ÑUCA CAUSAI
Jehová Dios mañashca shinami sirvircanchij
ACHCATA tamyashcamanta, jatun acapana tiyashcamantami yacucuna tandanacushpaca lodocunata, rumicunata aparca. Ñucanchijca shujtaj ladomanmi pasana carcanchij. Pero achca tamyashcamantami puentetapish yacuca apashca carca. Ñuca, ñuca cusaca ami shimita parlaj runahuanmi carcanchij. Ñucanchijca quimsandijmi mancharishca carcanchij. Caishuj ladoman caj turi ñañacunaca achca preocuparishcami carcacuna. Caishuj ladoman pasangapajca ñucanchij carrotaca shuj jatun camionpimi churarcanchij. Carrota camionpi charichingapajca ni huascacuna, fierrocuna mana tiyarcachu. Pero camionca asha ashami yacuta chꞌimbarca. Chꞌimbacui horasca carunman cashca shinami ricurirca. Pero ama sustaringapajca Jehová Diostami mañashpa catircanchij. Ña qꞌuipaca shujtaj ladomanmi chꞌimbarcanchij. 1971 huatapimi chashna tucurcanchij. Chai huatapica Taiwán llajtapimi carcanchij. Ñucanchij huiñashca lugarmantaca carupimi carcanchij. Ñucanchij causaimantami ashtahuan parlasha nini.
JEHOVÁ DIOSTAMI CꞌUYAI CALLARIRCANCHIJ
Ñuca cusa Harveyca chuscu huauquindijpurami carca. Paimi punta huauqui carca. Paipaj familiaca 80 huatacuna huashaman Midland Junction, Australia llajtapi yallitaj pobreza tiyan horasmi Jehová Diosmanta rijsishcacuna carca. Harveyca Diosta achcata cꞌuyashcamantami 14 huatacunata charishpa bautizarishca carca. Shuj cutinca paitaca tandanacuipica La Atalaya revistata liyichunmi mañashcacuna carca. Pero paica “Huambrarajmi cani mana pudishachu” nishpami cutichishca carca. Shuj turica Harveytaca Diospaj organizacionpica can imata rurai tucushcata yachashpami canta ayudachun mañangacuna. Chashna mañajpica pajtachinallami cangui nishpami consejashcarca. Chaimi Harveyca Diospaj mingashcacunata pajtachinalla cashcata cuentata curca (2 Corintios 3:5).
Ñucapish ñuca mamitapish ñuca punta ñañapish Inglaterrapimi Jehová Diosta rijsircanchij. Ñuca papitoca achca tiempo qꞌuipami Diosta rijsirca. Puntapica paica ñucanchijtaca Diosta ama sirvichunmi jarcaicunata churarca. Ñuca 9 huatacunata charishpa bautizaricujpica ñuca papitoca mana de acuerdochu carca. Ñucaca precursora cangapaj, misionera tucungapajmi esforzarisha nircani. Ñuca yayaca can 21 huatacunata charijpimi precursora tucuchun saquisha nircami. Ñucaca mana achca tiempota shuyasha nircanichu. Pero ñuca 16 huatacunata charijpica papitoca ñuca punta ñañahuan Australia llajtapi causanaman richunmi saquirca. 18 huatata charishpaca ñami precursora tucurcani.
1951 huatapi cazarashca foto.
Australia llajtapica ñuca cusa Harveytami rijsircani. Ishquindijmi misioneros canata munarcanchij. 1951 huatapimi cazararcanchij. Ishqui huatacunata precursores cashca qꞌuipami ñuca cusataca superintendente de circuito cachun invitarcacuna. Australiapica congregacioncunata visitangapajca chaquishca lugarcunata, carucunatami viajana carcanchij.
MISIONEROSMI TUCURCANCHIJ
1955 huatapimi Estadio de los Yankeespi Escuela de Galaadmanta graduarircanchij.
1954 huatapimi clase número 25 Escuela de Galaadman invitarcacuna. Ñucanchij munashca metataca ñallami pajtachigrircanchij. Nueva York llajtamanca barcopimi chayarcanchij. Escuela de Galaadpica Bibliatami achcata estudiarcanchij. Shinallataj Galaadpica español shimitami yachana carcanchij. Pero Harveypajca “r” letrata españolpi parlanaca sinchimi carca.
