Yayitu Diosmanta yachashunchij

1, 2. ¿Maipica ima tapuicunatataj ruranchij?

HUAHUACUNACA achca tapuicunatami rurancuna. Tucui tapushcacunata cutichijpipish paicunaca “¿imamanta?” nishpami tapushpa catincuna.

² Jovencunapish, yuyajcunapish siempremi tapuicunataca ruranchij. Por ejemplo, shuj llajtaman ima shina chayanata, o ima horas cashcata yachangapajmi shujtajcunata tapunchij. Cutin huaquinpica: “¿Imapajtaj causanchij? ¿Shamuj punllacunapica causaica ima shinashi canga?” nishpami tapurinchij. Cai tapuicunamanta mana yachai tucushpami maipica llaquilla sintirinchij.

3. ¿Huaquincunaca tapuicunapaj respuestacunataca imamantataj mana mashcancuna?

³ Maijancunaca achca tapuicunata charishpapish respuestacunataca mana mashcancunachu. Paicunaca, “cai tapuicunapaj respuestacunaca Bibliapimi tiyan, pero Bibliata intindinaca sinchimi can” nincunami. Shujtajcunaca, “cai tapuicunataca pastorcunalla, curacunallami yachana can” nincunami. Cutin shujtajcunacarin pingaimantami ima tapuicunatapish mana rurancuna.

4. ¿Bibliapica imatataj yachai tucungui?

⁴ Shamuj punllacunapi ima shina causai tiyanata, huañushca qꞌuipa ima tucunatami Bibliapi yachai tucungui. Shinallataj Yaya Dios ima shina cashcatami Bibliaca huillan. Jesusca: ‘Taita Diosta mañashpa catichij, paica cungami. Mashcashpa catichij, japinguichijmi. Punguta huajtashpa catichij, paica pascangami’ nircami (Mateo 7:7). Jesús yachachishca shinaca tapuicunata cutichingacamami mashcashpa catina cangui.

5. ¿Imamantataj Bibliata yachana cangui?

⁵ Cambaj tapuicunata yachangapajca Bibliapimi mashcana cangui (Proverbios 2:1-5). Bibliata yachashpaca cai tapuicunataca jahuallami intindingui. Shinallataj Bibliapi yachashcata pajtachishpaca cushillami causangui. Shamuj punllacunapipish sumaj causaitami charingui. Cunanca Bibliamanta yachashpa callarishun.

¿DIOSCA ÑUCANCHIJMANTA SUSTARINCHU?

6. ¿Imamantataj huaquin gentecunaca “Diosca ñucanchijmantaca mana sustarinchu” nincuna?

⁶ Cunan punllacunaca macanacuicuna, ungüicuna, huañuicunami tiyan. Shinallataj gentecunapurami pꞌiñanacushpalla causancuna. Cutin shujtajcunaca, micunallapajpish imata mana charincunachu. Caita ricushpami maijancunaca, “Dios ñucanchijmanta sustarishpaca ¿imamantashi tucui llaquicunataca mana tucuchin?” nincuna.

7. a) ¿Achca religioncunaca Diosmantaca imatataj yachachincuna? b) ¿Llaquicunata Dios mana cachashcataca ima shinataj yachanchij?

⁷ Jatun llaquicuna tiyajpica huaquin religioncunapica, “Diospaj voluntadmi can” nishpami Diosta juchachincuna. Chaimantami achca gentecunaca Diostaca mana allita shina ricuncuna. Pero Habacuc 1:13-pica, Yaya Diosmanta parlashpaca: “Canca ima jucha illaj cashpami, millaitaca manataj ricunachingui. Ima millaita manataj ricui tucunguichu” ninmi. Yaya Diosca llaquicuna tiyachun saquishpapish paica llaquicunataca manataj cachanchu (Jeremías 29:11-ta liyipai). Caita alli intindingapajca shuj ejemplota ricushun.

