Llaqui punllacunapica Diosca cantaca ayudangatajmi

1, 2. ¿Judiocunaca ñucanchij shinaca ima llaquicunallatataj aparcacuna? (“Ageo, Zacarías, Esdras causashca punllacuna” nishca recuadrota ricui).

¿SHAMUJ punllacunapi ima tucunata yuyashpaca tranquilochu sintiringui? Trabajo illaj saquirishcamantachari cambaj familiata ima shina mantininata mana yachashcamanta sustarishca cangui. Mana cashpaca cambaj llajtapi politicocuna paicunapura pꞌiñanacushcamanta o autoridadcuna Diosmanta ama huillachun jarcasha nishcamantachari sustarishca cangui. Chashna sintirishpaca Jehová Dios llaqui punllacunapi israelitacunata ima shina ayudashcatami yuyarina cangui. Chashnami llaquicunata ahuantangapaj animota japingui.

² Babiloniapi causaj judiocunaca paicuna imalla charishcacunata saquishpami Jerusalenman tigrana carcacuna. Maijancunaca Babiloniapi huacharishcamantami Jerusalentaca mana rijsircacuna. Jerusalenman chayashpaca paicunaca huaquin jarcaicunahuanmi chꞌimbapurarcacuna. Por ejemplo, Babiloniapi causashca shinaca ña mana causai tucurcacunachu. Shinallataj huaquin mandajcunapaj culpamanta, Diospaj enemigocunamantapishmi problemacunata charircacuna. Chaimantami huaquincunapajca Diospaj huasita allichishpa ayudanaca sinchi carca. Chaimi Jehová Diosca huata 520-pica paicunata animachun Ageo y Zacariasta cacharca (Ageo 1:1; Zacarías 1:1). Paicuna animajpimi israelitacunaca cutin tucui shunguhuan trabajai callarircacuna. Pero 50 huatacuna qꞌuipaca israelitacunaca cutinmi desanimarircacuna. Chaimi Babiloniapi causaj Esdrasca paicunata animangapaj Jerusalenman tigrarca. Esdrasca Diospaj mandashcacunata copiajmi carca (Esdras 7:​1, 6).

3. ¿Cai yachaipica imatataj yachashun? (Proverbios 22:19).

³ Ageopish, Zacariaspish ima tucunata huillashpami Jehová Diospi confiashpa catichun judiocunata ayudarcacuna. Ñucanchijpish paicuna nishcacunata yachashpami Jehová Dios tucuipi ayudanata seguros cashun (Proverbios 22:​19-ta liyipai). Cai yachaipica Jehová Dios Ageota, Zacariasta utilizashpa israelitacunaman imata huillashcatami yachashun. Caita yachashpami judiocuna Jerusalenman tigrashpa ima llaquicunata apashcata intindishun. Shinallataj cai yachaipica llaquicuna shamujpipish imamanta Jehová Diosta sirvina cashcatami ricushun. Ashtahuanpish cai yachaipica ima tucujpipish Jehová Diospi confiashpa catingapaj imata rurana cashcatami yachashun.

¿JUDIOCUNACA IMA JARCAICUNATATAJ CHꞌIMBAPURARCACUNA?

4, 5. ¿Judiocunaca imamantataj desanimarircacuna?

⁴ Judiocunaca Jerusalenman chayashpaca tucui shunguhuanmi Diospaj huasita cutin shayachisha nircacuna. Chaimi cimientocunata, Diospaj altarta rato rurashpa tucuchircacuna (Esdras 3:​1-3, 10). Shinapish jarcaicuna ricurijpimi rato desanimarircacuna. Paicunaca Diospaj huasita shayachina cashpapish paicunapaj propio huasicunatapishmi shayachina carcacuna. Shinallataj paicunapaj familiacunaman carangapajmi allpapi trabajana carcacuna (Esdras 2:​68, 70). Ashtahuancarin paicunapaj enemigocunaca Diospaj huasita ama shayachishpa catichunmi jarcaicunata churarcacuna (Esdras 4:​1-5).