Escuela de Galaadpi yachachijcunaca maijancuna Japón llajtapi sirvisha nishpaca japonés shimita yachangapajmi anotari tucunguichij nircami. Pero ñucanchijca mana anotarircanchijchu. Diospaj organizacionmi ñucanchij maipi sirvinataca decidina can nishpami yuyarcanchij. Chai shimita yachangapaj mana anotarishcata ricushpami turi Albert Schroederca alli yuyarichij, anotarichijlla nirca. Ñucanchij dudacujta ricushpami turi Albertca: “Cancunataca ñucapish, shujtaj yachachijcunapish japonés shimita yachachunca ñami anotashcanchij” nirca. Harveypajca cai shimita yachanaca facilmi ricurirca.
1955 huatapimi Japón llajtapi sirvinaman rircanchij. Harveyca 26 huatacunata, ñucaca 24 huatacunatami charircanchij. Chai huatacunapica Japón llajtapica 500 publicadorcunallami tiyarca. Chaipica Kobe nishca ciudadpi sirvichunmi cacharcacuna. Chai llajtapica chuscu huatacunatami sirvircanchij. Qꞌuipaca ñuca cusataca superintendente de circuito cachunmi invitarca. Nagoya cꞌuchullapi saquirij congregacioncunata visitana cashcamantami cushilla sintirircanchij. Japón llajtapi turi ñañacunahuan Diosta sirvinata, chai llajtapi tiyaj micunacunata, sumaj lugarcunataca achcatami munarcanchij. Pero qꞌuipaca Jehová Diosta shujtaj lugarpi sirvina oportunidadtami charigrircanchij.
HUAQUIN JARCAICUNATAMI CHARIRCANCHIJ
1957 huatapimi Harvey, ñucapish shujtaj misioneracunahuan Kobe (Japón) llajtapi canchij.
Quimsa huatacunata congregacioncunata visitashca qꞌuipaca sucursalmanta turicunaca Taiwán llajtapi amis nishca indigenacunaman predicanaman richunmi mañarcacuna. Amis nishca huaquin turi ñañacunaca apostatacunami tucushcarcacuna. Chaimi japonés shimita parlaj shuj turi, amis turi ñañacunata ayudachun minishtircacuna.a Japón llajtapi causanata munashcamantami Taiwán llajtapi sirvinaman rinaca sinchi carca. Pero Harveyca Dios mingashcacunata pajtachinalla cashcataca allimi yacharca. Chaimantami Taiwán llajtapi sirvinamanca rircanchijlla.
Noviembre de 1962 huatapimi Taiwán llajtapi sirvinaman rircanchij. Chai llajtapica 2.271 publicadorcunami tiyashcarcacuna. Achcacunaca amis nishca indigenacunami carca. Chaimi chino shimita yachanata minishtircanchij. Chino shimita yachangapajca shuj librota, shuj yachachijtami charircanchij. Cai yachachijca inglés shimitaca mana parlajchu carca. Chashnapish chino shimitami yachai tucurcanchij.
Taiwán llajtaman chayashca qꞌuipallami ñuca cusataca sucursalmanta chai tucui llajtapi predicacionta pushachun agllarcacuna. Chaipi saquirij sucursal uchilla cashcamantami Harveyca chaipi trabajangapaj, amis turi ñañacunahuanpish quillapi huaquin semanacunata huillangapaj tiempota charirca. Shinallataj jatun tandanacuicunapipish conferenciacunatami cuj carca. Harvey japonés shimipi conferenciacunata cushca cajpica amis turi ñañacunaca intindinmanmi carca. Pero gobiernoca chino shimillapi tandanacuicunata rurachunmi saquij carca. Chaimantami Harveyca chino shimita mana alli yachashpapish chino shimipi conferenciacunata cuj carca. Cutin shuj turimi ami shimimanca traducij carca.
Taiwán llajtapi jatun tandanacuicunata rurangapajca shuj permisotami charina carca. Pero cai permisota llujchinaca sinchimi carca. Policiacunaca permisotaca mana utca cujcunachu carca. Huaquinpica jatun tandanacuipaj ashalla punllacuna illajpipish manaraj permisota cujcunachu carca. Chaimi Harveyca comisaría ucupi policiacuna permisota cungacama shuyaj carca. Policiacunapajca shuj extranjerota comisaría ucupi shuyachinaca shuj pingaimi carca. Chaimantami permisotaca rato cujcuna carca.
