Diosta mana sirvijcuna shina ama canllapi yuyaichu

CAI mundopica achca gentecunami: “Ñucaca shujtajcunata yalli importantemi cani. Chaimi ñucataca alli tratana can” nishpa yuyancuna. Paicunata ña alli tratajpipish ashtahuan alli tratachunmi munancuna. Bibliapica cai tucuri punllacunapi achca gentecuna chashna cana cashcatami huillarca. Chaipica gentecunaca paicunallapi yuyajcuna, mana pagui nijcuna cana cashcatami huillarca (2 Timoteo 3:2).

Tucui vidami paicunallapi yuyaj gentecuna tiyashca. Por ejemplo, Adán y Evaca paicunallataj ima alli cashcata, ima mana alli cashcata decidina derechota charishcatami yuyarcacuna. Paicuna pandarishcamantami tucuicuna achca llaquicunata charinchij. Adán y Eva causashca achca huatacuna qꞌuipaca Judá llajtata mandaj rey Uziaspish paillapi yuyaj cashcatami ricuchirca. Paica Diospaj templopimi inciensota rupachirca. Pero sacerdotecunallami chaita rurana derechota charircacuna (2 Crónicas 26:​18, 19). Fariseocunapish, saduceocunapish Abrahanmanta shamushcamanta shujtajcunata yalli cashcatami yuyajcuna carca. Chaimi Yaya Dios paicunata alli tratana cashcata yuyarcacuna (Mateo 3:9).

Millai gentecuna chaupipi causacushcamantami mana cuidadota charishpaca paicuna shina yuyai callarishun (Gálatas 5:26). Tal vez shujtajcunata yalli cashcata yuyashcamantami ñucanchijta alli tratachun munashun. Pero ¿ama chashna yuyangapajca imatataj rurana canchij? Jehová Dios jatun tucushcacunamanta imata yuyashcatami intindina canchij. Cunanca Bibliapi ishqui consejocunata ricushun.

Jehová Diosmi caishuj chaishuj ima shina tratanacuna cashcata nin. Huaquin ejemplocunata ricushun.

• Jehová Diosca cusacuna paicunapaj huarmicunata cꞌuyachunmi munan. Shinallataj huarmicuna paicunapaj cusacunata respetachunmi munan (Efesios 5:33). Cazarashcacunaca shujtaj cꞌarihuan, shujtaj huarmihuan asirishpa, pugllarishpaca mana purinachu can. Ashtahuanpish ishquindijllami cꞌuyaita ricuchinacuna can (1 Corintios 7:3). Yaya mamacunaca paicunapaj huahuacunataca cꞌuyaihuanmi alli cuidana can. Cutin huahuacunaca paicunapaj yaya mamatami cazuna can (2 Corintios 12:14; Efesios 6:2).

• Congregacionta pushaj anciano huauquicunaca huauqui panicunata cuidangapajmi achcata esforzarincuna. Chaimantami paicunataca tucui shunguhuan respetana canchij (1 Tesalonicenses 5:12). Chashnapish ancianocunaca amocuna shina huauqui panicunataca mana mandanachu can (1 Pedro 5:​2, 3).

• Diosmi autoridadcunataca mandachun saquishca. Chaimantami paicunata cazuna, impuestocunata pagana canchij (Romanos 13:​1, 6, 7).

Jehová Dios cꞌuyaj cashcamantami ñucanchijmanca allicunata cun. Juchayujcuna cashcamanta huañuna cajpipish Jehová Diosca tucuipimi ñucanchijta ayudan (Salmo 103:​10, 11; Romanos 6:23). Chaimantami Jehová Dios ñucanchijman bendicioncunata, privilegiocunata cujpica chaicunata mericishcataca mana yuyana canchij (Romanos 12:​6-8; Efesios 2:8).

¿ÑUCANCHIJLLAPI AMA YUYANGAPAJCA IMATATAJ RURANA CANCHIJ?

Diosta mana sirvijcuna shina ama yuyangapajmi cuidarina canchij. Maipica mana cuentata cushpami: “Ñucaca shujtajcunata yallimi cani. Chaimi ñucataca ashtahuan alli tratana can” nishpa yuyai callarishun. Jesusca mana chashna yuyana cashcata yachachingapajca shuj ejemplomantami parlarca. Paica uvas chagrata charij runa huaquin runacunata chaipi trabajachun contratashcatami parlarca. Chagrayuj runaca punlla entero trabajashcamanta cada unoman shuj denariota pagagrishcatami nirca. Qꞌuipaca shujtaj trabajajcunatapishmi contratarca. Rupaipi tucui punlla trabajajcunaca ashtahuan cullquita japigrishcatami yuyarcacuna. Pero ña tutayajpica paicunapish, shuj horallata trabajajcunapishmi shuj denariollata chasquircacuna (Mateo 20:​1-16). Shinashpaca Jehová Dios cada unoman mashnata cujpipish cushillami chasquina canchij.

Shujtajcuna ñucanchijman imatapish cunataj cashcataca mana yuyanachu canchij. Ashtahuanpish paicuna ñucanchijta ayudashcamantami agradicina canchij (1 Tesalonicenses 5:18). Apóstol Pabloca huauqui panicuna paita ayudana cajpipish paicunataca imata mana mañarcachu (1 Corintios 9:​11-14).

Humildesmi cana canchij. Jatun tucushcacunaca ashtahuan charina cashcatami yuyancuna. Pero chashna yuyanaca veneno shinami can. Chai veneno ñucanchijta ama dañota rurachunca humildes cangapajmi esforzarina canchij.

Humildes cangapajca Danielpaj ejemplomantami yachana canchij. Paica shuj alli familiamantami shamurca. Shinallataj guapo, yachaisapami carca. Shinapish paica “Ñuca chashna cashcamantami gentecunaca ñucataca alli tratana can” nishpaca mana yuyarcachu (Daniel 1:​3, 4, 19, 20). Daniel humilde cashcamantami Jehová Diospajca valishca runa carca (Daniel 2:30; 10:​11, 12).

Caipi yachashca shinaca Jehová Diosta mana sirvijcunaca jatun tucushca, paicunallapi yuyajcunami can. Chaimantami paicuna shina ama yuyangapaj cuidarina canchij. Ashtahuanpish cꞌuyaj Jehová Dios cushcacunahuan cushilla cangapajmi esforzarina canchij.