⁵ Shinallataj judiocunaca mandajcunapaj culpamanta, cullquita japina sinchi cashcamantami llaquicunata charircacuna. Chai punllacunapica persacunami Israelta mandacurcacuna. 530 huatapi mandaj Ciro huañujpica Cambises mandajmi paipaj randica mandai callarirca. Paica Egipto llajtatapish mandasha nishpami paipaj soldadocunandij paicunahuan macanacunaman rirca. Egiptoman ricushpaca soldadocunaca israelitacunatami yacuta, micunata, maipi samarinata cuchun obligashcangacuna. Chaimi Israelpica ashtahuan llaquicuna tiyashcanga. Cutin Darío primero mandai callarijpica maijan gentecunaca paitaca mana cazusha nircacunachu. Chaimi Israelpica ashtahuan llaquicuna tiyashcanga. Jerusalenman tigraj judiocunaca “¿ñucanchij familiacunataca ima shinataj mantinishun?” nishpami achcata sustarishcangacuna. Chaimantami maijancunaca “cai sinchi punllacunapi Diospaj huasita allichishpa catinaca manachari alli canga” nishpa yuyai callarircacuna (Ageo 1:2).

6. a) ¿Judiocunaca ima jarcaihuantaj chꞌimbapurarcacuna? b) ¿Zacariasca judiocunataca ima shinataj animarca? (Zacarías 4:​6, 7).

⁶ Zacarías 4:​6, 7-ta liyipai. Shinallataj maijancunaca israelitacuna Diospajta ama rurashpa catichunmi jarcasha nircacuna. Chaimi 522 huatapica Diospaj huasita ama shayachishpa catichun shuj leyta llujchichircacuna. Pero Zacariasca, ‘Diospaj huasita shayachishpa catichunca Jehová Diosmi espíritu santota cushpa ayudanga’ nishpami animarca. ¿Diosca ima shinataj paicunataca ayudarca? 520 huatapica mandaj Darioca chai leyta anchuchishpami Diospaj huasita shayachishpa catichun permisota curca. Ashtahuanpish judiocunamanca cullquita cushpami ayudarca. Mandajcunatapishmi judiocunata ayudachun mandarca (Esdras 6:​1, 6-10).

7. ¿Judiocunaca Jehová Diosta sirvishpa catingapaj esforzarishcamantaca ima bendicioncunatataj chasquircacuna?

⁷ Jehová Dios yuyaita cujpimi Ageopish, Zacariaspish Diospaj huasita shayachishpa catingapaj esforzarijpica paillatajmi cancunataca ayudanga nishpa huillarcacuna (Ageo 1:​8, 13, 14; Zacarías 1:​3, 16). Paicuna chashna animajpimi judiocunaca huata 520-pi Diospaj huasita cutin shayachi callarircacuna. Paicunaca Diospaj huasitaca más o menos 5 huatacunapimi shayachishpa tucuchircacuna. Problemacuna ricurijpipish judiocunaca Jehová Diospaj munaita rurangapajmi esforzarircacuna. Chaimantami Jehová Diosca animota, tucui imalla minishtishcacunata curca. Jehová Dios chashna ayudajpimi paicunaca cushilla paita sirvishpa catircacuna (Esdras 6:​14-16, 22).

DIOSPAJTA RURASHPA CATINGAPAJ ESFORZARI

8. ¿Ageo 2:​4-pica imatataj yachanchij? (Notamantapish parlapai).

⁸ Jatun llaqui punllacuna ñalla shamuna cashcataca allimi yachanchij. Chaimantami alli huillaicunata huillanaca minishtirishca can (Marcos 13:10). Shinapish cullqui illaj saquirishca cashpa o autoridadcuna Diosmanta ama huillachun jarcasha nijpica Diospajta rurashpa catinaca sinchimi canga. Pero ¿ñaupajman catingapajca imatataj rurana canchij? ‘Jahua pacha soldadocunata mandaj Jehová Diospimi’ confiana canchij.b Paica ñucanchij cꞌuchullapi cashcamantami ayudai tucun. Pero ñucanchijta ayudachunca llaquicunata charishpapish paipajta rurashpa catingapajmi esforzarishpa catina canchij (Ageo 2:​4-ta liyipai).

