Lucas

6 Jesusca shuj sábado punllapimi paita catijcunandij trigo tarpushca chagrata pasacurca. Chaipimi paita catijcunaca trigo granota cꞌutsashpa, maquihuan cꞌacushpa micucurcacuna. 2 Chaita ricushpami huaquin fariseocunaca:* “¿Imamantataj sábado punllapi mana rurana cashcata ruracunguichijyari?” nircacuna. 3 Chashna nijpimi Jesusca paicunamanca cashna cutichirca: “¿Davidpish, paihuan caj runacunapish yaricaihuan cashpa imata rurashcataca manachu nunca liyishcanguichij? 4 Paica Diospaj huasiman yaicushpami Diosman cushca tandata* chasquishpa, paihuan cajcunamanpish carashpa micurca. Chai tandataca ni pi mana micunachu carca, sacerdotecunallami micuna carca” nircami. 5 Chashna nishca qꞌuipami Jesusca: “Runapaj Churica sábado punllata Mandajmari” nirca.

6 Shujtaj sábado punllami Jesusca sinagogaman* yaicushpa yachachi callarirca. Chaipica alli lado maqui chaquirishca* shuj runami carca. 7 Sábado punllapi Jesús jambijpi, paita juchachingapajmi mandashcacunata quillcajcunapish, fariseocunapish ricuracurcacuna. 8 Jesusca paicuna imata yuyacushcata yachashpami maqui chaquirishca* runataca: “Jatari, cai chaupipi shayari” nirca. Chashna nijpimi chai runaca jatarishpa chaipi shayarirca. 9 Chashna nishca huashami Jesusca: “¿Sábado punllapica imata ruranataj alli canga? ¿Allita rurana o mana allita rurana? ¿Shuj runata* salvana o huañuchina?” nishpa tapurca. 10 Chashna nishpaca, chaipi cajcunata muyundijta ricushpami, chai runataca: “Cambaj maquita chutai” nirca. Chashna chutajpica chai runapaj maquica alliyarcallami. 11 Chaita ricushpami paicunaca yallitaj pꞌiñarishpa, Jesusta imata ruranata paicunapura parlanacurcacuna.

12 Shuj punllaca Jesusca Diosta mañangapajmi urcuman rirca. Chaipimi tucui tuta Diosta mañarca. 13 Ña punllayajpica paita catijcunata cayaj cachashpami, paicunapuramantaca 12 runacunata agllarca. Paicunatami apostolcuna nishpa shutichirca. 14 Paicunapaj shuticunaca caicunami carca: Simón (Jesusca paitami Pedro nishpapish shutichirca), Simonpaj huauqui Andrés, Santiago, Juan, Felipe, Bartolomé, 15 Mateo, Tomás, Alfeopaj churi Santiago, Simón (paitami Cushicuihuan ruraj nijcuna carca), 16 Santiagopaj churi Judas, Judas Iscariotepish (paimi qꞌuipaca contracunaman Jesusta entregarca).

17 Jesusca paipaj apostolcunandij urcumanta uriyamushpaca shuj llano pambapimi saquirircacuna. Chai pambapica paita achca catijcunapish, Judeamanta, Jerusalenmanta, mama cucha cꞌuchullapi saquirij Tiro, Sidón ladocunamantapishmi achca gentecuna tandanacushca carca. Paicunaca Jesús yachachishcata uyangapaj, ungüicunamanta alliyachishca cangapajpishmi shamushcacuna carca. 18 Millai espiritucuna llaquichishca cajcunapishmi alliyachishca carca. 19 Gentecunaca Jesusmanta poder llujshijpimi paicunapaj ungüimanta alliyarcacuna. Chaimantami tucuicuna Jesuspica tuparishun nircacuna.

20 Jesusca paita catijcunata ricushpami cashna ni callarirca:

“Pobrecunaca cushicuichij, Jahua pacha Gobiernoca cancunapajmi canga.

21 Yaricaihuan cajcunaca cushicuichij, mana nijtami micunguichij.

Cunan huacajcunaca cushicuichij, qꞌuipamanca asinguichijmi.

22 Runapaj Churita caticushcamanta gentecuna pꞌiñajpi, paicunapuramanta llujshichishpa cachajpi, cꞌamijpi, mana allicunata nishpa cancunapaj shutita mapayachijpipish cushicuichij. 23 Chashna llaquichijpica cushicuichij. Achcata cushicuichij. ¡Ricuichij! Cancunaca jahua pachapimi jatun bendicioncunata chasquinguichij. Paicunapaj ñaupa yayacunapish chashnallatajmi profetacunataca llaquichircacuna.

24 ¡Aij achcata charijcunalla, cancunaca ñami cushichishca canguichij!

25 ¡Aij cunan punllapi mana nijta micujcunalla, qꞌuipataca yaricaihuanmi canguichij!

¡Aij cunan punllapi asijcunalla, qꞌuipataca achcata llaquirishpami huacanguichij!

26 ¡Aij tucuicuna alli nishcacunalla, cancunapaj ñaupa yayacunapish chashnallatajmi llulla profetacunataca alli nijcuna carca!

