Jarcaicuna tiyajpipish Diostami sirvishpa catishcacuna

Ñuca amigopish religioso cashcataca mana yuyarcanichu. Chaimantami dimastij asircani. Paitaca: “¿Canca Bibliamantaca imatataj yachanguiyari?” nishpami tapurcani. Paica imata mana nishpami qꞌuipallataca: “Ñuca mamami testigo de Jehová can. Paimi Bibliamantaca ashata yachachirca” nishpa cutichirca. Chaimi ñucapish ashtahuan yachanata munashpa “Bibliamanta parlashpa catipailla” nircani.

Casi tucui tutami parlarcanchij. Ñuca amigoca, “Bibliapica cai mundota Diablo mandacushcatami huillan” nishpami yachachirca (Juan 14:30). Caita yachanaca tal vez cambajca mana novedoso ricuringachu. Pero ñucapajca dimastij valishcami carca. Ñucaca shuj alli, justo Dios cai Allpata mandacushcatami uyashcarcani. Pero ima ricushcahuanca mana crina layami carca. Ñucaca 26 huatacunallata charishpapish mana alli solotami ricushcarcani. Chaimantami preocupado purircani.

Ñuca yayaca Estados Unidos ejercitopimi avioncunata manejashpa trabajaj carca. Ejercitopi cajcunaca bomba nuclearcunahuan alli allichirishcami carcacuna. Chaita yachashcamantami ima horapish shuj guerra nuclear tiyagrishcata intindircani. Vietnam llajtapi guerra tiyashcamantami ñucanchijtapish afectarca. Ñucaca California llajtapimi universidadpi carcani. Chaipi caj estudiantecunahuanmi protestashpa purircanchij. Chaipimi policiacunaca ñucanchijtaca caspicunahuan, gascunahuan catijcuna carca. Ñucanchijcunaca gasmanta mana alli ricui tucushpa, samaitapish mana aisai tucushpami miticushpa rij carcanchij. Chai punllacunaca dimastij sinchimi carca. Achca politicocunatapish huañuchishpa, parocunata rurashpa, protestashpami gentecunapish purijcuna carca. Gentecunaca chꞌican chꞌican yuyaitami charircacuna. Chaimantami ñucaca confundido carcani.

1970 huatapica Alasca llajtapimi trabajanaman rircani. Chaipica achca cullquitami japircani. Qꞌuipaca Londres, Inglaterra llajtamanmi rircani. Chaipica shuj motota randishpami maiman rinata mana yachashpapish ñanta japishpa rircanilla. Quillacuna huashaca África llajtamanmi chayashca carcani. Chai ñancunata viajacushpaca ñuca shinallataj llaquicunamanta caruyasha nij gentecunatami rijsircani.

Cai tucui llaquicunata ricushpami Bibliapi nishca shinaca Diablo cai Allpata mandacushcata yuyarircani. Shinapish ñucaca ñucanchijta ayudangapaj Yayitu Dios imata ruracushcatami yachasha nircani.

Huatacuna huashaca ñuca rurashca tapuicunatami yacharcani. Huatacuna pasajpicarin ima llaquicunata charishpapish Diosta alli sirvij huauqui panicunatami rijsircani. Paicunataca achcatami cꞌuyarcani.

IRLANDA DEL NORTE BOMBACUNATA, BALACUNATA TUJYACHIJ LLAJTA

Ñucaca Londres llajtamanmi tigrarcani. Chaipica ñuca amigopaj mamahuanmi tuparcani. Paica shuj Bibliatami convidarca. Tiempohuanca Amsterdam, Países Bajos nishcamanmi rircani. Shuj punllaca callepimi Bibliata liyicurcani. Chaita pasacuj shuj huauquimi ñucataca Bibliamanta ashtahuan yachachinata nirca. Tiempo huashaca Dublín, Irlanda llajtamanmi rircani. Qꞌuipaca testigo de Jehovacunapaj sucursalmanmi chayarcani. Chaipica achca experienciata charij huauqui Arthur Matthewstami rijsircani. Ñucaca paitaca Bibliamanta ashtahuan yachasha nishcatami huillarcani. Chaimi paica ñucata Bibliamanta yachachinata nirca.

Ima yachacushcataca achcatami munarcani. Chaimantami Bibliata liyinata, Testigocunapaj librocunata, revistacunata liyinataca mana saquisha nircani. Tandanacuicunapipish huahuacuna valishca tapuicunata cutichijta ricushpaca achcatami mancharircani. Chai tapuicunataca yachaj runacunapish mana cutichi tucuncunachu. Pero huahuacunaca millaicuna imamanta tiyashcata, Dios pi cashcata, huañushca huashapish ima tucushcatami jahualla cutichijcunalla carca. Shinallataj chai llajtapi cashca gentecunataca mana rijsircanichu. Chaimantami Testigocunalla ñuca amigocuna carca. Paicunami Yayitu Diosta cꞌuyachun, paipaj munaitapish rurachun ayudarcacuna.

