¿Carmelo urcupica imataj tucurca?

Israelpaj diez familiacunamanta reycunaca yallitaj millaicunami carca. Pero Acabca tucuicunata yalli millaimi carca. Paica Baal diosta adoraj Jezabelpaj cusami carca. Jezabelca yallitaj millai huarmimi carca. Paicunaca achca israelitacunatami Baalta adorachircacuna. Shinallataj Jehová Diospaj achca profetacunatami huañuchircacuna. ¿Diosca imatataj rurarca? Profeta Eliastami pai nishcata huillachun Acabpajman cacharca.

Acab millai rey cashcamanta Israelpi ña mana tamyagrishcatami Eliasca huillarca. Quimsa huata yallitami ima grano mana pꞌucurca. Chaimantami gentecunaca achca yaricaihuan carcacuna. Cutinllatajmi Diosca Eliastaca Acabhuan parlachun cacharca. Acabca Eliastaca: ‘Canca pꞌiñachingapajllami shamungui. Cambaj culpamantami mana tamyan’ nishpami rimarca. Chaimi Eliasca: ‘Mana ñuca culpamantachu. Can Baalta adoracushcamantami usyarin. Cunanca tucui israelitacunatapish, Baalpaj profetacunatapish Carmelo urcupi tandachi. Chaipimi pi Dios verdadero cashcata ricushun’ nirca.

Israelitacuna urcupi tandanacujpimi Eliasca: “¡Jehová, Dios verdadero cajpica paita catichijyari! ¡Pero Baal, Dios verdadero cajpica paita catichijyari!” nirca. Shinallataj: ‘Pi, Dios verdadero cashcata yachangapajca Baalpaj 450 profetacunami ofrendata allichishpa paicunapaj diospaj shutipi mañana can. Ñucapish shuj ofrendata allichishpami Jehovapaj shutipi mañasha. Mañashcata uyashpa ninata cachajmi Dios verdaderoca canga’ nircami. Chaimi gentecunaca: “Allimi” nircacuna.

Baalpaj profetacunaca ofrendatami allichircacuna. Paicunaca tucui punllami paicunapaj diostaca: “¡Baal, cutichihuai!” nishpa mañarcacuna. Baal mana cutichijpimi Eliasca burlarishpa: ‘Ashtahuan sinchita caparichijyari. Mana cashpaca dormicungamari, rijchachinamari’ nirca. Casi tutayangacamami Baalpaj profetacunaca mañashpa catircacuna. Pero pi mana cutichircachu.

Eliasca altarpi ofrendata churashpami chai jahuapi achca yacuta jicharca. Qꞌuipaca: ‘Jehová Dioslla can Dios verdadero cashcata yachachun cutichihuayari’ nishpami Eliasca mañarca. Chai ratomi Diosca jahuamanta ninata cachashpa ofrendata rupachirca. Chaimi gentecunaca: ‘Jehovami Dios verdadero’ nishpa caparircacuna. Eliasca: ‘¡Baalpaj profetacuna shujllapish richunca ama saquichijchu!’ nircami. Chai punllapica 450 Baalpaj profetacunatami huañuchircacuna.

Qꞌuipaca mama cucha yacu jahuapimi shuj uchilla pꞌuyu ricurirca. Chaimi Eliasca Acabtaca: ‘Amaraj tamya shamujpi cambaj carretata allichishpa huasiman tigrai’ nirca. Qꞌuipaca cielopi yana pꞌuyu jundarishpa, huaira pꞌucujpimi sinchita tamyai callarirca. Chashnami usya punllaca tucurirca. Acabca paipaj carretapi ratomi rirca. Cutin Eliasca callpashpami Acabta pasashpa rirca. Jehová ayudajpimi chashna rirca. Pero ¿Eliaspaj problemacunaca chaipichu tucurirca? Ricushun.