27 Shinapish caipi uyacujcunataca cashnami nini: cancunata pꞌiñajcunata cꞌuyaichij, cancunata millajcunapajpish allita ruraichij, 28 cancunata llaqui tucushca cachun nijcunatapish bendiciaichij, cꞌamijcunamantapish Diosta mañaichij. 29 Shuj lado quijadospi maijanpish huajtajpica, caishuj lado quijadostapish ricuchilla. Shinallataj cambaj jahua churanata quichujpica, ucu churanatapish cuilla. 30 Maijanpish canta imata mañajpica, mañashcataca cuilla. Shinallataj canta imata quichujpica, tigrachichun ama mañaichu.

31 Ashtahuanpish shujtajcuna cancunapaj imatami rurachun munanguichij, cancunapish paicunapajca chashnallataj ruraichij.

32 Cancunata cꞌuyajcunallata cꞌuyashpaca, ¿ima allitataj ruranguichijyari? Juchayujcunapish paicunata cꞌuyajcunataca cꞌuyancunami. 33 Cancunata ayudajcunallata ayudashpaca, ¿ima allitataj ruranguichijyari? Juchayujcunapish chashnallatajmi rurancuna. 34 Imatapish tigra japina yuyaillahuan mañachishpaca,* ¿ima allitataj ruranguichijyari? Juchayujcunapish japina yuyaillahuanmi imatapish paicunapuraca mañachincuna. 35 Chaimanta cancunata pꞌiñajcunata cꞌuyaichij, paicunapaj allicunata ruraichij. Imatapish japinaraicullaca ama mañachichijchu. Chashna rurashpami jatun bendicioncunata chasquinguichij. Ashtahuancarin jahua pacha Diospaj huahuacunami canguichij. Paica mana pagui nijcunatapish, millaicunatapish llaquijmi. 36 Cancunapaj Yayaca llaquijmari, cancunapish pai shinallataj llaquijcuna caichij.

37 Ashtahuanpish Dios cancunata ama juzgachunca, cancunapish shujtajcunata ama juzgaichijchu. Dios cancunata ama juchachichunca, shujtajcunata ama juchachichijchu. Shujtajcunata perdonashpa catichij, Diospish cancunataca perdonangami. 38 Shujtajcunaman cushpa catichij, paicunapish cancunamanca cungami. Cancunapaj millcanapica jundachishpa, cutin cutin llapishpa, tushuchishpa, jicharicujtami paicunaca marcachinga. Imahuanmi shujtajcunata midinguichij, chashnallatajmi midishca canguichij” nircami.

39 Jesusca cai chꞌimbapuraitapishmi churarca: “Shuj mana ricuj runaca, shujtaj mana ricuj runataca mana pushai tucunchu ¿nachu? Chashna rurashpaca, ¿manachu ishquindij shuj jutcupi urmangacuna? 40 Yachacujca* paita yachachijta yallica mana canchu. Shinapish alli yachachishca cashpaca, paita yachachij shinallatajmi tucunga. 41 Chaimanta cambaj huauquipaj ñahuipi ujsha tiyacushcata ricunapaj randica, ¿ima nishpataj cambaj ñahuipi jatun caspi tiyacujtaca mana ricungui? 42 Cambaj ñahuipi jatun caspi tiyacujta mana ricushpaca, ¿ima shinataj cambaj huauquitaca, ‘Huauqui, shamui cambaj ñahuimanta ujshata llujshichisha ninguiyari’? ¡Mishqui shimi jayaj shungu! Cambaj ñahuimantaraj jatun caspita anchuchiyari, chashnami cambaj huauquipaj ñahuimanta ujshata ima shina anchuchinataca alli ricungui.

43 Alli yuraca mana alli granotaca mana pꞌucunchu. Cutin mana alli yuraca alli granotaca mana pꞌucunchu. 44 Ima shina granujta ricushpami alli yura o mana alli yura cashcaca yacharin. Gentecunaca casha yuramantaca higocunataca mana tandanchu. Zarza yuramantapish* uvacunataca mana tandanchu. 45 Alli runaca paipaj shungupi alli yuyaicunata charishcamantami allicunata riman. Cutin millai runaca paipaj shungupi mana alli yuyaicunata charishcamantami mana allicunata riman. Shimica shungupi ima tiyashcatami riman.

46 Shinashpaca ¿imamantataj ñuca nishcata manapish rurashpa ñucataca ‘¡Amito! ¡Amito!’ ninguichijyari? 47 Maijanpish ñucapajman shamushpa, ñuca nishcata uyashpa pajtachijtaca ima shina runa cashcatami ricuchigrini. 48 Paica ucujta allashpa rumi jahuapi huasita shayachij runa shinami. Chaimantami yallitaj tamyajpi jatun yacu jatarishpa huasita sinchita huajtajpipish, alli shayachishca cashcamanta chai huasica mana cuyurirca. 49 Cutin ñuca nishcata uyashpa mana pajtachijca, ucujta mana allashpa ñutu allpa jahuallapi huasita shayachij runa shinami. Chaimantami jatun yacu sinchita huajtajpica chai huasi urmashpaca tucui chingarirca”.