1972 huatapimi bautizarircani. Shuj huata huashaca precursormi tucurcani. Irlanda del Norte, Newrypi tiyaj shuj uchilla congregacionpipishmi sirvinaman rircani. Chaipi causangapajmi urcucuna chaupipi tiyaj rumimanta rurashca shuj uchilla huasita alquilarcani. Chai cꞌuchullapimi achca vacacuna tiyashca carca. Chaimi ñuca conferenciacunata practicangapaj vacacunapaj ñaupajman rij carcani. Vacacunaca imata mana nishpapish ñucata alli uyacujcuna layami carca. Chaimi gentecunapaj ñahuita ricushpa conferenciacunata alli cungapaj ayudarca. 1974 huatapica precursor especial cachunmi ñucata agllarcacuna. Chaipimi Nigel Pitthuan sirvircanchij. Paihuanca cunancamami alli apanacushpa catinchij.

Irlanda del Norte llajtapica achca macanacuicuna, caparinacuicunami tiyarca. Huaquin gentecunapish bombacunata, balacunatami tugyachijcuna carca. Politicamanta, religionmanta mana tucuipi de acuerdo cashcamantami chashna tucui punllacuna llaquicuna tiyarca. Pero protestantescuna, catolicocunapish testigo de Jehovacuna politicapi mana chagrurishcatami alli yacharcacuna. Chaimantami ñucanchijca libremente predicashpa catircanchij. Huaquin gentecunacarin ima llaqui tiyagrishcata yachashpaca ñucanchijmanmi advirtijcuna carca.

Chashna advirtijpipish maipica casimi llaquipi urmaj carcanchij. Shuj punllaca Denis Carrigan shuti precursorhuanmi cꞌuchulla pueblopi predicanaman rircanchij. Chai pueblopica Testigocunaca mana tiyarcachu. Ashtahuanpish chaipica shuj cutinllami huillanaman rishca carcanchij. Chai puebloman chayashpaca shuj huarmica ñucanchijcuna Irlanda llajtamanta mana cashcata cuentata cushpa, Inglaterra llajtamanta soldadocuna cashcatami juchachi callarirca. Chashna juchachijpica achcatami mancharircanchij. Soldadocunahuan tupajpi, paicunahuan alli parlajpipish paicunaca ñucanchijtami huañuchi tucurcacuna. Sampipishmi disparai tucurcacuna. Denishuan busta shuyacushpaca pi mana ñucanchijhuan carcachu. Chai punllaca achca chirimi carca. Shinaca ñapishmi ñucanchijta juchachishca huarmipaj restauranteman shuj carro chayashcata ricurcanchij. Chaimi chai huarmica llujshishpa, chai carropi tiyaj ishqui runacunahuan parlashpaca ñucanchijta señalashpa pꞌiñarishca parlai callarirca. Qꞌuipaca chai ishqui runacunaca paicunapaj carropi allimantami ñucanchijpajman cꞌuchuyarcacuna. Paicunaca buspaj horariotami tapurcacuna. Bus ña chayajpica chai ishqui runacunaca choferhuanmi parlanacurcacuna. Pero paicuna ima parlashcataca mana uyai tucurcanchijchu. Buspica ñucanchijllami carcanchij. Chaimantami ñucanchijta chai pueblomanta llujchishpa llaquichigrishcata yuyarcanchij. Pero mana imata rurarcacunachu. Ña busmanta uriyashpaca chofertaca: “¿Chai ishqui runacunaca imatataj nircacuna?” nishpami tapurcani. Chaimi choferca: “Ama preocuparichijchu. Cancuna picuna cashcataca paicunamanmi intindichircani. Cancunataca pi mana llaquichingachu” nirca.

1976 huatapica Dublín llajtapimi shuj asamblea tiyarca. Chaipimi Pauline Lomax shuti precursora especialta rijsircani. Paica Inglaterra llajtamantami carca. Pero cai asambleamanmi shamushca carca. Paulineca espiritual, humilde, shuj alli huarmimi carca. Paipish, paipaj turi Raypish huambramantapachami Yayitu Diosta rijsishcacuna carca. Shuj huata huashaca Paulinehuanmi cazararcani. Shinallataj Irlanda del Norte, Ballymena llajtapimi precursores especialcuna shina sirvishpa catircanchij.