8, 9. ¿Problemacunata charishpaca imamantataj Diosta mana juchachina canchij?

⁸ Yuyashun. Shuj yayaca paipaj churitaca achcata cꞌuyashpami alli decisioncunata agllachun yachachin. Pero, chai churi ña jatunyashpaca yayata mana cazushpami huasimanta rin. Paica mana allicunata rurashcamantami achca problemacunata charin. Churi llaquicunata charishcamantaca ¿yayatachu juchachinguiman? (Lucas 15:11-13). Diosca chai yaya layallatajmi gentecuna paicunapaj munaita rurashpa causachun saquishca. Chaimantami llaquicunata charishpaca Diosta mana yangamanta juchachina canchij.

⁹ Diosca ñucanchijtaca achcatami cꞌuyan, ñucanchij llaquicunamantaca ima culpata mana charinchu. Paillami tucui problemacunataca anchuchi tucun (Isaías 33:2). Pero, ¿Yaya Diosca imamantataj llaquicuna tiyashpa catichun saquishca? Chaitaca capítulo 11-pimi ashtahuan yachashun.

10. ¿Imamantataj Yaya Dioslla llaquicunata anchuchi tucun?

¹⁰ Diosca jucha illajmi can (Isaías 6:3). Tucui pai rurashcacunaca chuya, allimi can. Chaimantami paipi confiana canchij. Pero ñucanchijcunaca mana Dios layachu canchij. Tucuicunami huaquinpica mana allicunata ruranchij. Huaquin gentecunacarin shujtajcunataca dimastijmi llaquichincuna. Gobiernocunaca tucui llaquicunata anchuchisha nishpapish mana imata rurai pudishcacunachu. Yaya Diosllami tucui poderta charishcamanta llaquicunataca anchuchi tucun. Paica, ‘ñallami tucui problemacunataca huiñaipaj chingachisha’ ninmi (Salmo 37:9-11-ta liyipai).

¿ÑUCANCHIJ LLAQUICUNAMANTACA DIOSCA IMA SHINASHI SINTIRINGA?

11. ¿Ñucanchijcuna llaquicunata charijta ricushpaca Diosca ima shinataj sintirin?

¹¹ Bibliapica, ‘Diosca cashcata ruranatami munan’ ninmi (Salmo 33:5, QC, 1989). Paica jahua cielomantami tucuita ricucun. Por ejemplo, Noé causacui punllacunapica achca gentecunami millai cosascunata rurashpa causarcacuna. Chaita ricushpami Diosca shungupi nanarishpa llaquirirca (Génesis 6:5, 6). Diosca mana cambiashcachu (Malaquías 3:6). Chaimantami ñucanchijcuna llaquicunata charijta ricushpaca paica dimastij llaquilla sintirin. Bibliapica, ‘Diosca ñucanchijmanta preocuparinmi’ ninmi (1 Pedro 5:7-ta liyipai).

12, 13. a) ¿Diosca ima shinataj ñucanchijta rurashca? b) ¿Gentecuna sufrijta ricushpaca ima shinataj sintirinchij? c) ¿Diosca imamantataj tucui llaquicunata tucuchinga?

¹² Diosca pai shina cꞌuyaj, llaquij, mana pꞌiñarij cachunmi ñucanchijtaca rurarca (Génesis 1:26). Bibliapica: “Diosca cꞌuyajmari” ninmi (1 Juan 4:8). Paica imata rurashpapish cꞌuyaimantami ruran. Yayitu Dios cꞌuyajpimi ñucanchijpish cꞌuyanchij. Chaimantami ñucanchijca shujtaj gentecuna sufrijta ricushpaca llaquilla sintirinchij. Dioscarin yallitajmi llaquirin.

