Caishuj chaishuj cꞌuyanacushpa catishunchij

1, 2. a) ¿Pabloca imamantataj cꞌuyaica shujtaj cualidadcunata yalli cashcata nirca? b) ¿Cunanca ima tapuicunatataj yachashun?

APÓSTOL Pabloca feta, esperanzata, cꞌuyaita charinamanta parlacushpaca “cai quimsamanta ashtahuan yallica cꞌuyaimi” nircami (1 Corintios 13:13). ¿Pabloca imamantataj chaita nirca? Yuyashun. Shamuj punllacunapi Jehová Dios sumaj causaita cunataca tucui shunguhuanmi crinchij ¿nachu? Pero cai Allpapi sumaj causai tiyajpica chaipi crinataca ña mana minishtishunchu. Pero Paraisopi causacushpapish Jehová Diosta, huauqui panicunata cꞌuyashpa catinaca minishtirishcami canga. Cꞌuyaica manataj tucuringachu.

² Cunan punllacunapi, shamuj punllacunapi cꞌuyaita ricuchina cashcamantaca cunanca quimsa tapuicunatami cutichishun. Shuj, ¿imamantataj caishuj chaishuj cꞌuyaita ricuchinacuna canchij? Ishqui, ¿ima shinataj cꞌuyaita ricuchi tucunchij? Quimsa, ¿huauqui panicunata cꞌuyashpa catingapajca imatataj rurana canchij?

¿IMAMANTATAJ CAISHUJ CHAISHUJ CꞌUYANACUNA CANCHIJ?

3. ¿Caishuj chaishujca imamantataj cꞌuyanacuna canchij?

³ ¿Imamantataj caishuj chaishuj cꞌuyanacuna canchij? Chaita rurashpaca Jesusta alli catijcuna cashcatami ricuchishun. Jesusca paita catijcunamanca: “Cancuna chashna caishuj chaishuj cꞌuyanacujpimi ñucata catijcuna cashcata tucuicuna yachangacuna” nircami (Juan 13:35). Shinallataj cꞌuyaita ricuchinami tandalla cachun ayudan. Chaimi apóstol Pabloca: “Cꞌuyaimi gentecunataca tucuipi shuj shinallata ruran” nirca (Colosenses 3:14). Ashtahuanpish huauqui panicunata cꞌuyashpaca Jehová Diostapish cꞌuyashcatami ricuchishun. Chaimi apóstol Juanca: “Diosta cꞌuyajca paipaj huauquitapish cꞌuyachun” nirca (1 Juan 4:21).

4, 5. ¿Jehová Diosta cꞌuyangapajca imamantataj huauqui panicunatapish cꞌuyana canchij? Shuj ejemplota churashpa parlai.

⁴ ¿Jehová Diosta cꞌuyangapajca imamantataj huauqui panicunatapish cꞌuyana canchij? Caita alli intindingapajca cai ejemplopi yuyashun. ¿Doctorcunaca ñucanchij shungu ima shina cashcata yachangapajca huaquinpica imatataj rurancuna? Paicunaca ñucanchij maquipimi pulsota ricuncuna. ¿Caimantaca imatataj yachanchij?

⁵ Ima shinami doctorcunaca ñucanchij pulsota ricushpa ñucanchij shungu alli o mana alli cashcata yachai tucuncuna, chashnallatajmi Jehová Diosta tucui shunguhuan cꞌuyashcata yachangapajca huauqui panicunata mashnata cꞌuyashcata ricuna canchij. Huauqui panicunata mana tanto cꞌuyashpaca Jehová Diostapishmi mana tanto cꞌuyashun. Pero huauqui panicunata shungumanta cꞌuyashcata ricuchingapaj esforzarishpaca Jehová Diostapish shungumanta cꞌuyashcatami ricuchishun.

6. ¿Huauqui panicunata ña mana tanto cꞌuyashcata cuentata cushpaca maqui cruzashcachu saquirina canchij? (1 Juan 4:​7-9, 11).