Shuj tiempopica superintendente de circuitomi carcani. Chaimantami Belfast, Londonderry nishca pueblocunaman, shujtaj peligroso lugarcunamanpish rishpa congregacioncunata visitashpa ayudarcanchij. Chai congregacioncunapi tiyaj huauqui panicunapish sinchi feta charishcatami ricurcanchij. Paicunaca Jehová Diosta sirvingapajca panda crishcacunata, shujtajcunata pꞌiñanata, shujtajcunata mana alli tratanatami saquishcacuna carca. Chaimantami Jehová Diosca paicunata cuidarca, paicunata bendiciarca.

Irlanda llajtapica 10 huatacunatami causarcani. 1981 huatapica clase 72 de Galaad nishca escuelamanmi ñucanchijta invitarcacuna. Chai escuelata tucuchishca huashaca Sierra Leona llajtapi sirvichunmi cacharcacuna.

SIERRA LEONA LLAJTAPICA POBRECUNA CASHPAPISH DIOSTAMI SIRVISHPA CATIRCACUNA

Sierra Leona llajtapica 11 misionerocunahuanmi shuj huasipi causarcanchij. Chai huasipica quimsa bañocunata, ishqui duchacunata, shuj cocinata, shuj telefonota, shuj lavadorata, shuj secadoratami charircanchij. Luzpish cada ratomi rijlla carca. Techo jahuapica achca ucuchacunami tiyarca. Huasi ucumanpish achca culebracunami satirijcuna carca.

Chai llajtapi achca pobreza tiyajpipish cushillami predicashpa catircanchij. Gentecunaca Bibliatami respetajcuna carca, ñucanchijtapishmi uyasha nircacuna. Chaimantami achcacunaca Bibliata estudiashpa bautizarircacuna. Gentecunaca ñucataca “Señor Robert” nishpami cayajcunaca carca. Cutin ñuca huarmisitataca “Señora Robert” nishpami cayajcuna carca. Pero qꞌuipaca ñucaca sucursalpimi achca tiempota trabajai callarircani. Chaimantami ña mana tanto huillanaman llujshi pudircani. Chaimi gentecunaca ñuca huarmisitataca “Señora Pauline” nishpami cayai callarircacuna. Cutin ñucataca “Señor Pauline” nishpami cayai callarircacuna. Ñuca huarmica chashna cayashcamantami achcata cushiyarirca.

Achca huauqui panicuna pobre cajpipish Jehová Diosca paicunatami cuidarca (Mateo 6:33). Por ejemplo, shuj cutinca shuj panica chai punllapi paipaj huahuacunapaj micunata randingapajllami cullquita charirca. Pero shuj huauqui malaria ungüihuan cajpica, medicamentocunata randichunmi chai panica paiman cullquita curca. Shinapish chai punllallapitajmi shuj huarmica chai panipaj huasiman rishpa paita ñajchachun pagarca. Chashna layami Jehová Diosca huauqui panicunata bendiciaj carca.

NIGERIA LLAJTAPICA SHUJ MUSHUJ CULTURATAMI YACHARCANI

Sierra Leonapica nueve huatacunatami carcanchij. Pero qꞌuipaca Nigeria Betelmanmi cacharcacuna. Chai sucursalca dimastij jatunmi carca. Ñucaca chai trabajollatatajmi rurashpa catircani. Pero ñuca huarmi Pauline shuj jatun cambiotami charirca. Paica cada quillapi 130 horascunatami predicaj carca. Alli estudiantecunatapishmi charirca. Pero chaiman chayashpaca shuj cuartopi ropitacunata allichishpami pasana carca. Chaimi paica ashata extrañarirca. Pero qꞌuipaca huauqui panicuna paipaj trabajota agradicishcata intindishpaca achcatami animarirca. Shinallataj Betelpi caj shujtaj huauqui panicunata animachingapajmi esforzarirca.

Nigeriapi tiyaj culturamantami achcata yachana carcanchij. Shuj cutinca shuj huauquica ñuca oficinapajman shamushpa Betelman cunanlla chayashca shuj panitami apamurca. Chai panita saludangapajca ñuca maquitami chutarcani. Pero chai panica vulashpami ñuca ñaupajpi cungurirca. Chaimi ñucaca achcata mancharishpa Hechos 10:25, 26 y Apocalipsis 19:10-pi ima nishcata yuyarircani. Chaipica “¿cai panitaca imatataj nishayari?” nishpami tapurircani. Pero qꞌuipaca, “cai panica Bibliapi ima nishcatami yachanga. Chaimantami Betelman invitashcanga” nirircanimi.

