2 Reyes
2 Jehová Dios Eliasta sinchi huairahuan jahua pachaman* apagrijpimi Eliaspish, Eliseopish Guilgalmanta llujshircacuna. 2 Chaimi Eliasca Eliseotaca: “Jehová Diosca ñucataca Betelmanmi cachashca, canca caipi saquiripai” nirca. Shinapish Eliseoca: “Causaj Jehová Diospaj shutipi, cambaj shutipimi jurani. Cantaca manataj saquishachu” nishpami cutichirca. Chashna nishpaca paicunaca Betelmanmi uriyarcacuna. 3 Betelpi caj profetacunapaj churicunaca* Eliseota tupanamanmi llujshircacuna. Chashna tupanaman rishpami: “¿Cambaj amitota Jehová Dios cunan apana cashcataca yachanguichu? ¿Canta yachachij canata pai saquigrishcatapish yachanguichu?” nishpa tapurcacuna. Chashna nijpimi Eliseoca paicunamanca: “Ari, yachanimi. Pero chaimantaca ama parlaichijchu” nirca.
4 Eliasca: “Eliseo, Jehová Diosmi ñucataca Jericoman cachashca, canca caipi saquiripai” nircami. Pero Eliseoca: “Causaj Jehová Diospaj shutipi, cambaj shutipimi jurani. Cantaca manataj saquishachu” nishpami cutichirca. Qꞌuipaca Jericomanmi chayarcacuna. 5 Chaiman chayajpimi Jericopi caj profetacunapaj churicunaca Eliseopajman cꞌuchuyashpaca: “¿Cambaj amitota Jehová Dios cunan apana cashcataca yachanguichu? ¿Canta yachachij canata pai saquigrishcatapish yachanguichu?” nishpa tapurcacuna. Chashna nijpimi Eliseoca paicunamanca: “Ari, yachanimi. Pero chaimantaca ama parlaichijchu” nirca.
6 Eliasca cutinmi: “Jehová Diosca ñucataca Jordán jatun yacuman richunmi cachashca, caipi saquiripai” nirca. Shinapish Eliseoca: “Causaj Jehová Diospaj shutipi, cambaj shutipimi jurani. Cantaca manataj saquishachu” nishpami cutichirca. Chaimi ishquindij rircacunalla. 7 Shinallataj profetacunapaj 50 churicunami paicunata catishpa rircacuna. Chaipimi profetacunapaj churicunaca Eliastapish, Eliseotapish Jordán jatun yacu cꞌuchupi shayacujta carumanta ricushpa saquirircacuna. 8 Chaipica Eliasca paipaj churanata pillushpami yacuta huajtarca. Chashna huajtajpimi yacucunaca shujca alli ladoman, caishujca lluqui ladoman chaupirirca. Chashna tucujpimi paicunaca chaquishca pambata pasai tucurcacuna.
9 Paicuna chai chaquishca pambata tucui pasajpimi Eliasca Eliseotaca: “Canmanta ñucata amaraj separajpi canmanta imata rurachun munashcata mañai” nirca. Chashna nijpimi Eliseoca: “Ama shina caichu. ¿Dios canman cushca espiritumanta ishqui parteta chari tucunichu?” nishpa mañarca. 10 Chaimi Eliasca: “Canman imata cuchun mañashcaca sinchimi. Canmanta ñucata separacujta ricushpaca can mañashcataca chasquinguimi. Pero canmanta separacujta mana ricushpaca can mañashcataca mana chasquinguichu” nirca.
11 Paicuna ishquindij purishpa parlanacushpa ricujpimi ñapish macanacunapaj shuj carreta nina shina caballocunahuan ricurishpa paicunataca separarca. Chaipimi Eliasca sinchi huairapi jahua pachaman huichiyarca. 12 Chaita ricushpami Eliseoca: “¡Ñuca yayitulla, ñuca yayitulla! ¡Ricui, Israelpaj carretata, paipaj caballocunapi purijcunatapish!” nishpa caparirca. Pero Eliasta ña mana ashtahuan ricushpaca paipaj churanata japishpami ishquipi lliquirirca. 13 Chai qꞌuipaca Eliaspaj urmashca churanata japishpami Jordán jatun yacu cꞌuchu uriman tigrarca. 14 Eliaspaj urmashca churanahuanmi Eliseoca yacucunata huajtashpaca: “¿Eliaspaj Jehová Diosca maipitaj can?” nirca. Chashna nishpa Eliseo yacucunata huajtajpimi yacuca shujca alli ladoman, caishujca lluqui ladoman chaupirijpi paica chaita pasai tucurca.
15 Jericomanta profetacunapaj churicunaca carumanta ricushpami: “Eliaspi cashca Diospaj espirituca cunanca Eliseohuanmari” nircacuna. Chashna nishpami paicunaca Eliseota tupanaman rishpaca paipaj ñaupajpi pambacama cumurircacuna. 16 Chashnami paicunaca: “Canta sirvijcunapurapica tucui imatapish allita ruraj 50 runacunami tiyan. Paicuna cambaj amitota mashcanaman richun saquihuai. Tal vez Jehová Diospaj espiritumi* paitaca apashpa, qꞌuipaca shuj urcu jahuapi mana cashpaca shuj pugru pambapi shitashca canga” nircacuna. Pero Eliseoca: “Mashcanaman ama cachaichijchu” nircami. 17 Shinapish paicunaca mashcanaman cachachunmi cutin cutin mañarcacuna. Chaimi Eliseoca: “Cachaichij” nirca. Chashna nijpimi paicunaca 50 runacunata cacharcacuna. Cai runacunaca quimsa punllacunata mashcashpapish Eliastaca mana japircacunachu. 18 Paicuna Eliseopajman tigramujpica Eliseoca Jericó llajtapimi carca. Chaimi paicunataca: “¿Manachu ñucaca ama richijchu nircani?” nirca.
19 Tiempo qꞌuipaca chai llajtamanta runacunaca Eliseotaca: “Amito, can ricushca shinaca cai llajtaca alli lugarpimi can. Shinapish yacuca mana allichu can. Allpapish ima granota mana pꞌucunchu” nircacunami. 20 Chashna nijpimi Eliseoca: “Uchilla mushuj tazonta apamuichij, chaipi cachita churaichij” nirca. Chaimi paicunaca tazonta cachihuan apamurcacuna. 21 Chashna apamujpimi Eliseoca pugyu yacuman rishpa cachita chaipi shitashpaca: “Jehová Diosca: ‘Cai yacutaca ñami chuyayachishcani. Chaimanta ña mana pi huañungachu. Huarmicunapish huahuacunatami charinga’* ninmi” nirca. 22 Chai yacuca Eliseo nishca shinami cunan punllacama chuyayashca saquirirca.
23 Eliseoca chaimantaca Betelmanmi rirca. Chai llajta ñanta ricujpimi Jericomanta huaquin huambracuna llujshishpa Eliseomanta burlarishpaca: “¡Lluchu* uma, caimanta llujshi! ¡Lluchu uma, caimanta llujshi!” nircacuna. 24 Chashna nijpimi Eliseoca tigrarishcahuan paicunata ricushpaca Jehová Diospaj shutipi maldicirca. Chaimi bosque chaupimanta ishqui osacuna llujshishpa 42 huambracunata cashtushpa mirga mirgata rurarca. 25 Eliseoca chaimantaca Carmelo urcumanmi rishpa catirca. Qꞌuipaca Samariamanmi tigramurca.