⁶ ¿Huauqui panicunata ña mana tanto cꞌuyashcata cuentata cushpaca maqui cruzashcachu saquirina canchij? Mana. Paicunata ña mana tanto cꞌuyashcata ricuchishpaca Jehová Diostapish ña mana cꞌuyacushcatami ricuchishun. Chaimi apóstol Juanca: ‘Maijanpish ñahuihuan ricushca huauquita mana cꞌuyashpaca, ¿ima shinataj mana ricushca Diostacarin cꞌuyangari?’ nirca (1 Juan 4:20). Shinashpaca Diospaj ñaupajpi alli ricuringapajca caishuj chaishujmi cꞌuyanacuna canchij (1 Juan 4:​7-9, 11-ta liyipai).

¿CꞌUYAITACA IMA SHINATAJ RICUCHI TUCUNCHIJ?

7, 8. ¿Caishuj chaishuj cꞌuyanacushcataca ima shinataj ricuchi tucunchij?

⁷ Bibliapica achca cutincunami “caishuj chaishuj cꞌuyanacuichij” nishpa mandan (Juan 15:​12, 17; Romanos 13:8; 1 Tesalonicenses 4:9; 1 Pedro 1:22; 1 Juan 4:11). Cꞌuyaica shungu ucupimi huiñan. Chaimantami cꞌuyaita charishcataca pi mana ricui tucun. Pero ¿tucuicuna ñucanchijcuna cꞌuyajcuna cashcata ricuchunca imatataj rurana canchij? Ñucanchij rimaicunahuan, ruraicunahuanmi cꞌuyaita charishcata ricuchina canchij.

⁸ ¿Huauqui panicunata cꞌuyashcataca ima shinataj ricuchi tucunchij? Chaitaca Bibliapimi yachai tucunchij. Bibliapi nishca shinaca caishuj chaishujca mana llullanacunachu canchij (Zacarías 8:16). Shinallataj caishuj chaishujhuanmi sumajta causana canchij (Marcos 9:50). Ñucanchijraj shujtajcunata respetashcatapishmi ricuchina canchij (Romanos 12:10). Shinallataj caishuj chaishujmi alli chasquinacuna canchij (Romanos 15:7). Shungumanta perdonanacunataca manataj saquinachu canchij (Colosenses 3:13). Llaquicunapi cashpaca llashaj cargata apaj shinami caishuj chaishuj ayudanacuna canchij (Gálatas 6:2). Shinallataj caishujmanta chaishujmanta alaja shimicunahuanmi cushichinacuna canchij (1 Tesalonicenses 4:18). Caishuj chaishuj animanacushpa, sinchiyarinacushpami catina canchij (1 Tesalonicenses 5:11). Ashtahuanpish caishujmanta chaishujmantami Diosta mañana canchij (Santiago 5:16).

9. ¿Huauqui panicunata cꞌuyaita ricuchingapajca imamantataj paicunata animana canchij? (Fotomantapish parlapai).

⁹ Párrafo 8-pi ricushca shinaca shujtajcunata cꞌuyashcata ricuchingapajca caishuj chaishujmi animanacuna canchij. Chaimi Pabloca ‘caishuj chaishuj cushichinacuichij’ nirca. Pero ¿cꞌuyaita ricuchingapajca imamantataj animota cunaca minishtirishca can? Bibliamanta parlaj shuj libropi nishca shinaca Pabloca griego rimaipi ‘caishuj chaishuj cushichinacuichij’ nishpaca huauqui panicuna llaquicunata apacujpica paicunata animangapajmi listos cana canchij. Huauqui panicunata chashna ayudajpimi huiñai causaiman apaj ñanpi purishpa catingacuna. Shinashpaca huauqui panicuna llaquilla cai horasca ratomi paicunataca ayudana, animana canchij. Chashnami paicunata cꞌuyashcata ricuchishun (2 Corintios 7:​6, 7, 13).

10. ¿Shujtajcunata animangapajca imamantataj llaquijcuna cana canchij?

¹⁰ ¿Shujtajcunata shungumanta animangapajca imamantataj paicunataca llaquina canchij? Llaquijcuna cashpaca shujtajcuna llaquicunata apacujta ricushpaca shungumantami paicunataca ayudanata, animanata munashun. Llaquijcuna cangapajca Jehová Diospaj ejemplotami catina canchij. Apóstol Pablo nishca shinaca Jehová Diosca yallitaj llaquij cashcamantami paita sirvijcunataca tucuipi animasha, cushichisha nin (2 Corintios 1:3). Jehová Diosca tucuicunamanta yallimi llaquij can. Chaimi paica siempre ñucanchijta ayudasha nin (2 Corintios 1:4). Ima shinami yacunaihuan cashpaca yacuta ubyashpa tranquilo sintirinchij, chashnallatajmi llaquicunata apacujpica Yayitu Diosca tranquilo sintirichun ayudan. Pero ¿Jehová Dios shina shujtajcunata llaquishcamanta paicunata ayudangapajca imatataj rurana canchij? Alli cualidadcunata charingapajmi esforzarina canchij. Cunanmi chaimanta yachashun.

