Lucas

4 Jesusca Jordán yacumantami rirca. Paimanca Diosmi paipaj espíritu santota curca. Diospaj espíritu chaquishca pambaman pushajpimi 2 Jesusca 40 punllacunata chaipi carca. Imata mana micushca cashpami chai punllacuna tucurijpica yaricachirca. Chaipimi Diabloca* pandachisha nishpa 3 Jesustaca: “Diospaj churitaj cashpaca cai rumita tanda tucuchun niyari” nirca. 4 Chashna nijpimi Jesusca: “Quillcachishcapica: ‘Runaca mana tandallahuan causanchu’ ninmi” nirca.

5 Chai qꞌuipami Diabloca Jesustaca shuj jatun urcu jahuaman pusharca. Chai jahuamantami ñahui quimllai shinallapi, cai pachapi tiyaj tucui gobiernocunata ricuchirca. 6 Chashna ricuchishpami Diabloca cashna nirca: “Tucui cai gobiernocunata, chaipi tiyashca sumajcunatapish canmanmi cusha. Cai gobiernocunaca ñucapajmi. Ñuca piman cusha nishpaca cushallami. 7 Chaimanta, shuj cutinlla ñucata adorajpica tucui caicunami cambaj canga” nircami. 8 Diablo chashna nijpimi Jesusca: “Quillcachishcapica: ‘Jehová* Diosta adorangui, paillata sirvingui’ ninmi” nirca.

9 Chai qꞌuipami Diabloca Jesusta Jerusalenman pushashpa Diospaj huasi pirca jahuapi* churashpa cashna nirca: “Diospaj churitaj cashpaca caimanta ucuman huashicui. 10 Quillcachishcapica: ‘Paica, paipaj angelcunatami canta cuidachun cachanga’ ninmi. 11 Shinallataj ‘Cambaj chaqui shuj rumillapipish ama huajtarichunmi paicunapaj maquicunapi japingacuna’ ninmi” nircami. 12 Chashna nijpimi Jesusca: “Quillcachishcapica: ‘Jehová* Diostaca ama yangamanta caita chaita rurai nishpa mañangui’ ninmi” nirca. 13 Chaimi Diabloca pandachingapaj tucuita rurashca qꞌuipaca paimanta anchurishpa rircalla. Shinapish shujtaj punlla ima shina pandachinatami mashcacurca.

14 Chaimantaca Jesusca Diospaj espirituhuan jundami Galilea llajtaman tigrarca. Tucui chai cꞌuchulla llajtacunapimi paipaj alli rurashcacunataca yachaj chayarcacuna. 15 Shinallataj paicunapaj sinagogacunapimi* yachachi callarirca. Chashna yachachijpimi paitaca tucuicuna alli nircacuna.

16 Chai qꞌuipaca pai huiñashca Nazaret llajtamanmi Jesusca rirca. Sábado punllapi ima shinami ruraj carca, chashnallatajmi paica sinagogaman* yaicushpa quillcashcata liyingapaj shayarirca. 17 Chaipica profeta Isaías quillcashca rollotami paiman curcacuna. Chai quillcashca librota pascashpami cashna nishcata ricurca: 18 “Jehová* Diosmi paipaj espirituta ñucaman cushca. Pobrecunaman alli huillaicunata huillachunmi ñucataca agllashca. Shinallataj prezupi cajcunata cacharichishca canata huillachun, mana ricujcunata jambichun, llaquichishcacunatapish cacharichichun, 19 Jehová* Dios bendiciana huatamanta huillachunpishmi ñucataca cacharca”. 20 Chaita liyishca qꞌuipaca, Jesusca quillcashca librota pillushpami sinagogapi ayudaj runaman cushpa tiyarirca. Chaipi cajcunaca tucuicunami paitaca ricuracurcacuna. 21 Chaimi Jesusca: “Cancuna uyashca cai shimicunaca cunan punllami pajtarin” nishpa parlai callarirca.

