Cuerpo Gobernante cachashca carta

Cꞌuyashca huauqui panicuna:

Gentecunatapish, Diostapish cꞌuyashcamantami Jesús imata mandashcata cazunchij. Paica: ‘Chaimanta tucui llajtacunapi causaj gentecunapajman rishpa ñucata catijcuna tucuchun yachachigrichij. Paicunata bautizaichij’ nircami (Mateo 28:​19, 20; Marcos 12:​28-31). Gentecunata shungumanta cꞌuyashpaca alli gentecuna Diosta sirvichunmi ayudashun (Hechos 13:48).

Sarun punllacunaca predicangapaj imata nigrishcatami de memoria yachajcuna carcanchij, publicacioncunatapishmi saquijcunalla carcanchij. Pero cunanca gentecunaman cꞌuyaita ricuchishpami ima shina parlanacuna cashcata yachana canchij. Gentecuna chꞌican chꞌican yuyaita charishcamantami paicuna imata munashcata, imamanta preocuparishcata ricushpa parlana canchij. Cai folletoca chaita pajtachingapajmi rurashca can.

Cai folletoca 12 yachaicunatami charin, shinallataj 12 cualidadcunamantami yachachin. Caicunamanta yachashpaca cꞌuyaita ricuchinata, Jesusta catijcuna tucuchun ayudanatapishmi yachashun. Cai folletopica Jesuspaj ejemplomanta, Bibliapi parlaj Jesuspaj huaquin discipulocunamantapishmi yachashun. Gentecunaman huillangapajca ña mana de memoria yachanachu canchij. Ashtahuanpish gentecunaman cꞌuyaitami ricuchina canchij. Chaipajca gentecunahuan parlanacui callaringapaj, revisitacunata rurangapaj, yachacujcunaman yachachingapajpishmi chꞌican chꞌican yuyaicunata ricushun.

Cada yachaita yachacushpaca ima shina practicapi churanata yuyai. Jehová Diosman, gentecunamanpish cꞌuyaita ricuchinaca tucuimanta yalli valishcami can. Chaimanta cꞌuyaita ricuchingapaj esforzarishpa cati. Cꞌuyaita ricuchishpallami Jesusta catijcuna tucuchun gentecunata ayudashun.

Cancunahuan Jehová Diosta tandalla sirvicushcamantami achcata cushicunchij (Sofonías 3:9). Gentecunaman cꞌuyaihuan yachachicushcamanta Jehová Dios achcata bendiciachun.