PUNTA CUTINMI SHUJ URCUMAN LLUJSHIRCANI
Huillanaman ringapajmi Taiwán llajtapica shuj yacuta chꞌimbanacunchij.
Turi ñañacunahuan predicashpaca shayaj urcucunata, yacucunata chꞌimbashpami shuj horata o yalli horacunata purij carcanchij. Ñucaca punta cutin urcuman ringapajca utca jatarishpa, micushpami ña 5:30 de la mañanataca turi ñañacunahuan busta japircani. Jatun yacuta pasashpami urcuman llujshircanchij. Chai urcuca dimastij shayaj quinrimi cashcarca. Chaimi ñucata ñaupashpa rij turipaj chaquica casi ñuca frentepi saquirirca.
Chai tutamantapica Harveyca turi ñañacunahuanmi predicacushca carca. Cutin ñucaca ñucallami japonés shimita parlaj gentecunaman shujtaj lugarpi predicanaman rircani. Achca horascunata mana micushca cashcamantami casi la una de la tardepajca fuerzasta mana charircani. Cutin qꞌuipaca ñuca cusahuanmi tuparcani. Pero turi ñañacunaca ñami rishcacuna carca. Harvey huaquin revistacunata gentecunaman cushcamantami paicunaca quimsa luluncunata combidashcarcacuna. Chaimi Harveyca chai chahua luluntaca jutcushpa chupashpa micunata yachachirca. Chashna micunata mana munashpapish shujtami micurcani. Yaricaihuan ama desmayangapajmi caishujtapish micurcani. Ñuca desmayajpica Harveyca mana apari tucunmanchu carca.
SINCHI RICURIJPIPISH ARMARCANILLAMI
Jatun tandanacuicuna tiyai punllacunapica shuj turipaj huasipimi saquirircanchij. Chai huasica tandanacuna huasi cꞌuchullapimi saquirirca. Amis culturapica armanami importante can. Chaimi superintendentepaj huarmica ñucanchij armachun shuj baldepica chiri yacuta caishuj baldepica cunaj yacuta y shuj jarrata churashca carca. Harveyca ocupado cashcamantami ñucataraj armachun cacharca. Pero cai ñañaca huasi canllamanmi chai balde yacucunataca churashcarca. Chai chꞌimbapuraipica turi ñañacunami jatun tandanacuipaj allichicurcacuna. Chaimi chai ñañamanca shuj telata taparingapaj mañarcani. Pero cai ñañaca shuj plástico transparentetami curca. Chaimi huasi siquipi armanaman risha nircani. Pero chaipi gansocuna tiyashcamantami chꞌupinata manchashpa mana rircani. Shinapish turi ñañacunaca ocupadosmi can, mana ricungachu. Mana armashpaca paicunapaj culturata mana respetashcatami ricuchisha nishpami armarcanilla.
Amis culturapaj ropahuanmi canchij.
AMI SHIMIPIMI PUNTA CUTIN PUBLICACIONCUNA LLUJSHIRCA
Harveyca ami shimita parlaj turi ñañacuna liyinata mana yachashcamanta, publicacioncunata paicunapaj shimipi mana charishcamanta sinchi feta mana charishcatami cuentata curca. Chai tiempopajca ami shimipimi quillcai callarishcacuna carca. Chaimi turi ñañacuna paicunapaj propio shimipi liyinata yachachun ayudarcanchij. Sinchi cajpipish turi ñañacunaca paicunallatajmi estudiai callarircacuna 1966 huatapimi ñucanchijca publicacioncunataca ami shimipi llujchi callarircanchij. 1968 huatapajcarin Atalaya revistatami llujshircanchij.
Shinapish gobiernoca publicacioncuna chino shimillapi llujshichunmi munaj carca. Chaimantami Atalaya revistataca chꞌican laya rurai callarircanchij. Por ejemplo, La Atalaya revistapica chino mandarín shimihuan, ami shimihuanmi quillcashpa llujchircanchij. Chashnami chino shimipi gentecunaman yachachicushca shina ricurirca. Chai punllamanta huichimanmi Diospaj organizacionca ami shimita parlaj gentecuna Bibliamanta yachachunca achca publicacioncunata llujchishpa caticuncuna (Hechos 10:34, 35).
