timoteoca ima yachashcataca pajtachijmi carca. Chaimantami paimanca shujtaj ruraicunata mingarca (1 Corintios 4:17).

Consejocunata cuchunca achca experienciata charij shuj ancianota mashcai. Achca huatacunata anciano shina sirvij Tom shuti huauquica: “Achca experienciata charij shuj ancianoca ñucamantami preocuparij carca. Alli yachachijpishmi carca. Casi siempremi paitaca ñucaman consejota cuhuai nishpa mañaj carcani. Pai ima nishcata pajtachishpaca seguromi sintirij carcani” ninmi.

5. Diosmanta yachashpami catirca. Pabloca “Taita Diospajta alli rurana yuyaillapi catirangui” nishpami Timoteotaca animarca (1 Timoteo 4:7). Shuj callpaj runaca shuj entrenadortami charin. Shinapish callpajca paillatajmi practicana can. Pabloca Timoteotaca: ‘Taita Diospaj Shimita rezashpa uyachingui. Yuyachishpa rimangui, yachachingui. Chaicunata rurana yuyailla catirangui. Chashna cajpimi, can rurashcacunaca tucuicuna ricunalla canga’ nircami (1 Timoteo 4:13-15).

Canpish Diospajtaca ashtahuan alli rurashpami cati tucungui. Chaipajca Diospaj Shimita alli yachashpa cati. Diospaj organizacionpi mushuj mandashcacunatapish alli yachashpa pajtachinata ama saquingui. Ama canllapi shunguta churanguichu. Imata allichina cajpica: “Ñucaca achca experienciatami charini, ima informacionta mashcanataca mana tanto minishtinichu” nishpaca ama yuyangui. Ashtahuanpish Timoteo shina canllataj alli yuyaihuan cangui. Imata yachachicushcatapish alli yuyaringui (1 Timoteo 4:16).

6. Jehová Diospaj espíritu ayudanapimi shunguta churarca. Diospaj Shimita yachachinamanta parlashpami Pabloca Timoteotaca: ‘Dios mingashcata alli yachachinataca ñucanchijpi causacuj jucha illaj espirituhuan alli cuidangui’ nircami (2 Timoteo 1:14). Alli yachachinata cuidangapaj o tucui shunguhuan alli yachachishpa catingapajca Timoteoca Diospaj espíritu santo ayudanapimi shunguta churana carca.

Donald shuti huauquica achca huatacunatami anciano shina sirvin. Paica: “Anciano o siervo ministerial huauquicunaca, Diospaj ñaupajpi alli ricurina importante cashcatami yuyarina canguichij. Chaita rurashpallami sinchi canguichij. Jehová Diosta espíritu santota mañashpa, cꞌuyaj, llaquij cashpaca shujtaj huauqui panicunapajca shuj bendicionmi canguichij” ninmi (Salmo 84:7; 1 Pedro 4:11).

IMA MINGASHCATA TUCUI SHUNGUHUAN PAJTACHICHIJ

Achca huauquicunatami canta shinallataj anciano o siervo ministerial cachun cunanlla nombrashcacuna. Cancuna Diosta ashtahuan alli sirvingapaj esforzaricujta ricushpami cushilla sintirinchij. Ñajaman parlashca Jason shuti huauquica: “Achca huatacunata anciano shina Diosta sirvicushcamantaca achcatami yachashcani. Cunanca imata rurangapajpish seguromi sintirini. Anciano shina sirvina ñucapaj shuj privilegio cashcamantami cushilla pajtachini” ninmi.

¿Quiquinca Diosta ashtahuan alli sirvingapaj esforzarishpa catinguichu? Timoteopaj ejemplota cati. Chaita rurashpallami huauqui panicunapajca shuj bendición cangui.