“Dios cushca bendicionhuan” sinchiyachishunchij

Caishuj chaishuj animanacunaca sumajmi can. Chaimantami hermanitocunahuan tandalla pasanata munanchij. Bibliapica shujtajcunapaj crishcacunata sinchiyachinaca “Dios cushca bendicionmi” can ninmi (Romanos 1:​11, 12). Ñucanchijca shujtajcunahuan pasashpallaca mana animarishunchu. Chaimanta ¿imatataj rurana canchij?

Sumaj shimicunahuan animashunchij. Reunioncunapi comentashpaca shujtajcunatami animanchij. Shinapish ñucanchij yuyaicunallata o ñucanchij causaillamantaca mana parlanachu canchij. Chaipaj randica Jehová Diosmanta, paipaj shimimanta, Diosta sirvijcunamanta imata yachashcatami parlana canchij. Shinallataj huauqui panicunahuan parlanacucushpaca Diosta sirvishpa catichunmi animachij shimicunata nina canchij.

Ñucanchij ruraicunahuan animashunchij. Canca ima llaquicunata charishpapish Jehová Diosta ashtahuan sirvishpa catinatachari agllarcangui. Mana cashpaca caita chaita rurashpa shaicushca cashpapish, ancha ungüita charishpapish tandanacuicunaman rinataca manachari saquingui. Chaita ricushpami shujtaj huauqui panicunaca Diosta sirvishpa catinata munancuna.

¿Ñuca ruraicunahuan, rimashcacunahuanchu shujtajcunataca animani? ¿Huauqui panicuna paicunapaj ruraicunahuan, rimaicunahuan ñucata animacushcatachu cuentata cuni?