Hechos
22 “Huauquicuna, yayacuna ñuca nishcata alli uyapaichij. Cancunamanmi ima tucushcata huillasha nini” nircami. 2 Hebreo shimipi Pablo parlajta uyashpacarin paicunaca ashtahuanmi upallarcacuna. Chaimi paica cashna nishpa catirca: 3 “Ñucaca judiomi cani. Ciliciapi saquirij Tarso llajtapimi huacharircani. Shinapish cai Jerusalén llajtapimi Gamaliel runa ñucataca yachachirca. Ñucanchij ñaupa yayacunaman cushca Leyta tucuipi cazuchunmi yachachirca. Cancuna shinallatajmi ñucapish Diosta tucui shunguhuan sirvishcani. 4 Diospaj Ñanpi purijcunataca catirashpa llaquichishpami huañuchircani. Cꞌaricunatapish, huarmicunatapish huatashpami carcelpi churarcani. 5 Sacerdotecunata jatun mandajpish, llajtamanta tandanacushca autoridadcunapishmi chaitaca huillai tucuncuna. Paicunami Damasco llajtapi caj huauquicunata japishpa pushamuchun cartacunata curcacuna. Chaimantami chai huauquicunataca japishpa Jerusalenpi castigachun huatashpa pushamunaman rircani.
6 Shinapish Damasco llajtaman rishpa ñalla chayagricujpimi chaupi punlla shinataca, ñapish jahua pachamanta shuj jatun luz shamushpa ñuca jahuapi achijyachirca. 7 Chaimi ñucaca pambaman urmashpaca: ‘Saulo, Saulo, ¿ima nishpataj ñucataca catirashpa llaquichicungui?’ nishpa rimashcata uyarcani. 8 Shina rimashcata uyashpami ñucaca: ‘¿Amito, pitaj canguiyari?’ nishpa cutichircani. Chaimi paica: ‘Ñucaca Nazaretmanta Jesusmi cani. Ñucatami catirashpa llaquichicungui’ nirca. 9 Shinapish ñucahuan ricuj runacunaca chai achijyachij luzta ricushpapish, ñucaman rimacuj imata nicushcataca mana uyarcacunachu. 10 Chai qꞌuipami ñucaca: ‘¿Amito, imatataj rurana cani?’ nircani. Chashna nijpimi paica: ‘Jatari, Damasco llajtaman ri. Chaipimi can imata rurana cashcataca huillangacuna’ nirca. 11 Chai luz achijyachijpica mana imata ricui tucurcanichu. Chaimantami ñucahuan ricuj runacunaca maquimanta aisashpa pusharcacuna. Chashnami Damasco llajtamanca chayarcani.
12 Chai llajtaman chayashca qꞌuipami Diosta manchaj, Moisesman cushca leypi nishcatapish tucuita pajtachij, chaipi causaj judiocunapish alli nishca Ananías runa 13 ñucata ricunaman shamurca. Ñuca ladopi shayarishpaca: ‘¡Ñuca huauqui Saulo, cambaj ñahuicuna cutin ricuchun!’ nircami. Chashna nincami umata alzashpaca Ananiasta ricurcani. 14 Chaipimi paica: ‘Ñucanchij ñaupa yayacunapaj Diosmi paipaj munaita yachachun, cashcata ruraj Jesustapish ricuchun, paipaj rimashcatapish uyachun canta agllashca. 15 Canca paimanta imata ricushcata, imata uyashcata tucuicunapaj ñaupajpi huillajmi cangui. 16 Shinaca ¿imatataj shuyacungui? Jatari, bautizari, Jesuspaj shutipi mañashcamantami Diosca cambaj juchacunata perdonanga’ nirca.
17 Shinapish Jerusalenman tigrashpaca Diospaj huasipimi* Diosta mañacurcani. Chaipimi muscuipi shina ricui callarishpaca 18 Jesusta ricurcani. Chashna ricurishpami paica: ‘Apurai, Jerusalenmanta utca llujshi, ñucamanta can huillashcataca mana chasquingacunachu’ nirca. 19 Shina nijpimi ñucaca cashna nircani: ‘Amito, ñucaca shuj sinagogamanta* caishuj sinagogaman rishpami canta crijcunata macashpa, carcelpi churaj carcani. Chaitaca paicunaca allimi yachancuna. 20 Canmanta huillaj Estebanta huañuchicujpipish ñucaca chaipimi carcani. Paicunapaj lado tucushpami Estebanta huañuchicujcunapaj jahua churanacunatapish huaquichircani’ nircani. 21 Chashna nijpipish paica: ‘Caimanta ri, cantaca caru llajtacunamanmi cachasha’ nirca” nircami.
22 Chaicamaca Pablo ima nishcatami gentecunaca uyacurcacuna. Shinapish chai qꞌuipaca: “¡Chai runa causashpa catichunca ama saquichu! ¡Paica huañunatajmi can!” nishpami caparircacuna. 23 Chashna caparishpami paicunapaj jahua churanatapish shitashpa, ñutu allpatapish jahuata shitarcacuna. 24 Chaimi 1.000 soldadocunata mandajca soldadocunapaj cuartelman Pablota yaicuchichun mandarca. Shinallataj gentecuna imamanta paita huañuchichun nishpa caparicushcata alli yachangapajmi Pablota azotishpa tapuchun mandarca. 25 Shinapish paita azotingapaj huatacujpimi Pabloca chaipi caj 100 soldadocunata mandajtaca: “¿Leypica Roma llajtamanta runataca manaraj juzgashpa azotichun saquinllachu?” nirca. 26 Chaita uyashpami 100 soldadocunata mandajca 1.000 soldadocunata mandajpajman rishpaca: “¿Imatataj ruragringui? Cai runaca Roma llajtamantamari” nishpa huillarca. 27 Chashna huillajpimi 1.000 soldadocunata mandajca Pablo maipi cashcaman rishpaca: “¿Canca Roma llajtamantachu cangui?” nishpa tapurca. Chaimi Pabloca: “Ari” nishpa cutichirca. 28 Chashna cutichijpimi 1.000 soldadocunata mandajca: “Ñucaca romano tucungapajca achca cullquitami pagarcani” nirca. Shina nijpimi Pabloca: “Ñucaca Roma llajtapimi huacharircani” nirca.
29 Chashna nijpica azotishpa tapusha nij soldadocunaca paita chaipi saquishpami chai rato caruyarcacuna. 1.000 soldadocunata mandajpish Pablo Roma llajtamanta cashcata yachashpami cadenacunahuan huatachun mandashcamanta mancharirca.
30 Judiocuna imamanta juchachicushcata alli yachasha nishpami cayandij punllaca Pablota cacharichirca. Shinallataj sacerdotecunata mandajcunatapish, tucui mandaj juezcunatapish* tandanacuchunmi mandarca. Chaimantami Pablotaca paicuna maipi tandanacushca ucuman pushashpa paicunapaj ñaupajpi churarca.