¿Diosca ñuca causaipi imatataj rurachun munan?

Bibliaca caitami yachachin

Diosca paipajman cꞌuchuyachun, paihuan alli apanacuchun, paita tucui shunguhuan cꞌuyashpa sirvichunmi munan (Mateo 22:37, 38; Santiago 4:8). Jesuspaj causaimanta, paipaj yachachishcacunamantapish yachashpami Diospaj munaita ima shina ruranata yachashun (Juan 7:16, 17). Jesusca mana paipaj Yayapaj munaillatachu yachachirca. Ashtahuanpish paipaj Yayapaj munaita rurarca. Chaimanta imapaj shamushcata parlashpami “mana ñuca munaita rurangapaj shamurcanichu. Ashtahuanpish ñucata cachaj Yayapaj munaita rurangapajmi shamurcani” nirca (Juan 6:38).

Diospaj munaita maijantaj cashcata yachangapajca ¿shuj milagrota o shuj muscuita shuyanachu cani?

Mana. Diosca paipaj munaita yachachingapajca Bibliatami cushca. Chaimanta Bibliaca ‘tucuita allita rurangapaj, alli allichishca’ cangapajmi can (2 Timoteo 3:16, 17). Diosca ñucanchijllataj Bibliamanta alli intindishpa paimanta yachachunmi munan (Romanos 12:1, 2; Efesios 5:17).

¿Diospaj munaita rurai pudinichu?

Ari, pudinguimi. Bibliaca: ‘Pai mandashcacunata cazunaca mana sinchichu can’ ninmi (1 Juan 5:3). Caica mana nisha ninchu Diospaj munaita runaca siempre jahualla canata. Pero esforzarishpaca Diospaj munaitami rurai pudishun. Jesusllataj Diospaj Shimita uyashpa cazujcunami, ashtahuan cushichishcacuna canga nircami (Lucas 11:28).