9, 10. ¿Mateo 6:​33-pi nishcacunaca ima shinataj shuj cusa huarmipi pajtarirca?

⁹ Huauqui Olegmanta y paipaj huarmi Irinamanta yachashun.c Paicunaca precursoresmi cancuna. Jehová Diosta ashtahuan sirvisha nishpami paicunaca shujtaj congregacionpi sirvinaman rircacuna. Shinapish paicunapaj llajtapi achca problemacuna tiyashcamantami trabajo illaj saquirircacuna. Shuj huatatami huaquinllapi trabajota charircacuna. Shinapish Jehová Dios paicunahuan cashcatami seguros carcacuna. Huauqui panicunapishmi huaquinpica imalla minishtishcacunata cushpa ayudarcacuna. ¿Paicunaca ama desanimaringapajca imatataj rurarcacuna? Callaripica huauqui Olegca achcatami desanimarirca. Pero ama chashna sintiringapajca Diospajta ruranapimi ocuparirca. Chaimi paipish, paipaj huarmipish trabajota mashcacushpapish Diosmanta huillanataca manataj saquircacuna.

¹⁰ Shuj punllaca paicuna mana huasipi cajpimi shuj huauquica ishqui funda micunata saquinaman rishca carca. Chai huauquica micunata saquinaman ringapajca 160 kilometrocunatami viajashca carca. Huauqui Olegca: “Chai punllaca Jehová Dios huauqui panicunapish ñucanchijta achcata cꞌuyashcatami cuentata curcanchij. Cunanca Jehová Dios paipaj sirvijcuna jatun llaquicunata apacujpipish paicunata mana saquij cashcatami seguros canchij” nircami (Mateo 6:33).

11. ¿Diospajta ruranapi ocuparishpaca imatataj chasquishun?

¹¹ Jehová Diosca shujtaj gentecunaman paimanta yachachinapi ocuparichunmi munan. Chaita rurashpallami shujtajcunata quishpirichun ayudashun. Párrafo 7-pi ricushca shinaca Ageoca Diospaj huasita cutin shayachichunmi judiocunata animarca. Paica achca huatacunata chai trabajota mana rurashcata cungarishpa, cutin tucui shunguhuan trabajai callarichunmi animarca. Chaita rurashcamantami Jehová Diosca paicunataca achcata bendiciarca (Ageo 2:​18, 19). Ñucanchijpish Diospajta rurashpa catingapaj esforzarijpica Yaya Diosca ñucanchijta bendiciashpami catinga.

¿JEHOVÁ DIOSPI ASHTAHUAN CONFIANGAPAJCA IMATATAJ RURANA CANCHIJ?

12. ¿Esdraspish, paihuan rij judiocunapish ima jarcaicunahuantaj chꞌimbapurarcacuna?

¹² Huata 468-pica Esdrasca shujtaj judiocunahuanmi Babiloniamanta Jerusalenman rirca. Paicunaca orota, cullquitami Diospaj huasita shayachishpa catingapaj apashpa rircacuna. Pero chai ñancunata viajanaca achca shuhuacuna tiyashcamantami peligroso carca (Esdras 7:​12-16; 8:31). Jerusalenman chayashpapish paicunaca huaquin jarcaicunahuanmi chꞌimbapurarcacuna. Chai punllacunapica Jerusalenpica mana achca judiocuna causacurcachu. Jerusalenpaj pircacunata, pungucunatapish manaraj allichishcacunachu carca. Chaimi chaipi causanaca peligroso carca. Shinapish ¿Esdrasca Jehová Diospi confiashcataca ima shinataj ricuchirca? ¿Paimantaca imatataj yachai tucunchij?

13. ¿Esdrasca imamantataj Jehová Diospi tucui shunguhuan confiaj carca? (Notatapish ricui).

