¿Bibliapica Yayitu Diosmantaca imatataj yachanchij?

1. ¿Imamantataj canca Yayitu Dios cushca consejocunataca valorangui?

JEHOVÁ DIOSTACA paipaj Shimita ñucanchijman convidashcamantami dimastij agradicinchij. Chashnami ima problemacunata charishpapish, Yayitu Diospaj consejocunata catishpaca tucui laya problemacunata allichi tucunchij. Shamuj punllacunapajcarin shuj alaja esperanzatami charinchij. Jehová Dios Bibliapi pai ima shina cashcata, ima cualidadcunata charishcata yachashpacarin paipajman cꞌuchuyanata, paipaj amigocuna canatami munanchij (Salmo 25:14).

2. ¿Yayitu Jehová Diosca gentecuna paimanta yachaj chayachunca imallatataj rurashca?

² Jehová Diosca tucui gentecuna paita rijsichunmi munan. Chaimantami ñaupa punllacunapica muscuchishpa, muscuipi shina ricuchishpa, hasta angelcunata cachashpa paimanta huillachirca (Números 12:6; Hechos 10:3, 4). Si caicunata Yayitu Dios mana quillcachishca cajpica, ñucanchijca imata mana yachai tucunchijmanchu. Shinapish Yayitu Diosca ñucanchijcuna paimanta yachaj chayachunmi, huaquin cꞌaricunata pai ima nisha nishcata shuj libropi quillcachirca (Jeremías 30:2). Salmo 18:30-pi nishca shinaca “mandaj Diospaj ñanpica, ima panda mana tiyanchu”. Chaimantami Yayitu Diospaj Quillcachishcacuna ñucanchijta ayudanapi seguros canchij.

3. ¿Paipaj Shimi cunancama tiyachunca Diosca imatataj rurashca?

³ (Isaías 40:8-ta liyipai). Bibliataca rato dañarijlla materialcunapimi quillcarcacuna. Chai rato dañarijlla materialcunapi rurashca cashcamantami, chai ñaupa quillcashcacunaca cunan punllacunapica ña mana tiyan. Shinapish cunancamami Bibliapi tiyaj consejocunaca Diosta sirvijcunata ayudacushca. Pero ¿caica ima shinataj pajtarishca? Jehová Diosmi chai ñaupa Quillcachishcacunamantaca copiacunata rurachirca. Chai copiajcunaca juchayujcuna cashpapish tucuitami con cuidado rurarcacuna. Chaimantami shuj yachaj runaca Ñaupa Testamentomanta parlashpaca: “Ñaupa Quillcachishcacunamantaca cai copiashcacunami exacto can” nircami. Bibliataca juchayuj runacuna quillcashca cajpipish, dañarijlla materialcunapi achca huatacuna huasha quillcashca cajpipish cunancamami Bibliaca Yayitu Diospaj yuyaicunata yachachin.

4. ¿Cai yachaipica imacunallatataj yachashun?

⁴ Bibliaca ñucanchijpajca dimastij valishca regalomi can. Chaimantami Santiago 1:17-pica “tucui alli regalocunapish, ima ashtahuan allicunapish” Yayitu Jehová Diosmanta shamushcata parlan. Maijanpish ñucanchij minishtishca regalota cushpaca ñucanchijta alli rijsishcatami ricuchin. Dios cushca Bibliapish ñucanchij minishtishca regalo shinami can. Bibliata alli estudiashpaca Yayitu Diosmantami achcata yachanchij. Shinallataj pai ñucanchijta alli rijsishcata, ima minishtishcatapish alli yachashcatami intindinchij. Cai yachaipica Yayitu Dios alli yachaj, cashcata ruraj, cꞌuyaj cashcatami yachashun. Cai cualidadcunataca Bibliapimi tarinchij. Cunanca Yayitu Dios yachaisapa cashcata ricushpa callarishun.

BIBLIAPICA YAYITU DIOS ALLI YACHAJ CASHCATAMI HUILLAN

5. ¿Biblia Yayitu Diospaj yachaita charishcataca ima shinataj yachashcangui?

⁵ Jehová Diosca ñucanchijcuna paipaj consejocunata minishtishcataca allimi yachan. Chaimantami Bibliata ñucanchijman convidashca. Paipaj Shimicunaca alli yachaitami charin. Chai alli consejocunaca tucui gentecunapaj causaitami cambiai tucun. Bibliapaj punta librocunata Moisés quillcacushpaca israelitacunamanca: “Cai mandashcacunaca mana yangachu. Ashtahuanpish cancunaman causaita cujmi” nircami (Deuteronomio 32:47). Bibliapi tiyaj consejocunata cazujcunaca cushilla, allimi causarcacuna (Salmo 1:2, 3). Achca tiempo huasha quillcashca cashpapish Bibliaca cunancamami gentecunata ayudashca. Por ejemplo, jw.org paginapi yaicushpa, chꞌican temacuna, “Bibliata yachashpami cambiashcacuna” nishca parteman yaicui. Chaipica achca gentecunapaj causaitami taringui. Paicunaca Bibliapaj consejocunata catishpami paicunapaj causaita cambiarcacuna (1 Tesalonicenses 2:13).

