Jesusca 12 apostolcunatami agllarca

Jesusca shuj huata chaupita predicacushpami apostolcunata agllana carca. Apostolcunami Jesushuan purina carca, congregaciontapish ñaupajman pushana carca. Apostolcunata manaraj agllashpaca Jesusca paillami shuj urcuman rishpa tucui tuta Diosta mañarca. Cayandij punllaca huaquin discipulocunata tandachishpami paicunapuramanta 12 apostolcunata agllarca. ¿Paicunapaj shutita yachanguichu? Paicunaca Pedro, Andrés, Santiago, Juan, Felipe, Bartolomé, Tomás, Mateo, Alfeopaj churi Santiago, Tadeo, Simón, Judas Iscariotemi carcacuna.

12 apostolcunaca Jesushuanmi purijcuna carca. Jesusca ima shina predicanatami paicunaman yachachirca. Qꞌuipaca paicunalla predicachunmi cacharca. Jehová Diosca demoniocunata llujshichichun, ungushcacunata jambichunpishmi paicunaman poderta curca.

Apostolcunaca Jesuspaj amigocunami carca. Chaimantami paica paicunapi confiarca. Shinapish fariseocunaca apostolcunataca imatapish mana yachajcuna, yanga runacuna cashcata shinami ricujcuna carca. Pero Jesusca mana chashna yuyarcachu. Ashtahuanpish pai mingashcata pajtachichunmi yachachirca. Apostolcunaca Jesús manaraj huañujpi, causarishca qꞌuipapish paihuanmi carcacuna. Jesusca Galileamantami carca. Mayoría apostolcunapish chaillamantatajmi carcacuna. Huaquincunaca cazadocunami carca.

Apostolcunaca juchayujcuna cashcamantami pandarijllacuna carca. Maipica manaraj alli yuyarishpami imatapish nijcuna carca. Mana alli decisioncunatapishmi japijcuna carca. Huaquinpicarin pacienciata mana ricuchircacunachu. Shuj punllaca apostolcunapurami: ‘Ñucami ashtahuan importante cani’ nishpa litunacurcacuna. Shinapish Diosta cꞌuyajcunami carca. Jesús ña mana cai Allpapi cajpica paicunami congregacioncunata callarichina carca.