¹³ Esdrasca Jehová Dios paita sirvijcunata ima shina ayudaj cashcataca ñami ricushca carca. Huata 484-pica mandaj Asueroca persacuna mandacun llajtacunapi causaj judiocunata tucuchichunmi mandashca carca. Chai punllacunapica Esdrasca Babiloniapimi causacushcanga (Ester 3:​7, 13-15). Asuero chaita mandashcata yachaj chayashpaca tucui provinciacunapi causaj judiocunaca ayunashpa, huacashpa cꞌuyaillata caparirishpami Jehová Diosta ayudachun mañarcacuna (Ester 4:3). Chashna mañashca qꞌuipaca tucui judiocuna huañunapaj randica paicunata huañuchisha nijcunami huañurcacuna. ¿Chaita ricushpaca Esdraspish, caishuj judiocunapish ima shinashi sintirishcangacuna? (Ester 9:​1, 2). Chai punllacunapi llaquicunata apashcamantami Esdrasca shamuj punllacunapi tiyagrij llaquicunata ahuantangapaj allichirishca carca. Paica Jehová Dios paita sirvijcunata ayudaj cashcatami seguro carca.d

14. ¿Shuj panica trabajo illaj saquirishpaca imatataj intindirca?

¹⁴ Llaqui punllacunapi Jehová Dios ñucanchijta cuidacujta ricushpaca paipimi ashtahuan confiashun. Europapi causaj pani Anastasia ima tucushcata ricushun. Paihuan trabajajcuna politicapi chagrurichun obligasha nijpimi paica chaipi trabajanata saquirca. Anastasiaca: “Primera vezmi trabajo illaj saquirircani. Pero ima shina sintirishcatami Jehová Diosman tucuita huillarcani. Paica tucuipimi ñucataca ayudarca. Cutin trabajo illaj saquirishpaca ña imata mana manchashachu. Cunanca Jehová Dios siempre ñucata ayudanatami segura cani” nircami.

15. ¿Esdrasca imamantataj Jehová Diospi confiashpa catirca? (Esdras 7:​27, 28).

¹⁵ Esdrasca Diospaj maqui paita ima shina ayudashcatami ricurca. Jehová Dios tucuipi paita ayudashcata yuyarishpami Esdrasca paipi ashtahuan confiarca. Chaimi Esdrasca ‘Diospaj llaquij maquimi ñucahuan carca’ nirca (Esdras 7:​27, 28-ta liyipai). Chai laya shimicunaca Esdras libropica shujtaj pichca versocunapipishmi ricurin (Esdras 7:​6, 9; 8:​18, 22, 31).

16. ¿Diospaj llaquij maquica ñucanchijtaca imacunallapitaj ayudai tucun? (Fotocunamantapish parlapai).

¹⁶ Jehová Diosca sinchi jarcaicunata chꞌimbapurachunmi ayudai tucun. Por ejemplo, ¿shuj asambleaman o tucui tandanacuicunaman ringapaj ñucanchij jefeta permisota mañana cashpaca imatataj rurashun? Jehová Diospaj llaquij maqui ñucanchijta ayudanatami seguros cana canchij. Paica ñucanchij mana yuyashca shinami ayudai tucun. Jehová Dios ayudashcata ricushpaca paipimi ashtahuan confiashun.

17. ¿Esdras humilde cashcataca ima shinataj yachanchij? (Página 1-pi tiyaj fotota ricui).

¹⁷ Esdrasca humilde shunguhuanmi Jehová Diospaj ayudata mashcarca. Paica paiman mingashcacunata mana pajtachi tucushcata yuyashpaca siempremi humilde shunguhuan Jehová Diosta mañaj carca (Esdras 8:​21-23; 9:​3-5). Esdras Jehová Diospi tucui shunguhuan confiajta ricushpaca caishujcunaca paitami ayudarcacuna. Ashtahuanpish pai shinami Jehová Diospi confiarcacuna (Esdras 10:​1-4). Ñucanchijpish cullqui illaj saquirishpa o ñucanchij familiamanta sustarishca cashpaca Jehová Diostami humilde shunguhuan mañana canchij. Pai ayudanataca segurosmi cana canchij.