6. ¿Biblia shujtaj librocuna laya mana cashcataca imamantataj cringui?

⁶ Bibliataca Yayitu Diosmi rurashca. Paica tucui poderta charij, huiñaita causaj, alli yachajmi can. Chaimantami Bibliaca shujtaj librocuna layaca mana can. Huaquincunaca chꞌican chꞌican librocunatami quillcashcacuna. Chai librocunata rurajcuna huañushca cajpipish achcacunaca chai librocunatami liyishpa catincuna. Shinapish chai librocunapi tiyaj consejocunaca cunan punllacunapica ña manachari sirvincuna. Pero Yayitu Diospaj consejocunaca cunancamami tucui laya gentecunata ayudashpa caticushca. Chaimantami Bibliata liyina canchij, Bibliapaj consejocunapipish cutin cutinmi yuyana canchij. Chaita rurajpica Yayitu Diosllatajmi paipaj espíritu santohuan chai consejocunata pajtachichun ayudanga (Salmo 119:27; Malaquías 3:16; Hebreos 4:12). Yuyari, Yayitu Diosca shungumantami canta ayudasha nin. ¿Caita yachashpaca Bibliata tucui punllacuna liyina munaita charinguichu?

7. ¿Diospaj pueblo tandalla cachunca Bibliapaj consejocunaca ima shinataj ayudashca?

⁷ Yayitu Diosca paipaj pueblo tandalla cachunmi ñaupa tiempomanta ayudashca. Caica Yayitu Dios alli yachaj cashcatami ricuchin. Por ejemplo, israelitacunaca Yayitu Dios cusha nishca allpaman yaicushpaca chꞌican chꞌican lugarcunapimi saquirircacuna. Paicunamanta huaquincunaca pescadocunatami japijcuna tucurca. Caishujcunaca animalcunata cuidajcunami tucurca. Cutin shujtajcunaca allpacunapi tarpunatami yacharcacuna. Carupi causashcamantacarin tal vez paicunapuraca ña cungarishcangacunami. Pero Jehová Diosca tucuicuna paipaj Shimita uyachun, paipaj Shimimanta ashtahuan yachachunmi Jerusalenpi tandachirca (Deuteronomio 31:10-13; Nehemías 8:2, 8, 18). Shuj israelitaca ña Jerusalenman chayashpa, chaipi achca millón israelitacuna Yayitu Diosta adorangapaj chayashcata ricushpaca ¿ima shinashi sintirishcanga? Apostolcuna causan punllacunapipish Diosta sirvijcunaca chꞌican chꞌican costumbrecunata charijcuna, ashalla cullquita charijcuna o achca cullquita charijcuna, chꞌican chꞌican shimita parlajcunami carca. Chashna cashpapish Yayitu Diospaj Shimita cꞌuyashcamantami tandalla Jehová Diostaca sirvi tucurcacuna. Achca gentecunapish huauqui panicunahuan tandanacushcamanta, paicuna yachachichun saquishcamantami Yayitu Diospaj Shimitaca yachai tucurcacuna (Hechos 2:42; 8:30, 31).

8. ¿Cunan punllacunapica Yayitu Diosca paipaj pueblo tandalla cachunca ima shinataj paipaj Shimihuan ayudan?

⁸ Cunan punllacunapipish Diosta sirvijcunaca cada semanami tandanacuicunaman rinchij, jatun tandanacuicunatapishmi charinchij. Chaipica Bibliatami liyinchij, Bibliapaj consejocunatapishmi alli estudianchij. Yayitu Diosca chashna Bibliahuan yachachishpami paita sirvijcuna tandalla paita sirvichun ayudashca (Sofonías 3:9).

9. ¿Bibliapaj nishcacunata intindingapajca ima cualidadta charinataj minishtirin? (Lucas 10:21).

