¿Dios ñucanchijta uyachunca ima shinataj mañana canchij?

JEHOVÁ DIOSTACA JESUSPAJ SHUTIPIMI MAÑANA CANCHIJ

“Imatapish ñuca shutipi ñuca Yayata mañajpica, paica cungallami” (Juan 16:23, NWT ).

Jehová Diostaca santocunapaj, angelcunapaj o huañushca familiacunapaj shutipica mana mañanachu canchij. Jesús nishca shinaca Jehová Diosca paillata mañachun, Jesucristopaj shutipi mañachunmi munan. Jesús paipaj causaita cushcamantami Diosca ñucanchij mañashcataca uyan. Jesuspaj shutipi mañashpami chaita crishcata ricuchishun. Jesusca: “Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami (Juan 14:6).

DIOSTACA TUCUI SHUNGUHUAN MAÑASHUNCHIJ

“Tucui shunguhuan paipaj ñaupajpi mañaichigari” (Salmo 62:8).

Jehová Diosta mañacushpaca shuj cꞌuyaj yayahuan shinami parlana canchij. Shuj libropi tiyaj mañaicunata rezanapaj randi o de memoria rezocunata ninapaj randica shungumanta, respetohuanmi Dioshuan parlana canchij.

YAYA DIOSTACA PAI MUNASHCA SHINA MAÑASHUNCHIJ

‘Pai munashca shina imatapish mañajpica, paica uyashpa cunllami’ (1 Juan 5:14).

Bibliapica Yaya Dios ñucanchijmanta imata ruragrishcata, ñucanchijpish paipaj imata rurai tucushcatami yachachin. Dios ñucanchij mañashcacunata uyachunca paipaj munai maijan cashcatami yuyaipi charina canchij. Chaipajca Bibliata yachashpami paita alli rijsina canchij. Chaimi Yaya Diospish ñucanchij mañashcataca cushicuihuan uyanga.

¿IMALLACUNAMANTATAJ DIOSTA MAÑAI TUCUNCHIJ?

Ima minishtirishcata cuchun mañashunchij. Yaya Diostaca micunata, churanata o maipi causanata charingapaj ayudahuai nishpami mañai tucunchij. Shinallataj alli decisioncunata agllangapaj ayudahuai nishpa, llaquicunata ahuantangapaj fuerzasta cuhuai nishpami mañai tucunchij. Ñucanchij juchacunata perdonachun, ñucanchij feta sinchiyachichun, ñucanchijta cuidachunpishmi mañai tucunchij (Lucas 11:3, 4, 13; Santiago 1:5, 17).

Shujtajcunamanta mañashunchij. Shuj alli yaya mamaca paicunapaj huahuacuna cꞌuyaita ricuchinacuchunmi munan. Jehová Diospish ñucanchij Yayami can. Chaimantami caishuj chaishuj sustarinacushpa cuidanacuchun munan. Cusamanta, huarmimanta, huahuacunamanta, familiamanta, amigocunamanta Diosta mañanaca allimi can. Jesusta catij Santiagopish, “caishujmanta chaishujmanta Diosta mañaichij” nircami (Santiago 5:16).

Mañacushpaca pagui nishunchij. Bibliapimi Yaya Dios shujtajcunamanta allita rurashcata ricuchin: ‘Taita Diosca tamyata cachashpa granocuna pꞌucuna punllapitaj pꞌucuchishpami mana nijta carashpa cushichin’ (Hechos 14:17). Yaya Dios ñucanchijmanta imalla rurashcata yuyarishpaca siempremi paitaca pagui nishun. Shinallataj paipaj mandashcacunata cazushpami agradicishcata ricuchishun (Colosenses 3:15).

PACIENCIATA RICUCHISHPA DIOSTA MAÑASHPA CATISHUNCHIJ

Ñucanchij shungumanta mañashcacunata Dios mana utca cutichijpimi maipica desanimarinchij. Pero, ¿Diosca ñucanchijmanta mana sustarishpachu ñucanchij mañashcataca mana cutichin? Mana. Maipica pai cutichingacamami mañashpa catinalla canchij. Huaquin experienciacunata ricushun.

Punta yachaipimi Stevemanta parlarcanchij. Paica caitapishmi nin: “Diosta mana mañashca cashpaca esperanza illajmi causacuiman carcani”. ¿Imataj paita ayudarca? Paica Bibliata estudiai callarishpami Yaya Diosta mañarana cashcata intindirca. Steveca: “Cꞌuyaj, ayudaj amigocunata charishcamantami Yaya Diostaca pagui nini. Cunanca cushillami causani” ninmi.

Jennyta yuyarishun. Paica, Dios ñucata uyachunca mana mericinichu nishpami yuyaj carca. Paica: “Imapaj mana valishcata yuyashpaca, imamanta chashna sintirishcata intindingapaj ayudachunmi Diosta mañarcani” ninmi. ¿Chaica ima shinataj paita ayudarca? Jennyca: “Diosta mañashpami pai ñucata ima shina ricuj cashcata intindircani. Ñuca shungu ñuca mana alli cashcata yuyachijpipish, Diosca mana chashnallataj ñucamantaca yuyanchu. Chaita intindishpami ñaupajman cati tucushcani” ninmi. Cunanca paica: “Yaya Diosta mañashpaca shuj alli amigota shina, shuj cꞌuyaj yayata shinami ricuni. Pai de verdad tiyashcata, siempre ñucahuan cashcatami crini. Imatapish pai munashca shina rurangapaj esforzarijpica paica ayudangallami” ninmi.

Cunanca Isabel ima tucushcata yachashun. Pai chichu cajpimi doctorcunaca huahuaca shuj discapacidadhuan huacharigrishcata huillarcacuna. Chaimi Isabelca dimastij llaquirirca. Maijancunacarin huahuata abortachunmi mandarcacuna. Isabelca: “Chai llaqui horaspica shungu nanaihuanmi huañusha nishpami yuyarcani” ninmi. Pero paica Yaya Diostami ayudahuai nishpa cutin cutin mañarca. Paipaj huahuaca doctorcuna nishca shinami shuj discapacidadhuan huacharirca. ¿Isabelpaj mañashcacunataca Diosca contestarcachu? Ari. Paica: “Ñuca huahuaca ñami 14 huatacunata charin. Paica Dios cushca bendicionmi can. Ñuca huahua discapacidadta charishpapish cushilla causajta ricushpami Yaya Dios ñuca mañashcacunata uyashcata yachani” ninmi.

Cai sumaj shimicunaca shuj salmista ima nishcatami yuyachin. Paica: “Mandaj Dioslla, mana jatun tucushcacuna mañashcataca uyanguimi. Paicuna mañashcata cushpami cushichingui” nircami (Salmo 10:17). Caita yachashpami Diosta mañanataca manataj saquina canchij.

Bibliapimi Jesús ima shina mañashcata liyi tucunchij. Shuj mañaimi ashtahuan rijsishca can. Chaitaca paita catijcunamanmi yachachirca. ¿Chai mañaimantaca imatataj yachai tucunchij?