Ñuca allquitucunamanmi galletitacunata curcacuna
ESTADOS UNIDOS, Oregón llajtamanta Nick shuti runaca cashna nishpami parlarca. 2014 huata callaripica ñuca ishqui allquitucunahuanmi ciudadpi paseanaman rij carcani. Chaipica Testigocuna carritocunahuan alajata churashca huillacujtami ricurcani. Shinallataj cushilla ñahuihuan shujtajcunatapish saludaj cashcatami ricurcani.
Testigocunaca ñuca allquitucunatapishmi alli tratajcuna carca. Shuj punllaca Elaine shuti Testigoca ñuca allquitucunamanmi galletitacunata cararca. Chai punllamanta huichimanmi ñuca allquitucunaca chai esquinapi galletacunata japingapajca volashpa rijcuna carca.
Huaquin quillacunatami ñuca allquitucunaca galletacunata micushpa saquirijcuna carca. Cutin ñucaca Testigocunahuanmi parlashpa saquirij carcani. Pero chashnapish Testigocunahuanca mana tanto parlanata munarcanichu. Ñucaca ñami 70 yalli huatacunata charircani. Testigocuna imata crishcatapish mana yacharcanichu. Shujtaj religioncuna mana alli cajta ricushpacarin ñucallatajmi Bibliamanta yachanata decidircani.
Chai tiempopajca shujtaj Testigocunatapishmi carritocunahuan huillacujta rijsircani. Paicunaca alli trataj, ñuca tapushcacunatapish Bibliahuan cutichijmi carca. Chaimi ñucaca paicunapi confiai callarircani.
Shuj punllaca Elaineca: “¿Animalitocunaca Dios cushca relagochu can?” nishpami tapurca. Chaimi ñucaca “ari” nircani. Elaineca Isaías 11:6-manta 9-camami liyirca. Chai punllamantami Bibliamanta estudianata munarcani. Pero carritomanta ima publicacioncunataca manaraj apasha nircanichu.
Catij punllacunapica ñucaca Elainehuan, paipaj cusa Brenthuanmi Bibliapi tiyaj valishca yuyaicunamanta parlanacui callarircani. Paicunaca Jesusta ima shina catinata yachachunmi Mateomanta Hechoscama liyichun animarcacuna. Ñucaca liyircanimi. Qꞌuipacarin huauqui Brenthuan, paipaj huarmi Elainehuanmi 2016 huatapi Bibliamanta yachai callarircani.
Cada semana Bibliamanta yachanata, tandanacuicunaman rinataca achcatami munarcani. Biblia ima yachachishcata intindishpacarin cushillami sintirircani. Shuj huata huashaca Jehová Diosman mingarishpami bautizarircani. Cunanca 79 huatacunatami charini. Alli religionpi cashcamanta, huauqui panicunahuan muyundij Allpapi Jehová Diosta tandalla sirvicushcamantami cushilla sintirini.