⁹ Bibliapi tiyaj achca yachaicunataca humilde gentecunalla intindi tucuchunmi Jehová Diosca quillcachirca. Chashnami paica alli yachaj cashcata ricuchirca (Lucas 10:21-ta liyipai). Bibliataca mundo enteropimi achca gentecuna liyishcacuna. Shuj yachaj runaca Bibliamanta parlashpaca: “Cai librotami ashtahuantajca liyishcacuna. Shinallataj alli intindingacamami estudiashcacuna” nircami. Pero cai librotaca humilde gentecunallami alli intindi tucushcacuna, chaipi nishcacunatapish tucuita pajtachi tucushcacuna (2 Corintios 3:15, 16).

10. ¿Yayitu Diosca paipaj Shimihuanca ima shinataj ñucanchijta animan?

¹⁰ Yayitu Diosca paipaj Shimihuanmi alajata yachachin. Ashtahuancarin cada unota animangapajmi paipaj Shimitaca utilizan. Chashnami Yayitu Diosca alli yachaj cashcata ricuchin. Bibliata liyishpaca Yayitu Dios cada unomanta preocuparishcatami yachanchij (Isaías 30:21). Ima problemata charishpapish achca cutincunami huaquin versocunata liyishpa animota japishcanchij. Pero ¿Bibliapaj consejocunaca imamantataj cada unota ayudai tucun? ¿Chai consejocunaca imamantataj cunancama valishca can? Yayitu Dios Bibliata quillcachishcamantami Bibliapi tiyaj consejocunaca ñucanchijta ayudan (2 Timoteo 3:16, 17).

BIBLIAPICA YAYITU DIOS ALLITA RURAJ CASHCATAMI HUILLAN

11. ¿Bibliata quillcachicushpaca Jehová Diosca ima shinataj allita ruraj cashcata ricuchirca?

¹¹ Jehová Diosca cashcata rurajmi can (Deuteronomio 32:4). Paica tucuicunamanmi paita rijsina, sirvina oportunidadta cun (Hechos 10:34, 35; Romanos 2:11). Chaimantami Bibliataca gentecuna parlashca shimicunapi quillcachun rurarca. Punta 39 librocunataca casi tucuitami hebreo rimaipi quillcachirca. Chai tiempopi causaj gentecunaca chai shimitami alli intindijcuna carca. Shinallataj apostolcuna causan tiempopica achcacunaca griego shimitami parlajcuna carca. Chaimantami último 27 librocunataca griego rimaipi quillcachirca. Chashnami Jehová Diosca allita ruraj cashcata ricuchirca. Cunan punllacunapipish 8.000 millón gentecunami cai muyundij Allpapica chꞌican chꞌican shimicunata parlanchij. Shinapish tucui gentecuna paita rijsina, sirvina oportunidadta charichunca ¿Jehovaca imatataj rurashca?

12. ¿Cai tucuri punllacunapica Daniel 12:4-pi nishcacunaca ima shinataj pajtarishca?

¹² Jehová Diosca profeta Danieltaca tucuri punllacunapi achca gentecuna Bibliata alli intindina cashcatami nirca (Daniel 12:4-ta liyipai). Cai shimicunaca cunan punllacunapimi pajtaricun. Bibliatapish, Bibliamanta yachachij achca publicacioncunatapish tauca shimicunapimi traducishcacuna, imprimishcacuna. Shinapish achca traducishca Bibliacunaca dimastij caromi valin. Cutin Diospaj puebloca 240 yalli shimicunapimi tucui Bibliata o shuj partellata traducishcacuna. Tucui chai Bibliacunatami gentecunaca gratis chasqui tucuncuna. ¿Gentecuna paicunapaj propio shimipi Bibliata chasquishcamantaca ima shinataj beneficiarishcacuna? Dios tucuchina punlla manaraj shamujpimi achca gentecunaca Diospaj Gobiernomanta alli huillaicunata yachaj chayashcacuna (Mateo 24:14). Jehová Diosca cashcata ruraj cashcamantami, yallitaj achca gentecuna paipaj Shimita liyishpa paita rijsina oportunidadta charichun munan. Chaica Yayitu Dios dimastij cꞌuyaj cashcatami ricuchin.

BIBLIAPICA YAYITU DIOS CꞌUYAJ CASHCATAMI HUILLAN

13. ¿Yayitu Dios cꞌuyaj cashcataca Bibliapica ima shinataj ricuchishca? (Juan 21:25).

¹³ Bibliapica Yayitu Dios cꞌuyaj cashcatapishmi yachachin (1 Juan 4:8). Chaimantami paica Bibliapica ñucanchij minishtishca yachaicunallata quillcachirca. Por ejemplo, Bibliapica paipaj amigos cangapaj, cushilla, para siempre causangapajpish imata rurana cashcatami yachachin. Shinapish Jehová Diosca ñucanchijta cꞌuyashcamantami yallitaj achca yachaicunataca Bibliapi mana churashca (Juan 21:25-ta liyipai).