¹³ Gentecuna llaquicunata charichunca mana munanchijchu. Achca poderta charishpaca ¿manachu libre llaquicunata tucuchinguiman? Diosca tucui podertami charin. Paica ñucanchijtaca achcatami cꞌuyan. Chaimantami ñalla tucui llaquicunata tucuchinga. Página 4 y 5-pi ricurij dibujocuna pajtarinataca tucui shunguhuanmi crina canchij. Pero Dios cusha nishcacuna pajtarinataj cashcata cringapajca, puntapica Diosmantami ashtahuan yachana canchij.

YAYA DIOSCA PAITA RIJSICHUNMI MUNAN

14. a) ¿Diosca ima shutitaj can? b) ¿Diosca paipaj shutitaca imamantataj utilizachun munan?

¹⁴ Pihuan amigo tucungapajca ¿imatataj rurangui? ¿manachu cambaj shutita huillangui? Chashnallatajmi Diosca paipaj amigo tucuchunca paipaj shutita huillashca. Huaquin religioncunapica Diostaca, Yaya Dios, Taita Amito nincunami. Pero caica mana paipaj shutichu can, doctor o presidente nicuj shinallami can. Diosllatajmi, ñuca shutica Jehovami can nin. Bibliapica: ‘Cambaj shuti Jehová cashcata gentecuna yachachun. Canllami ashtahuan Jatun Dios cangui’ ninmi (Salmo 83:18, NM). Shujtaj Bibliacunapica Diospaj shutica Salmo 82:19-pimi ricurin. Diosca paipaj shutita rijsichun, paipaj shutipi cayachunmi munan. Chaimantami Bibliata quillcajcunaca achca cutin Diospaj shutitaca utilizarcacuna (Éxodo 3:15; 6:3). Por ejemplo, quichua Bibliapica Éxodo 17:15, 16-llapimi Diospaj shutica ricurin. Moisesca shuj altarta rurashpami, ‘Jehová–nisí’ nishpa shutichirca. Jehová-nisí nishpaca hebreo rimaipica “Jehovami ñuca pacatucuna” nisha ninmi.

15. ¿Jehová shutica imatataj nisha nin?

¹⁵ Jehová shutica tucui pai nishcacunata pajtachi tucushcatami nisha nin. Pai nishcacuna pajtarichunca pi mana jarcai tucunchu. Chaimantami pai solo cai shutitaca chari tucun.a

16, 17. a) ¿Apocalipsis 15:3-pica Jehovamantaca imatataj yachachin? b) ¿Jehová Diostaca imamantataj huiñaita Jatun Mandaj ninchij? c) ¿Apocalipsis 4:11-pi nishca shinaca imamantataj Diosta jatunyachina canchij?

¹⁶ Salmo 83:18-pi nishca shinaca Jehová Diosllami Jatun Mandaj can. Paillami tucuimanta yalli poderta charij can. Chaimantami Apocalipsis 15:3-pica: ‘Tucuita Rurai Tucuj Mandaj Dios, cambaj rurashcacunaca jatun sumajmari can’ nin. Yaya Diosca siempremi tiyashca y siempremi tiyanga. Chaimantami Bibliapica, “Diosca huiñaita Jatun mandajmi can” nin (1 Timoteo 1:17). Shinallataj Salmo 90:2-pica, ‘Diosca huiñaimanta huiñaicama ña tiyaj Diosmi can’ ninmi. ¿Caita yachashpaca manachu cushilla sintiringui?

¹⁷ Jehová Diosllami tucuita Ruraj can. Paica jahua cielopica angelcunata, estrellacunatami rurarca. Shinallataj yacupi causaj animalcunata, granota cuj tucui laya yuracunatami rurarca. Chaimantami Apocalipsis 4:11-pica: ‘Jatun Dios, canca jatunmari cangui, allimari cangui, tucuita rurai tucujmari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan’ ninmi.

¿DIOSPAJ AMIGO TUCUI PUDINCHIJCHU?

18. a) ¿Huaquin gentecunaca imatataj Diosmanta nin? b) ¿Bibliapica Diosmantaca imatataj yachachin?