18. ¿Jehová Diospi ashtahuan confiangapajca imatataj rurana canchij?

¹⁸ Ñucanchijpish Jehová Diospi confiangapajca humilde shunguhuanmi paipaj ayudata mashcana canchij. Huauqui panicunapish ñucanchijta ayudachunmi saquina canchij. Quimsa huahuacunata charij pani Erika llaquicuna shamujpica chaitami rurarca. Paipaj ushushica paipaj huijsapi cajpirajmi huañurca. Chai qꞌuipallaca paipaj cusapishmi huañurca. Chai jatun llaquicunata apashcata yuyarishpaca cai panica cashnami nirca: “Yayitu Jehová Diosca ñucanchij mana yuyashca shinami huaquinpica ayudan. Turi ñañacuna sumaj shimicunahuan animajpi, imapipish ayudajpimi Jehová Dios ñuca mañashcacunata cutichicushcata cuentata cushcani. Shinallataj turi ñañacuna ñucata ayudachunca paicunaman ima shina sintirishcata huillana cashcatapishmi cuentata cushcani” nircami.

JEHOVÁ DIOSPI SIEMPRE CONFIASHUNCHIJ

19, 20. ¿Jerusalenman mana tigrai tucuj judiocunamantaca imatataj yachanchij?

¹⁹ Jerusalenman mana tigrai tucuj judiocunamantapishmi achcata yachai tucunchij. Paicunaca mayorllacuna cashcamanta, ungushca cashcamanta o familiata cuidana cashcamantachari Jerusalenmanca mana tigrai tucurcacuna. Pero mana tigrai tucushpapish Jerusalenman tigraj judiocunaman tucui imalla minishtishcacunata cushpami cushilla ayudarcacuna (Esdras 1:​5, 6). 19 huatacuna pasajpipish paicunaca Jerusalenpi caj judiocunamanca imalla minishtishcacunatami cachajcuna cashcanga (Zacarías 6:10).

²⁰ Ñucanchij munashca shina Jehová Diosta mana sirvi tucushpapish pai ñucanchij esfuerzocunata achcata valorashcatami yuyarina canchij. ¿Jehová Dios ñucanchij esfuerzocunata valoraj cashcataca ima shinataj yachanchij? Profeta Zacariaspi yuyashunchij. Jehová Diosca Babiloniapi saquirij judiocuna cachashca orohuan, cullquihuan shuj coronata rurachunmi paitaca mandarca (Zacarías 6:11). Chai sumaj coronata ricushpami Jerusalenpi caj judiocunaca Babiloniapi saquirij judiocuna alli shungucuna cashcata yuyarijcuna carca (Zacarías 6:14). ¿Caimantaca imatataj yachanchij? Llaquicunata charishpapish Jehová Diosta tucui shunguhuan sirvingapaj esforzarijpica Jehová Diosca ñucanchij imalla rurashcataca manataj cungaringachu (Hebreos 6:10).

21. ¿Llaquicuna shamujpipish ama yallitaj sustaringapajca imatataj rurana canchij?

²¹ Cai tucuri punllacunapi ashtahuan llaquicuna shamuna cashcataca allimi yachanchij (2 Timoteo 3:​1, 13). Pero mana yallitaj sustarinachu canchij. Ageo causashca punllacunapi Jehová Dios israelitacunaman imata nishcata yuyarishunchij. Paica: ‘Ñucami cancunahuan cani. Ama manchaichijchu’ nircami (Ageo 2:​4, 5). Ñucanchijpish Jehová Diosta tucui shunguhuan sirvishpa catingapajmi esforzarina canchij. Chaita rurajpica Jehová Diosca ñucanchijhuanmi canga. Shinashpaca Ageomanta, Zacariasmanta, Esdrasmanta cunan imata yachashcata pajtachingapaj esforzarishunchij. Chashnami jatun llaquicuna shamujpipish Jehová Diospi confiashpa catishun.