14. ¿Yayitu Jehová Diosca ñucanchijta cꞌuyashcataca ima shinataj ricuchin?

¹⁴ Jehová Diosca paipaj Bibliahuanmi ñucanchijta cꞌuyaihuan parlacuj shina can. Paica tucui ñucanchij causaita controlasha nishpaca mana manchanai leycunata Bibliapi mandanchu. Ashtahuanpish shujtajcunapaj causaicunamanta parlashpa, shamuj punllacunapi ima tucuna cashcata huillashpa, alaja consejocunata cushpami ñucanchijllataj alli decisioncunata agllachun ayudan. Chashnami Bibliapaj consejocunaca Yayitu Diosta cꞌuyachun, paita shungumanta cazuchun ayudan.

15. a) ¿Jehová Diosca ñucanchijcuna paipaj dimastaj valishca cashcataca ima shinataj ricuchishca? b) ¿Fotocunapica uchilla huahuapish, joven huauquipish, yuyajlla panipish Bibliata liyicushpaca picunallapitaj yuyacuncuna? (Génesis 39:1, 10-12; 2 Reyes 5:1-3; Lucas 2:25-38).

¹⁵ Bibliata liyishpaca ñucanchijcuna Jehová Diospaj dimastij valishca cashcatami yachashcanchij. Por ejemplo, Bibliapica achca gentecunapaj causaimantami yachashcanchij. Paicunamanta yachashpaca ñucanchijpish paicuna laya sintirishcatami ricushcanchij (Santiago 5:17). Ashtahuancarin Yayitu Dios paicunata ima shina tratashcata yachashpaca pai ñucanchijtapish cꞌuyaj, llaquij, alli intindij cashcatami cuentata cunchij (Santiago 5:11).

16. ¿Diosta sirvijcuna cutin cutin pandarijpipish Dios paicunata perdonashcamantaca imatataj yachashcanchij? (Isaías 55:7).

¹⁶ Bibliapica Yayitu Diosca ñucanchijcuna ima juchapi urmajpipish arrepintirijpica ñucanchijta perdonanatami yachachin. Chashnami mashnata cꞌuyashcata ricushcanchij. Israelitacunaca cutin cutinmi juchacunapi urmajcuna carca. Pero paicuna shungumanta arrepintirijpica Yayitu Diosca siempremi paicunata perdonaj carca (Isaías 55:7-ta liyipai). Apostolcuna causan punllacunapipish Diosta sirvijcunaca Yayitu Dios paicunatapish achcata cꞌuyashcatami yacharcacuna. Por ejemplo, Jehová Diosca apóstol Pablotaca “pi ima juchata rurajpi, pai arrepintirijpica cancunaca perdonanami canguichij, paitami cushichina canguichij” nishpami quillcachirca (2 Corintios 2:6, 7; 1 Corintios 5:1-5). Caipi ricushca shinaca Yayitu Diosca pi juchapi urmajpipish mana rato paita saquijllachu carca. Ashtahuancarin cꞌuyaihuan corregishpami paipajman tigrachun ayudaj carca. Cunan punllacunapipish Jehová Diosca pi juchapi urmajpi, shungumanta arrepintirijpica paita perdonanatami yachachishca (Santiago 4:8-10).

BIBLIACA SHUJ VALISHCA REGALOMI CAN

17. ¿Bibliaca imamantataj ñucanchijpajca shuj valishca regalo can?

¹⁷ Jehová Diosca Bibliatami ñucanchijman convidashca. Chaica shuj valishca regalomi can. Bibliapica Yayitu Dios cashcata ruraj, alli yachaj, ñucanchijta dimastij cꞌuyaj cashcatapishmi yachashcanchij. Yayitu Diosca Bibliata cushcamantami paita rijsichun, paipaj amigos tucuchun munashcata ricuchishca.

18. ¿Jehová Dios Bibliata ñucanchijman convidashcamantaca ima shinataj paita agradicishcataca ricuchinchij?

¹⁸ Yayitu Diospaj Shimitaca achcatami valorana canchij. Chaica tucuimanta yalli shuj alli regalomi can (Santiago 1:17). Chaimantami ñucanchijcunaca Yayitu Diosta mañashca huasha Bibliata liyina canchij, ima liyishcapipish cutin cutinmi yuyana canchij. Chaita rurashpaca Yayitu Diosta agradicishcatami ricuchishun. Jehová Diosca caita rurangapaj ñucanchij esforzarijpica ñucanchijtami bendicianga. Ashtahuancarin paipaj alli yachaitapishmi charishun (Proverbios 2:5).