SINCHI PRUEBACUNAMI TIYARCA
Achca huatacunatami maijan ami shimita parlaj turi ñañacunaca Dios mandashca shinaca mana causarcacuna. Maijancunaca Biblia yachachishcacunata mana alli intindishcamantami machashpa, huainayashpa, tabacota fumashpa, nuez de betel nishcatapish cashtushpa causajcuna carca. Harveyca congregacioncunata visitashpami cai cosascunata rurana mana alli cashcata yachachirca. Cai turi ñañacunata visitacushpami puenteta yacu apashca experienciata charircanchij.
Humilde turi ñañacunaca cambiocunatami rurarcacuna. Pero shujtajcunaca mana cambiocunata rurarcacunachu. Chaimantami Taiwán llajtapica 20 huatacunapica 2.450 publicadorcunamantaca 900 publicadorcunalla tucurca. Chaimi llaquilla sintirircanchij. Pero Jehová Dios ñucanchijta bendiciachunca congregacionpi tucui chuya canatami yacharcanchij (2 Corintios 7:1). Tiempohuanca turi ñañacunaca mana alli ruraicunatami saquircacuna. Cuna punllacunaca Jehová Dios bendiciashcamantami 11.000 publicadorcuna Taiwán llajtapica tiyan.
1980 huatamantami amis turi ñañacunaca espiritualmente sinchiyashpa catircacuna. Chaimantami Harveyca chino shimita parlaj gentecunata, ashtahuan ayudai tucurca. Huaquin ñañacunapaj cusacunata testigo de Jehová tucuchun ayudashpami cushilla sintirirca. Shuj ñañapaj cusa, punta cutin Jehovata mañajpica ñuca cusaca cushillami sintirirca. Ñucapish huaquin gentecunata Jehová Diosta rijsichun ayudashcamantami cushilla sintirini. Ñucaca shuj huarmimanmi Bibliata yachachircani. Paipaj churi, paipaj ushushi Taiwán sucursalpi Jehová Diosta ñucahuan sirvijpica cushillami sintirircani.
ÑUCA CUSAMI HUAÑURCA
59 huatacunata cazarashca qꞌuipami ñuca cꞌuyashca cusaca cáncer ungüihuan 1 de enero de 2010-pi huañurca. Ñuca cusaca casi 60 huatacunatami Jehová Diostaca tiempo completota sirvirca. Pai huañushcamantaca llaquillami sintirini. Pero gentecunata Jehová Diosta rijsichun Taiwán llajtapi, Japón llajtapi ñuca cusahuan ayudashcamantami cushilla sintirini. Sinchi cajpipish japonés, chino shimitami parlanata yacharcanchij. Ñuca cusacarin chai ishqui shimicunatami escribinata yacharca.
Harvey huañushca huaquin huatacuna qꞌuipaca Cuerpo Gobernante turicunaca mayorlla tucushcamantami Australia llajtaman cutin tigrachun decidircacuna. Callaripica Taiwán llajtamantaca mana risha ninichu nishpami yuyarcani. Pero Harveyca Diospaj organizacionta siempre cazunatami yachachirca. Chaimi tigrarcani. Tiempohuanca tigrana valishca cashcatami intindircani.
Japonés shimita, chino shimita parlajcuna Betelman shamujpica paicunahuan parlanatami achcata munani.
Cunanca Australasia sucursalpimi sirvini. Fin de semanacunaca shuj congregacionhuanmi predicani. Betelman chino shimita parlaj, japonés shimita parlaj shamujpica paicunata Betelta rijsichishpami ayudani. Chashna paicunata ayudanataca achcatami munani. Huañushcacuna causarina punlla chayachunpishmi achcata munani. Ñuca cusaca Jehová Dios munashca shinami siempre paita sirvirca. Chaimantami Yayitu Diosca ñuca cusataca yuyarishpa causachinga (Juan 5:28, 29).
a Cunan punllacunapi Taiwán llajtapi chino shimita parlajpipish ñaupa punllacunaca achca huatacunatami japonés shimita parlajcuna carca. Chaimi Taiwán llajtapi causaj achca indigenacunaca japonés shimita parlajcuna carca.