Mana alli sintirishpapish chai panihuanmi parlashpa catircani. Ña parlashca qꞌuipaca chai pani imata rurashcamantami investigai callarircani. Chai panica paipaj llajtapi tiyaj shuj costumbretami catishca carca. Cꞌaricunapish respetota ricuchingapajmi chashnallataj rurajcuna carca. Paicunaca chashna cungurishpapish adorashcataca mana ricuchijcunachu carca. Bibliapipish huaquin runacuna respetota ricuchingapaj chashnallataj rurajcuna cashcatami yachachin (1 Samuel 24:8). Chai panita imata mana nishcamanta, mana llaquichishcamantami contento sintirini.

Nigeria llajtapica sinchi feta charij achca huauqui panicunatami rijsircanchij. Por ejemplo, huauqui Isaiah Adagbonacaa jovenmantami Jehová Diosta rijsirca. Pero qꞌuipaca lepra ungüita charishcatami huillarcacuna. Chaimantami paitaca lepra ungüihuan cajcunapaj pushtuman cacharca. Chaipica paillami Testigo carca. Pero sinchi jarcaicunata charishpapish 30 lepra ungüihuan caj gentecunatami Testigo tucuchun ayudarca. Qꞌuipacarin shuj congregación tiyachunpishmi ayudarca.

KENIA LLAJTAPICA HUAUQUI PANICUNACA ACHCA PACIENCIATAMI CHARIRCACUNA

1996 huatapica Kenia Betelpi sirvinaman richunmi cacharcacuna. Chai llajtamanca achca huatacunatami mana tigrashca carcani. Betelpaj ladocunapica achca monocunami tiyarca. Chai monocunaca panicunapaj frutacunatami shuhuajcuna carca. Shuj punllaca shuj panica paipaj cuartopaj ventanatami pascashpa saquishcarca. Pani tigrangapajca achca monocunaca tucui ricurishca micunacunatami lobracushcacuna carca. Chaimi panica caparirishpa cuartomanta volashpa rirca. Monocunapish achcata mancharishpami ventanacunata saltashpa rircacuna.

Paulinehuanmi suajili shimita parlaj congregacionpi sirvi callarircanchij. Chaipi ashalla tiempo cajpimi estudio del librota pushachun ñucata nircacuna. Suajili nishca shimita mana tanto yachashcamantami chai tandanacuita pushangapaj informacionta alli repasaj carcani. Tapuicunata alli liyingapajpishmi alli prepararij carcani. Pero huauqui panicuna libropi caj laya mana cutichijpica paicuna imata nishcataca mana intindij carcanichu. Chaica dimastij llaquimi carca. Chashnapish huauqui panicunaca ñucata humildadhuan, pacienciahuanmi uyajcuna carca.

ESTADOS UNIDOSPI ALLI CAUSAI TIYAJPIPISH DIOSTAMI SIRVISHPA CATISHCACUNA

Kenia llajtapica shuj huatallatapish mana carcanchijchu. 1997 huatapica Nueva York, Brooklyn Betelpi sirvichunmi cacharcacuna. Chai llajtapi achca cullqui tiyashcamantami Yayitu Diosta sirvishpa catingapajca achca cuidadota charina carcanchij (Proverbios 30:8, 9). Caipi tiyaj huauqui panicunapish ashtahuan cullquita charingapajca paicunapaj tiempota, fuerzasta mana utilizancunachu. Ashtahuanpish Yayitu Diosta sirvina yuyaillami causancuna.

Cai tucui huatacunatami sinchi feta charij huauqui panicunata rijsishcanchij. Por ejemplo, huauqui panicunaca Irlanda llajtapi macanacuicuna tiyajpipish, África llajtapi pobreza tiyajpipish Yayitu Diostami sirvishpa caticuncuna. Estados Unidospi achca cullqui tiyajpipish Yayitu Diosta sirvina yuyaillami causacuncuna. Caicunata ricushpaca Jehová Diosca achcatami cushiyarishcanga.

Job 7:6-pi nishca shinaca: “Ñuca causaica, ahuaj runapaj lanzaderatapish yallimari callpacun”. Cunanca Nueva York, Warwickpi saquirij central mundialpimi trabajacunchij. Caipica cꞌuyanacuj huauqui panicunahuanmi causanchij. Ñucanchijta mandaj Jesucristota tucui shunguhuan sirvicushcamantami achcata cushiyarinchij. Ñallami paica Diosta tucui sirvijcunata bendicianga (Mateo 25:34).