Santiago

5 Charij runacuna caita uyaichij. Cancunata llaquicuna japigrishcamanta huacaichij, llaquirichij. 2 Cancuna imalla charishcacunapish ismushcami. Shinallataj cancunapaj churanatapish polilla cꞌurucunami micushca. 3 Cancunapaj oropish, cancunapaj cullquipish oxidarishcami.* Chai oxidomi cancunapaj contra huillanga, cancunapaj aichatapish micunga. Cancuna tandachishca imalla charishcacunaca tucuri punllacunapica nina shinami canga. 4 Ricuichij, cancunapaj chagracunapi cosechashpa trabajajcunaca mana pagashcamantami caparishpa caticuncuna. Chai trabajajcuna ayudachun nishpa caparishcatami jahua pacha soldadocunata mandaj Jehová* Diosca uyashca. 5 Cai pachapica imalla charishcacunahuanmi cushicushpa alli causarcanguichij. Shinallataj aicha munaicunata rurashpami causarcanguichij. Huañuchina punllapaj shuj animalta huirayachij shinami cancunapaj shungutapish huirayachishcanguichij. 6 Cancunaca cashcata rurajtami juchachishcanguichij, huañuchishcanguichij. ¿Manachu paica cancunapaj contra tucun?

7 Chaimanta huauquicuna, Amito Jesús tigramuna punllacunacama* pacienciata charichij. Ricuichij, tarpuj runaca allpapi sumaj grano pꞌucuchunca punta tamya, qꞌuipa tamya chayamungacamami pacienciahuan shuyashpa catin. 8 Cancunapish pacienciata charichij. Amito Jesús tigramuna punllacuna* ña quichquiyamucushcamanta cancunapaj shunguta sinchiyachichij.

9 Huauquicuna, cancunata ama juzgachunca caishujmanta chaishujmanta ama quejarinacuichijchu. Ricuichij, Juezca ñami pungullapi can. 10 Huauquicuna, Jehová* Diospaj shutipi huillaj profetacuna shina caichij. Paicunaca tucui laya llaquicunatami ahuantarcacuna. Pacienciata charishcatapishmi ricuchircacuna. 11 Ricuichij, ñucanchijca ahuantajcunamanta parlashpaca paicunaca “cushillami* can” ninchijmi. Cancunaca Job ima shina ahuantashcataca uyashcanguichijmi. Shinallataj Jehová* Dios Jobta ima shina bendiciashcatapish ricushcanguichijmi. Chaimantami Jehová* Dios yallitaj cꞌuyaj, llaquij cashcata yachanguichij.

12 Ñuca huauquicunalla, tucuimanta yallica imamantapish juranata saquichij. Jahua pacha nishpa, cai pacha nishpa juranata saquichij. Ashtahuanpish ama juzgashca cangapajca “ari” nishpaca ari nishcata pajtachichij. Shinallataj “mana” nishpaca mana nishcata pajtachichij.

13 ¿Cancunapurapica maijanca llaquillachu can? Chashna cashpaca Diosta mañashpa catichun. ¿Maijanca cushillachu can? Chashna cashpaca salmocunata cantachun. 14 ¿Cancunapurapica maijanca ungushcachu can? Chashna cashpaca congregacionmanta ancianocunata cayachun. Paicunami Jehová* Diospaj shutipi aceiteta paipaj jahuapi churashpa paimanta mañangacuna. 15 Paicuna tucui shunguhuan crishpa mañajpimi chai ungushca* runaca alliyanga. Jehová* Diospish paitaca jatarichingami. Shinallataj ima juchata rurashca cajpipish paitaca perdonangami.

16 Chaimanta caishujmanta chaishujmanta mana pacashpa juchacunata huillanacuichij. Caishujmanta chaishujmantapish Diosta mañaichij. Chashnami alliyashca canguichij. Cashcata ruraj runapaj mañaica poderta charinmi. Gentecunatapish ayudai tucunmi. 17 Eliasca ñucanchij shinallatajmi sintirij carca. Shinapish ama tamyachun nishpa tucui shunguhuan Diosta mañajpica quimsa huata sujta quillacunatami allpapica mana tamyarca. 18 Diosta cutin mañajpica jahua pachamantami tamya urmarca. Chaimi allpapica granocuna pꞌucurca.

19 Ñuca huauquicunalla, cancunapuramanta maijanta mana llullamanta caruyachishca cajpica shujtaj runachari tigrachun ayudan. 20 Mana alli ruraicunata saquichun ayudaj runami juchata ruraj runataca huañuimanta quishpichinga. Juchata ruraj runapaj achca juchacunapish perdonashcami canga.