22 Tucuicunami paimantaca allita nishpa parlai callarircacuna. Shinallataj sumaj shimicunahuan parlajta uyashpami paicunaca mancharircacuna. Chaimi paicunapura parlanacushpaca: “¿Manachu paica Josepaj churi?” nircacuna. 23 Chashna ninacucujpimi Jesusca: “Ñucataca cancunaca cashnami ninguichij: ‘Jambij, canllataj jambiriyari’. ‘Capernaumpi imallata rurashcataca uyashcanchijmi. Chaillatataj cambaj llajtapipish ruraiyari’ ninguichijmi” nirca. 24 Jesusca caitapishmi nirca: “Cancunamanca mana llullanichu. Maijan profetataca quiquin llajtapica mana chasquincunachu. 25 Cancunamanca mana llullanichu. Elías causai punllacunapica Israel llajtapica achca viuda huarmicunami tiyarca. Chaipica quimsa huata chaupita mana tamyajpimi tucui chai llajtapi jatun yaricai tiyarca. 26 Shinapish Diosca chai huarmicunapajmanca Eliastaca mana cacharcachu. Ashtahuanpish Sidón llajtapi caj Sarepta pueblopi causaj viuda huarmipajllamanmi cacharca. 27 Shinallataj Profeta Eliseo causashca punllacunapica lepra* ungüihuan cajcunaca achcacunami Israel llajtapica tiyarca. Shinapish paicunapuramantaca shujllatapish mana jambircachu.* Ashtahuanpish Siria llajtamanta Naamán shuti runallatami jambirca” nircami. 28 Chashna nijta uyashpami sinagogapi cajcunaca achcata pꞌiñarircacuna. 29 Chashna pꞌiñarishpami paicunaca jatarishpa Jesustaca utca chai llajtamanta llujshichishpa, urcu jahuamanta shitangapaj chaiman pusharcacuna. Chai llajtaca urcu jahuapimi rurashca carca. 30 Ashtahuanpish Jesusca paicunapaj chaupita pasashpa rircallami.

31 Chai qꞌuipaca Jesusca Galileapi caj Capernaúm llajtamanmi uriyarca. Chaipimi sábado punlla cajpi gentecunaman yachachicurca. 32 Paica Dios ima nishcatami yachachij carca.* Chashna yachachijpimi gentecunaca mancharircacuna. 33 Chai sinagogapica millai espíritu japishca shuj runami tiyarca. Cai millai espíritu sinchita caparishpaca: 34 “Nazaret llajtamanta Jesús, ¿imata ninamantaj shamunguiyari? ¿Ñucanchijta llaquichinamanchu shamurcangui? Can pi cashcataca allimi yachani: ¡canca Dios cachashca jucha illajmi cangui!” nircami. 35 Shina nijpimi Jesusca chai demoniota* sinchita rimashpaca: “¡Upallai! ¡Paimanta llujshi!” nirca. Chashna nijpimi demonioca tucuicunapaj ñaupajpi chai runata pambapi shitashpa, paita mana llaquichishpa llujshircalla. 36 Chaita ricushpami chaipi cajcunaca mancharinacushpa paicunapuraca: “¡Ricuichij, cai runa ima shina rimajta! Paica poderyuj cashpamari millai espiritucunataca mandan. Chaimi millai espiritucunaca gentecunamanta llujshinllacuna” nircacuna. 37 Jesusmantaca tucui chai muyundij llajtacunapimi yachaj chayarcacuna.

38 Jesusca sinagogamanta llujshishpaca Simonpaj* huasimanmi yaicurca. Chai huasipica Simonpaj suegrami achca fiebrehuan llaquita apacurca. Chaimantami paita ayudachun mañarcacuna. 39 Shina mañajpimi Jesusca chai huarmipajman cꞌuchuyashpa fiebremanta alliyachirca. Chai huarmica alliyashcahuanmi jatarishpa micunata paicunapaj rurai callarirca.

40 Inti ña huashicucujpimi ungushcacunata huasipi charijcunaca, tucui laya ungüihuan cajcunata Jesuspajman pushamurcacuna. Chashna pushamujpimi Jesusca paicunapaj jahuapi maquita churashpa cada unota jambirca. 41 Shinallataj achca gentecunamantami paica demoniocunata llujshichirca. Chai demoniocunaca: “¡Canca Diospaj Churimi cangui!” nishpami caparishpa llujshircacuna. Demoniocunaca pai Cristo cashcataca allimi yacharcacuna. Chaimantami Jesusca sinchita rimashpa paicuna rimachunca mana saquirca.

42 Ña pacarijpimi Jesusca chaimanta llujshishpa pi mana causan chulunlla ladoman rirca. Ashtahuanpish gentecunaca paita mashcashpami pai maipi cashcaman chayarcacuna. Chaiman chayashpaca paicunahuan saquirichunmi Jesustaca rogarcacuna. 43 Chashna rogajpipish Jesusca: “Diospaj Gobiernomanta* alli huillaicunataca shujtaj llajtapi causajcunamanpishmi huillana cani. Chaipajmi Diosca ñucataca cacharca” nircami. 44 Chashnami Judeapi caj sinagogacunapi alli huillaicunata huillashpa catirca.