¹⁸ Jehová Dios achca poderyuj cajta yachashpami huaquin gentecunaca mancharincuna. Paicunaca: “Diosca achca podertami charin, ñucanchijmantaca mana preocuparinchu, paica carupimi can” nincunami. Pero Yayitu Diosca chashna yuyachunca mana munanchu. Paica ñucanchij amigomi tucusha nin. Bibliapica: “Taita Diosca ñucanchijmantaca mana carupichu” ninmi (Hechos 17:27). Diosca paita rijsichunmi munan. Paiman cꞌuchuyajpica paipish ñucanchijpajman cꞌuchuyangami (Santiago 4:8).

19. a) ¿Diospaj amigo tucungapajca imatataj rurana canchij? b) ¿Diosca ima layataj can?

¹⁹ ¿Diospaj amigo tucungapajca imatataj rurana canchij? Diosmantami yachana canchij. Chashnami paitaca alli rijsingui. Bibliapica: “Huiñai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” ninmi (Juan 17:3, QC, 1989). ¿Diosca ima layataj can? Ña yachashca shinaca Diosca cꞌuyajmi can (1 Juan 4:16). Shinallataj paica llaquij, cꞌuyaj shungu, mana utca pꞌiñarij, mana llullaj Diosmi can (Éxodo 34:6). Chashnallataj Salmo 86:5-pica, Diosca “perdonajmari” ninmi. Paica ñucanchijtaca manataj saquingachu (1 Corintios 1:9, NVI, 1999).

20, 21. ¿Diosta mana ricui tucushpapish paitaca ima shinataj rijsi tucungui?

²⁰ Diosta mana ricui tucushpapish paitaca rijsi tucunguimi (Juan 1:18; 4:24; 1 Timoteo 1:17). Chaipajca Bibliatami liyina cangui. Chashnami Jehová Dios ima shina cashcataca yachangui (Salmo 27:4; Romanos 1:20). Yaya Diosmanta yachashpaca paitaca shungumantami cꞌuyangui.

²¹ Shinallataj Bibliata yachashpami Yaya Dios cꞌuyaj cashcata yachangui (Mateo 6:9). Diosmi ñucanchijmanca causaita curca. Paica cambaj amigomi casha nin (Salmo 36:9). Shuj yayaca paipaj huahuacunata cꞌuyashcamantami cushilla causachun munan. Yaya Diospish ñucanchijta cꞌuyashcamantami cushilla causachun munan. Bibliapi nishca shinaca canca Diospaj amigomi cai tucungui (Santiago 2:23).

22. ¿Shujtajcuna Bibliamanta ama yachachun nijpipish imatataj rurana cangui?

²² Bibliamanta yachacujpica tal vez shujtajcunaca, “ama yachaichu” ningachari. Paicunaca, “ñucanchij religiontami saquigrin” nishpachari preocuparingacuna. Chashna nijpipish ¿imatataj rurana cangui? Bibliamanta yachashpami catina cangui. Tucuimanta yallica Diospaj amigo canami ashtahuan importante can.

23, 24. a) ¿Bibliata alli intindingapajca imatataj rurana cangui? b) ¿Catij temapica imatataj yachashun?

²³ Bibliata yachacushpaca huaquinpica manachari tucuita intindingui. Chashna cajpica can mana intindishcacunata intindichichunmi ayudata mañana cangui. Ña yachashca shinaca huahuacunaca achca tapuicunatami rurancuna. Jesusca, ‘huahuacuna shinami humildes cana canguichij’ nircami (Mateo 18:2-4). Cambaj tapuicunata alli intindichunmi Diosca munan. Chaimantami Bibliamanta yachacushpaca imata nisha nishcata alli intindingapaj esforzarina cangui (Hechos 17:11-ta liyipai).

²⁴ Bibliamanta yachashpami Jehová Diostaca ashtahuan rijsingui. ¿Bibliaca imamantataj shujtaj librocunamanta yalli alli can? Chaitaca catij temapimi alajata yachashun.