11. Colosenses 3:12 y 1 Pedro 3:​8-pi nishca shinaca ¿shujtajcunata animangapajca ima cualidadcunatataj ricuchina canchij?

¹¹ ¿Caishuj chaishuj cꞌuyanacushpa, cushichinacushpa catingapajca imatataj rurana canchij? Llaquilla cajcunahuan llaquirinata, familia ucupi shina cꞌuyaita ricuchinata, cuj canatapish manataj saquinachu canchij (Colosenses 3:12; 1 Pedro 3:​8-ta liyipai). Cai sumaj cualidadcunata charishpaca huauqui panicuna llaquicunata apacujpica paicunatami shungumanta animanata munashun. Jesusca: “Shimica shungupi ima tiyashcatami riman. Alli runaca paipaj shungupi alli yuyaicunata charishcamantami allicunata riman” nircami (Mateo 12:​34, 35). Shinashpaca huauqui panicunata cꞌuyashcata ricuchingapajca paicunatami animana canchij.

¿CꞌUYAI AMA CHIRIYACHUNCA IMATATAJ RURANA CANCHIJ?

12. a) ¿Imamantataj cuidadota charina canchij? b) ¿Cunanca ima tapuitataj cutichigrinchij?

¹² Tucuicunami 1 Juan 4:​7-pi nishcata cazungapaj esforzarisha ninchij. Chaipica: “Caishuj chaishuj cꞌuyanacushpa catishunchij” ninmi. Shinapish tucuri punllacunamanta parlacushpa Jesús imata nishcatami yuyarina canchij. Paica: “Achca gentecunapaj cꞌuyaica chiriyangami” nircami (Mateo 24:12). Jesusca chaita nishpaca casi tucui paita catijcuna paicunapura ña mana cꞌuyanacunataca mana nisha nircachu. Shinapish ¿imamantataj cuidadota charina canchij? Huauqui panicunata cꞌuyashpa catingapaj mana esforzarishpaca Diosta mana sirvijcuna shina cashcatami ricuchishun. Cunanca cai catij tapuitami cutichigrinchij: ¿Huauqui panicunata shungumanta cꞌuyajcuna cashcataca ima shinataj yachai tucunchij?

13. ¿Huauqui panicuna imata rurajpitaj paicunata cꞌuyashcata ricuchinaca sinchi canga?

¹³ Huauqui panicunata shungumanta cꞌuyajcuna cashcata yachangapajca huaquin problemacuna ricurijpi cada uno imata rurajcuna cashcatami ricuna canchij (2 Corintios 8:8). Por ejemplo, apóstol Pedroca: “Tucuimanta yallica shungumanta caishuj chaishuj cꞌuyaita ricuchinacuichij. Cꞌuyaita charijca achca juchacunata perdonangapajmi listo can” nircami (1 Pedro 4:8). Shinashpaca huauqui panicuna pandarijpi o ñucanchijta llaquichijpimi paicunata de verdad cꞌuyashcata ricuchinaca sinchi canga.

14. 1 Pedro 4:​8-pi nishca shinaca ¿huauqui panicunata cꞌuyashcataca ima shinataj ricuchinchij? Shuj ejemplomanta parlai.

¹⁴ Apóstol Pedro imata nisha nishcata ricushun. Verso 8-paj callari partepica Pedroca huauqui panicunata “shungumanta” cꞌuyana cashcatami nirca. Hebreo rimaipica ‘shungumanta cꞌuyanacuichij’ nishpaca shuj mesata shuj telahuan tapacuj shinahuanmi chꞌimbapurarca. Cutin versopaj tucuri partepica Pedroca: “Cꞌuyaita charijca achca juchacunata perdonangapajmi listo can” nircami. Shinashpaca huauqui panicuna achca cutin pandarijpipish chai pandarishcacunata shuj jatun telahuan tapacushca shinami paicunata perdonangapaj listos cana canchij.

