¿Cai pacha ima hora tucurinatataj Jesusca nirca?

CAI PACHA TUCURINAMANTA JESÚS IMATA NISHCATA RICUI:

“Ima punlla, ima hora Runa Aichayuj shamunata mana yachashcamanta, chaparacuichij” (MATEO 25:13).

“Cancunaca ima punlla Runa Aichayuj shamuna cashcata mana yachashcamanta, ricuraichij, chaparaichij, mañaraichij” (MARCOS 13:33).

Gentecunaca cai pacha ima hora tucurinataca mana yachai tucuncunachu. Pero Diosca cai pachata ima punlla, ima hora tucuchinataca ñami agllashca (Mateo 24:36). Shinashpaca ¿cai pacha ñalla tucurigrishcata o manaraj tucurigrishcataca manatajchu yachai tucunchij? Yachai tucunchijmi. Jesusca cai pacha tucurinapaj imalla pasana cashcata, huaquin señalcunata atentos ricuchunmi huillarca.

SEÑALCUNA

Jesusca cai shina causai tucurinapaj imalla pasana cashcatami huillarca. Paica, ‘mama llajtaca caishuj mama llajtahuan macanacungacunami, shinallataj jatun mandajcunapurapish macanacungacunami. Yaricaicuna, chꞌican chꞌican llajtacunapi pamba chujchushpa allpa tꞌimburicunapishmi tiyanga’ nircami (Mateo 24:3, 7). Shinallataj “millai ungüicunapishmi tiyanga” nircami (Lucas 21:11). ¿Cai profeciacuna pajtaricujta ricushcanguichu?

Macanacuicuna, yaricaicuna, terremotocuna, millai ungüicuna tiyashcamantami achca gentecunaca llaquita apacuncuna. Por ejemplo, 2004 huatapica océano Indicopi jatun terremoto tiyashcamantami mama cucha yacucuna jatarirca. Chaipimi unos 225 mil gentecuna huañurca. Cutin quimsa huatacunapimi mundo enteropica unos 6.9 millones gentecuna COVID ungüimanta huañurcacuna. Jesusca, cashna shina llaquicuna tiyajta ricushpaca cai pacha ñalla tucurigrishcatami yachanguichij nircami.

TUCURI PUNLLACUNA

Bibliapica tucuri punllacuna pasashca qꞌuipa cai pacha tucurina cashcatami yachachin (2 Pedro 3:3, 4). 2 Timoteo 3:1-5-pica tucuri punllacunapica yallitaj millai gentecunami tiyanga ninmi (“Cai pacha tucurina ñaupa” nishca recuadrota ricui). Cunan punllacunapica gentecunaca yallitaj paicunallapimi yuyancuna. Millaicuna, cullquita cꞌuyajcuna, shujtajcunata llaquichijcunami can. ¿Canpish gentecuna chashna cashcata ricushcanguichu? Chashna millai gentecunata ricushpami tucuri punllacunapi causacushcata intindinchij.

¿Tucuri punllacunaca ima horataj tucuringa? Bibliapica cai punllacuna ashacamalla cana cashcatami ricuchin. Chai qꞌuipami Diosca cai Allpata llaquichijcunata tucuchinga (Apocalipsis 11:15-18; 12:12).

CAI ALLPACA ÑALLAMI SHUJ PARAÍSO TUCUNGA

Diosca cai Allpapi tiyaj millai ruraicunata tucuchingapajca ñami shuj punllata, shuj horata agllashca (Mateo 24:36). Pero Yaya Diosca “shujllapish chingarichunca mana munanchu” (2 Pedro 3:9, NWT). Chaimantami paita rijsina, paita cazuna oportunidadta ñucanchijman cun. Paica ñucanchijcuna quishpirishpa mushuj pachapi causachun, paraíso Allpapi causachunmi munan.

Diosca paipaj Gobierno mandacunpi gentecuna causachunmi munan. Chaimantami chaipi causangapaj imata rurana cashcata yachachun mundo enteropi gentecunata ayudacun. Jesusca: ‘Dios mandacun alli huillaitaca, tucui cai pachapi causajcunamanmi huillashca canga’ nircami (Mateo 24:14). Muyundij allpamanta testigo de Jehovacunaca achca millón horascunatami Diosmanta huillashpa, Bibliamanta yachachishpa gentecunata ayudarcacuna. Jesús nishca shinaca tucui cai Allpapi alli huillaicunata huillashca qꞌuipami cai pachaca tucuringa.

Ñallami cai Allpapi mandajcunaca tucuringa. Pero ñucanchijca cai pacha tucurijpica quishpirishpami Dios cusha nishca paraíso Allpapi causai tucushun. Catij yachaipimi chaipi causangapaj imata rurana cashcata ricushun.