2 | Bibliapi tiyaj yuyaicunami cushichin

BIBLIAPICA CASHNAMI NIN: “Ñaupa quillcachishcacunapi quillcashca shimicunaca ñucanchijta yachachingapaj quillcachishcami can. Ñucanchijca Quillcachishcapi nishca shimicuna cushichishcamanta, ahuantachun ayudashcamantami shamuj punllacunapi Dios cusha nishcacunata shuyacunchij” (ROMANOS 15:4).

¿Caica imatataj nisha nin?

Bibliaca desanimachij yuyaicunata ama charichunmi ayudan. Chaipi tiyaj cushichij yuyaicunapishmi ñaupajman catichun ayudan. Shinallataj desanimachij yuyaicunapish qꞌuipa punllapi chingarina cashcatami huillan.

¿Bibliapaj consejocunaca ima shinataj ayudan?

Huaquinpica llaquillami sintirinchij. Pero ansiedad ungüita, depresión ungüita charijcunaca punllantami ashtahuan sustarishca, dimastij llaquilla sintirincuna. Shinapish ¿Bibliapaj consejocunaca ima shinataj paicunata ayudan?

Bibliaca cushichij yuyaicunatami charin. Chaita liyishpaca desanimachij yuyaicunatami saquishun (Filipenses 4:8). Chai yuyaicunata yuyarishpami mana tanto sustarishpa, tranquilo causashun (Salmo 94:18, 19).
Bibliapaj consejocunaca ñucanchij imapaj mana valishca shina ama sintirichunmi ayudan (Lucas 12:6, 7).
Bibliapica Diosca ñucanchijta manataj saquij cashcatami parlan. Shinallataj paica ñucanchij ima shina sintirishcatapish alli yachashcatami huillan (Salmo 34:18; 1 Juan 3:19, 20).
Bibliapica ima llaquicunatapish shamuj punllacunapi ña mana yuyarina cashcatami prometin (Isaías 65:17; Apocalipsis 21:4). Yallitaj sustarishca cashpapish caita yachashcamantami ñaupajman catingapaj fuerzata japinchij.

¿Jessicataca Bibliaca ima shinataj ayudan?

Depresión ungüimi ñucata llaquichin

“25 huatacunata charishpami ñucaca yallitaj sustarishca, dimastij llaquilla sintirircani. Chaimi doctorca depresión ungüita charishcata huillarca. Ñaupa imalla pasashcacunapimi rato yuyai callarircanilla. Chaicunapi yuyanata saquinaca sinchimi carca. Doctorcunapish ñaupaman ima tucushcacunata yuyarishcamantami desanimachij yuyaicunallata chari callarishcata intindichircacuna. Chaimi depresión ungüi japirca. Pero cai ungüipajmi jambicunata ubyana carcani. Shinallataj shuj doctorca desanimachij yuyaicunata ama charingapaj imata ruranatami intindichirca”.

Bibliami ñucata ayudan

“Depresión ungüita charishcamantami maipica yallitaj sustarishca sintirircani. Dormipish mana japircachu. Tutacunaca yallitaj desanimachij yuyaicunallatami charircani. Pero Salmo 94:19-pi nishca shinaca yallitaj yuyaicunahuan ñucanchij yuyaipi cajpica Yaya Diosmi cushichin. Chaimi ñuca cama ladopica shuj Bibliata, animachij versocunatapish shuj cuadernopi charircani. Mana dormi tucushpaca animachij versocunatami liyij carcani. Chashnami tranquila, cushilla sintirircani.

Bibliapica Dios mana yuyashca shina ñucanchijpish ama yuyachunmi animan. Por ejemplo, ñaupaca, ‘imapaj mana sirvinichu, ñucataca pipish mana cꞌuyangachu’ nishpami yuyaj carcani. Pero Bibliata liyishpami chashna mana yuyana cashcata alli intindircani. Chaimi Diosca llaquij, cꞌuyaj Yaya shina tucuicunamanta preocuparij Dios cashcata intindircani. Tiempohuanca ñucallatajmi ñuca yuyaicunata controlai callarircani. Chaimi Dios munashca shinallataj yuyai callarircani. Yaya Dios ayudashcamantami cunanca imapaj mana valij shinaca ña mana sintirini.

Ñallami yallitaj sustarishca cana ungüi, depresión ungüipish tucuringa. Chaimi desanimachij yuyaicunataca ña mana charishun. Chai punllacuna chayachunmi cushicuihuan shuyacuni. Shamuj punllapica depresión ungüita ña mana charinata yachashpami cai ungüihuan chꞌimbapurangapaj fuerzasta japini”.