Jesusca shuj urcupimi yachachirca

12 apostolcunata agllashca qꞌuipaca Jesusca urcumanta uriyashpami achca tandanacushca gentecunapajman rirca. Chai gentecunaca Galilea, Judea, Tiro, Sidón, Siria, Jordán yacu ladomantapishmi carcacuna. Paicuna ungushcacunata, demonio japishcacunata apajpimi Jesusca tucuicunata jambirca. Qꞌuipaca Jesusca tiyarishpami Diospaj amigo cangapajca pai ñucanchijtapish yachachichun saquina cashcata yachachi callarirca. Shinallataj Diosta cꞌuyanata yachana cashcatapishmi yachachirca. Jesusca Diosta mana cꞌuyashpaca shujtajcunatapish mana cꞌuyai tucunchijchu nircami. Paica tucuicunata alli tratana cashcatapishmi yachachirca.

Jesusca: ‘Amigocunallataca mana cꞌuyanachu cangui. Canta pꞌiñajcunatapishmi cꞌuyana cangui. Tucuicunatami shungumanta perdonana cangui. Pi canhuan pꞌiñarijpica chai ratomi perdonta mañana cangui. Canta ima shina tratachun munangui, chashnallatajmi shujtajcunatapish tratana cangui’ nircami.

Shinallataj Jesusca: ‘Cullquita cꞌuyanapaj randica Diostami cꞌuyana cangui. Cullquitaca maijanpish quichui tucunmi. Pero Diosmantaca pi mana caruyachi tucungachu. Chaimantami micunamanta, churanamantaca mana sustarina cangui. Pajaritocunata ricui. Diosca pajaritocunamanca micunitata carashpami siempre cuidan. Achcata sustarishpapish mana ashtahuan huatacunata causanguichu. Diosca imalla minishtishcataca allimi yachan’ nircami.

Gentecunaca Jesús yachachishca shinataca mana nunca uyashcacunachu carca. Religionta pushajcunaca mana chashna yachachijcunachu carca. ¿Imamantataj Jesusca alli yachachij carca? Jesuspaj tucui yachachishcacunaca Diosmantami shamurca.