Caitami tapushcacuna
¿Jehová Diosca gobiernocunapaj shungupica ima yuyaitataj ñalla churanga?
¿Jatun llaqui punlla callaricujpica imataj tucunga? Apocalipsis 17:16, 17-pica: “Can ricushca chunga gachucunapish, manchanai millai animalpish huainayaj huarmita pꞌiñashpami pai tucui imalla charishcacunata quichungacuna. Shinallataj lluchullatami saquingacuna. Paipaj aichataca micungacunami, paitapish ninapimi tucui rupachingacuna. Diosca paipaj munaita rurachunmi paicunapaj shungupica shuj yuyaita churashca. Tucuicunami shuj yuyaillata charincuna. Paicunaca Dios huillashca shimicuna pajtaringacamami manchanai millai animal mandachun paicunapaj autoridadta paiman entregancuna” ninmi. Caipi nishca shinaca ¿Jehová Diosca gobiernocunamanca ima yuyaitataj cunga? Ñucanchij publicacioncunapica “Jehová Diosca panda religioncunata tucuchina yuyaitami gobiernocunapaj shungupi churanga” nishpami yachachijcuna carcanchij.
Shinapish cunanca mana chashna cashcatami intindinchij. ¿Jehová Diosca gobiernocunamanca ima yuyaitataj cunga? Jehová Diosca gobiernocunamanca manchanai millai animalta apoyana yuyaitami cunga. ¿Chaica ima shinataj pajtaringa? Caita alli intindingapajca huaquin tapuicunamantami yachashun.
¿Apocalipsis 17:16, 17-pi parlashca profeciaca picunatataj ricuchin? “Huainayaj huarmica” tucui panda religioncunatami ricuchin. Shinallataj cai huainayaj huarmica “Babilonia jatun llajta” nishcapishmi can. Cutin “pucanicuj manchanai millai animalca” Organización de las Naciones Unidastami ricuchin. Cai organizaciontaca sumaj causai muyundij Allpapi tiyachun nishpami 1919 huatapi callarichircacuna. Chai tiempopica Sociedad de Naciones nishpami rijsijcuna carca (Apocalipsis 17:3-5). Shinallataj “chunga gachucunaca” manchanai millai animalta apoyaj tucui gobiernocunatami ricuchin.
¿Huainayaj huarmi pucanicuj manchanai millai animalpaj jahuapi tiyacushcaca imatataj ricuchin? Chai huainayaj huarmi manchanai millai animalta apoyashcata, chai animalta mandasha nishcatapishmi ricuchin.
¿Huainayaj huarmihuanca imataj tucunga? Chunga gachucunapish, manchanai millai animalpish huainayaj huarmita pꞌiñashpami pai tucui imalla charishcacunata quichungacuna. Shinallataj tucuicunapaj ñaupajpimi chai huarmi millaicunata rurashcata ricuchingacuna. Qꞌuipacarin Jehová nishca shinami chai huarmitaca para siempre tucuchingacuna (Apocalipsis 17:1; 18:8). Shinapish ¿manaraj panda religionta tucuchijpica Jehová Diosca imatataj ruranga?
¿Jehová Diosca gobiernocunamanca ima yuyaitataj cunga? Gobiernocunapaj shungupimi Naciones Unidasta apoyana yuyaita churanga (Apocalipsis 17:13). Shinapish gobiernocunaca mana paicunapaj yuyaimantachu chaita rurasha ningacuna. Ashtahuanpish Jehová Dios yuyachijpimi chaita rurangacuna (Proverbios 21:1-ta, Isaías 44:28-huan chꞌimbapurai). ¿Gobiernocunaca asha ashachu Naciones Unidasta apoyangacuna? Mana, ashtahuanpish ñapishmi apoyai callaringacuna. Chaimantami Jehová Dios nishca shina manchanai millai animalca panda religionta huiñaipaj tucuchinga.
¿Shamuj punllacunapi ima tucuchuntaj shuyanchij? Gobiernocuna asha asha Naciones Unidasta apoyana cashcataca mana shuyanachu canchij. Ashtahuanpish Jehová Dios tucui gobiernocunapaj shungupi apoyana yuyaita ñapish churana cashcatami shuyanchij. Chai pajtarijta ricushpaca ñalla Jatun llaqui punlla callarina cashcatami yachashun. ¡Jatun llaqui punllaca ñallami callaringa! Chai punlla chayamungacamaca “rijcharishca cashunchij. Alli yuyaihuan purishunchij” (1 Tesalonicenses 5:6).