Jehová Diosmi Eliastaca ayudarca

Jezabelca Baalpaj profetacuna huañushcata yachashpami yallitaj pꞌiñarirca. Chaimantami shuj huillajta Eliaspajman cachashpaca: ‘¡Baalpaj profetacunata shinallatajmi caya cai horaspajca huañushca cangui!’ nirca. Eliasca achcata mancharishpami desiertopi miticugrirca. Chaipimi: ‘¡Ña mana ahuantanica! Huañusha ninimi’ nishpa Jehovata mañarca. Eliasca yallitaj shaicushca cashcamantami shuj yura ucupi dormirca.

Pero, shuj ángel Eliasta allijlla rijchachishpaca: “Jatari, imallatapish micui” nircami. Chaimi Eliasca rumi jahuapi cunujlla tandata, jarra yacuta ricurca. Chaita micushpa, ubyashpami cutin dormirirca. Cutin ángel rijchachishpami: “Jatari, micui. Achcata viajanarajmi cangui” nirca. Chaimi Eliasca ashtahuan micurca. Qꞌuipaca 40 punllacunata, 40 tutacunata purishpami Horeb urcuman chayarca. Chaipimi dormingapaj shuj jutcuman yaicurca. Jehová Diosca: “¿Elías imatataj caipica ruracungui?” nircami. Eliasca: “Israelitacunaca canhuan ari ninacushcatami saquishcacuna. Shinallataj cambaj altarcunatami urmachishcacuna. Cambaj profetacunatapish huañuchishcacuna. Cunanca ñucatamari huañuchisha nicuncuna” nircami.

Diosca Eliastaca: “Caimanta llujshishpa urcu ñaupajpi shayari” nircami. Chaimi yallitaj sinchi huaira shamurca. Chai qꞌuipaca shuj terremotomi tiyarca. Qꞌuipaca ninami ricurirca. Eliasca allijlla rimashcata uyashpami paipaj ropahuan ñahuita taparishpa jutcu yaicunpi shayarishpa saquirirca. Chaipimi Diosca imamanta miticucushcata tapurca. Eliasca: ‘Ñucallamari saquirishcani’ nircami. Diosca: ‘Mana canllachu cangui, Israelpica 7.000 ñucata adorajcuna tiyanrajmi. Eliseopajman rishpa: “Jehová Diosca ñucapaj randi profeta cachunmi agllarca” nishpa huillagri’ nircami. Eliasca Dios nishcatami utca ruragrirca. ¿Imatataj yuyangui? ¿Jehovata cazujpica cantapish ayudangachu? Ari ayudangami. Cunanca usya punllacunapi ima tucushcata ricushun.