Romanos
15 Shinapish ñucanchijca crishcapi sinchi cashcamantami, crishcapi manaraj sinchi cajcunapaj ruraicunata ahuantashpa catina canchij. Shinallataj mana ñucanchij munashcallatachu rurana canchij. 2 Ashtahuanpish cada unomi shujtajcunata sinchiyachingapajca paicunapaj allita rurana canchij. 3 Cristopish imata rurashpaca paillataj cushicungapajca mana rurarcachu. Quillcachishcapi nishca shinami pajtarirca. Chaipica: “Canta pꞌiñashpa cꞌamishca shimicunallahuantajmi ñucatapish pꞌiñashpa cꞌamishcacuna” ninmi. 4 Ñaupa quillcachishcacunapi quillcashca shimicunaca ñucanchijta yachachingapaj quillcachishcami can. Ñucanchijca Quillcachishcapi nishca shimicuna cushichishcamanta, ahuantachun ayudashcamantami shamuj punllacunapi Dios cusha nishcacunata shuyacunchij. 5 Diosmi ahuantangapaj, cushilla cangapajpish ayudan. Chaimantami Cristo Jesús yuyashca shina cancunapish yuyachun Diosta mañacuni. 6 Chashna cashpami cancunaca shuj shinalla, cancunapaj shimihuan Diosta jatunyachinguichij. Paica ñucanchij Amito Jesucristopaj Yayami.
7 Cristo cancunata alli chasquishca shinallataj cancunapish caishuj chaishuj alli chasquinacuichij. Chashnami Diosta jatunyachinguichij. 8 Ñucaca caita yachachunmi munani. Cristoca circuncisionta rurachishcacunatami sirvirca. Chashnami paica Dios mana llulla cashcatapish, paicunapaj ñaupa yayacunaman Dios cusha nishcacunapish mana llulla cashcata ricuchirca. 9 Shujtaj llajta gentecunapish llaquij Diosta jatunyachichunmi chashna sirvirca. Dios quillcachishcapi nishca shinaca: “Chaimantami shujtaj llajta gentecunapaj ñaupajpi canta alabasha. Cambaj shutitapish jatunyachishpami cantasha” ninmi. 10 Dios quillcachishcapica caitapishmi nin: “Tucui llajta gentecuna Diospaj llajtahuan cushicuichij” ninmi. 11 Shinallataj Dios quillcachishcapica cutinllatajmi: “Tucui llajta gentecuna Jehová* Diosta alabaichij. Tucui gentecuna paita alabaichij” nin. 12 Isaiaspish: “Tucui llajtacunata mandanaman shamujca Jesepaj sapimantami shamunga. Paipi yuyaita churashpami tucui llajta gentecunapish shuyangacuna” ninmi. 13 Shuyana yuyaita cuj Diosca paipi confiashcamanta cushicuitapish, sumaj causaitapish cancunaman cuchun. Chashnami cancunaca espíritu santo poderta cujpi tucui shunguhuan shuyashpa catinguichij.
14 Ñuca huauquicunalla, cancunaca achcata llaquijcuna, alli yachajcuna, caishuj chaishuj aconsejajcuna* cashcatami ñucaca alli yachani. 15 Ashtahuanpish huaquin yuyaicunata cancunaman yuyachingapajmi achijta quillcani. Dios yallitaj llaquij* cashcata ñucaman ricuchishcamantami caicunataca yuyachicuni. 16 Ñucaca Diospaj alli huillaicunata shujtaj llajta gentecunaman huillangapaj cachashca Cristo Jesusta sirvijmi cani. Chai gentecunata Dios chasquichunmi cai jucha illaj obrataca pajtachicuni. Espíritu santo jucha illajta rurashcamantami paicunaca Diospaj ñaupajpica jucha illaj ofrenda shina cancuna.
17 Shinaca Cristo Jesusta catij cashcamanta, Dios rurachun nishcatapish ruracushcamantami achcata cushicuni. 18 Ñucalla imata rurashcataca mana parlagrinichu. Ashtahuanpish shujtaj llajta gentecuna Cristota cazuchunmi ñucaman pai imata rurachishcallata parlagrini. Caitaca ñuca nishcacunahuan, ñuca rurashcacunahuanmi rurachirca. 19 Shinallataj Diospaj espiritupaj poderhuanmi jatun milagrocunata, mancharina ruraicunatapish rurachirca. Chaimantami Jerusalén llajtamanta callarishpaca Ilírico llajtacama Cristomanta alli huillaicunataca tucui ladocunapi huillashcani. 20 Shinapish shujtaj runa huillai callarishcapi ama huillangapajmi, Cristopaj shutita ña rijsishca ladocunapica alli huillaicunataca mana huillasha nircani. 21 Quillcachishcapi nishca shinaca: “Paimanta ima huillashcata mana chasquijcunami paitaca ricungacuna. Paimanta mana uyajcunami intindingacuna” ninmi.
22 Chaimantami cancunapajman tauca cutin risha nishpapish manataj ri pudishcani. 23 Shinapish cai llajtacunapica tucui ladocunapimi ña huillashcani. Shinallataj achca huatacuna* huashamantami cancunata ricunaman rinata munacushcani. 24 Chaimantami Españaman ricushpaca, cancunataraj ricushpa risha nini. Asha tiempota cancunahuan sumajta pasashca qꞌuipaca Españaman rina ñanta ñucahuan ashacama richunmi munani. 25 Shinapish cunanca huauquicunata* ayudangapajmi Jerusalenman rigrini. 26 Macedoniamanta, Acayamanta huauquicunaca Jerusalenpi causaj huajcha huauquicunata* ayudangapajmi cushicushpa paicuna imalla charishcacunata cushca. 27 Cai huauquicunaca Jerusalenpi causaj huauquicunahuan dibi shina cashcamantami cushicushpa ayudarcacuna. Jerusalenmanta huauquicunaca Diosmanta chasquishca allicunatami shujtaj llajta gentecunaman cushcacuna carca. Chaimantami paicunaca imalla charishcacunahuan Jerusalenpi causaj huauquicunataca ayudanataj carcacuna. 28 Ashtahuanpish cunanca huauquicuna imalla cushcacunatami Jerusalenpi causaj huauquicunaman saquinaman rigrini. Chai huashami Españaman ricushpa cancunata visitashpa pasasha. 29 Cancunata visitanaman rishpaca Cristomanta achca bendicioncunatami apasha.
30 Huauquicuna, ñucanchijca Amito Jesucristopimi crinchij. Shinallataj Diospaj espiritupaj podermantami caishuj chaishuj cꞌuyanacunchij. Chaimantami ñuca mañashca shinallataj cancunapish ñucamanta tucui shunguhuan Diosta mañashpa catichun rogapani. 31 Judea llajtapi Jesusta mana catijcunamanta ñucata quishpichichun Diosta mañapaichij. Shinallataj Jerusalenpi causaj huauquicuna* ñuca apacushca ayudata cushicushpa chasquichun Diosta mañapaichij. 32 Chashnami Diospaj munai cajpica cushicuihuan cancunata visitanaman risha. Chaipimi caishujmanta chaishujmanta animarinacushun. 33 Sumaj causaita cuj Dios cancunahuan cachun. Chashna cachun.*