15. ¿Huauqui panicunata shungumanta cꞌuyashpaca imatataj rurashun? (Colosenses 3:13).

¹⁵ Huauqui panicunata perdonanaca huaquinpica sinchimi cai tucun. Pero paicunata shungumanta cꞌuyashpaca perdonai tucushunmi (Colosenses 3:​13-ta liyipai). Shinallataj shungumanta perdonashpaca Jehová Diostami cushichinchij. Pero ¿huauqui panicuna pꞌiñachijpi o llaquichijpica paicunata perdonangapajca ima ashtahuantaj rurai tucunchij?

16, 17. ¿Huauqui panicunapaj pandarishcacunallata ama ricungapajca imatataj rurana canchij? Shuj ejemplomanta parlai; fotomantapish parlapai.

¹⁶ Shujtajcuna pandarishcacunallata ricunapaj randica, paicunapaj alli cualidadcunatami ricuna canchij. Cai ejemplopi yuyashun. Huauqui panicunahuan alajata pasashca qꞌuipaca tandallachari shuj fotota llujchinata munanguichij. Canca quimsa fotocunatami llujchingui. Pero qꞌuipaca shuj huauqui shuj fotopi mana alli llujshishcatami cuentata cungui. ¿Chai fotohuanca imatataj ruranguiman? Seguramente chai fotota borrashpa ashtahuan alli fotocunallahuanmi saquiringuiman ¿nachu?

¹⁷ Huauqui panicunahuan imalla rurashcacunaca ñucanchij uma ucupica fotocuna shinami huaquichirin. Paicunahuan cushilla pasashcatami siempre yuyarinchij. Pero ¿maijan huauqui o pani ñucanchijta llaquichijpica imatataj rurana canchij? Shuj fotota borracuj shinami paicuna llaquichishcataca mana yuyaricunalla canchij (Proverbios 19:11; Efesios 4:32). Chaita rurashpaca chai huauquihuan o chai panihuan alli pasashcallatami alaja fotocuna shina yuyaipi charishun.

¿CAI PUNLLACUNAPI CꞌUYAITA RICUCHINACA IMAMANTATAJ VALISHCA CAN?

18. ¿Cai yachaipica imallatataj yachashcanchij?

¹⁸ ¿Huauqui panicunata shungumanta cꞌuyangapajca imamantataj esforzarina canchij? Caipi yachashca shinaca huauqui panicunata cꞌuyashpaca Jehová Diostapish cꞌuyashcatami ricuchishun. Pero ¿shungumanta cꞌuyajcuna cashcataca ima shinataj ricuchi tucunchij? Chaipajca huauqui panicunatami animana canchij. Shinallataj paicunata llaquishcamantami ayudai tucunchij. Ashtahuanpish ¿cꞌuyai ama chiriyachunca imatataj rurana canchij? Shujtajcuna pandarishcacunata shungumanta perdonangapajmi esforzarina canchij.

19. ¿Cunan punllacunapi cꞌuyaita ricuchinaca imamantataj minishtirishca can?

¹⁹ ¿Cunan punllacunapi cꞌuyaita ricuchinaca imamantataj minishtirishca can? Apóstol Pedroca: ‘Tucui imalla tiyashcacuna tucurinaca ñami cꞌuchuyamucun. Chaimanta caishuj chaishuj cꞌuyaita ricuchinacuichij’ nircami (1 Pedro 4:​7, 8). ¿Shamuj punllacunapica imataj tucunga? Jesusca paita catijcunamanca: “Ñucata catij cashcamantami cancunataca tucui llajtacunapi pꞌiñangacuna” nishpami huillarca (Mateo 24:9). Gentecuna ñucanchijta pꞌiñajpipish Jehová Diosta sirvishpa catingapajca tandallami cana canchij. Diabloca huauqui panicunamantami chꞌicanyachinata munan. Pero caishuj chaishuj cꞌuyanacungapaj esforzarijpica ñucanchijtaca mana chꞌicanyachi tucungachu. ‘Cꞌuyaimi tucuicunata tucuipi shuj shinallata ruran’ (Colosenses 3:14; Filipenses 2:​1, 2).