¿Yacharcanguichu?

¿Ñaupa tiempopi causajcunaca caruman rishpaca ima shinataj ninata japichijcuna carca?

GÉNESIS 22:6-PICA Abrahamca Diosman sacrificiota cungapajca carumanmi rina carca ninmi. Chaimantami “Abrahamca, Taita Diosman cunata tucui rupachina yantataca paipaj churi Isaacman apachishpa cuchillotapish, ninatapish pai apashpami ishquindij rircacuna”.

Diospaj Shimipica ñaupa tiempopi causaj gentecuna ima shina ninata japichijcuna cashcataca mana huillanchu. Shinashpaca ¿Abrahampish Isaacpish ninata japichishpachu apashcacuna canga? Bibliamanta yachaj shuj runaca cashnami nirca: ‘Ninata japichishpa caru ladoman rijpica ninaca huañunmanmi carca. Chaimantami Abrahampish paipaj churipish ninata japichingapajca ima minishtirishcacunata apashcacuna canga’ nircami.

Shujtaj runacunaca: ‘Ñaupa tiempopi ninata japichinaca sinchimi carca’ nincunami. Chaimantami gentecunaca rupacuj carbonta apashpa ninata japichijcuna carca. Paicunaca shujtajcunapaj rupacuj carboncunatami mañajcuna cashcanga. Cutin shujtaj gentecunaca cashnami nin: ‘Abrahamca caruman ringapajca rupacuj carboncunatami apashpa rishcanga. Uchilla mangapimi chai carboncunataca apashpa rishcanga’ nincunami (Isaías 30:14). Chashnami Abrahamca ninata japichingapajca rupacuj carboncunatapish, chaquishca yantacunatapish apashpa rishcanga.