Shuj viudapaj churimi causarirca

Usya punllacunapimi Jehová Diosca Eliastaca: ‘Sarepta puebloman ri. Chaipimi shuj viuda micunata caranga’ nirca. Chai puebloman rishpaca yaicuna pungupi shuj viuda huarmi yantata pallacujtami ricurca. Chaimi vasolla yacuta apamupai nirca. Yacuta apamugricujpimi Eliasca: “Shuj pedazo tandatapish apamupai” nirca. Chaimi viudaca: ‘Ima tandata mana charinichu. Chaimanta imata mana cui tucunichu. Ñucapaj, ñuca churipaj tandata rurangapajllami cutatapish, aceitetapish charini’ nirca. Eliasca: ‘Ñucapaj shuj uchilla tandata rurajpica canmanca Jehová Diosca tamyangacamami cutatapish, aceitetapish cunga’ nircami.

Viuda huarmica paipaj huasiman rishpami profeta Eliasman carangapaj tandata rurarca. Jehová nishca shina viudapish, paipaj churipish tucui usya tiempopimi micunata charirca. Pꞌundumanta harinapish, uchilla pꞌundumanta aceitepish mana tucurircachu.

Qꞌuipaca viudapaj churimi anchata ungushpa huañurca. Chaimi viudaca Eliastaca ayudahuai nishpa rogarca. Eliasca viudapaj rigramanta huahuata japishpami terrazapi tiyaj cuartoman aparca. Huahuata cama jahuapi sirichishpami Eliasca: “Jehová Dioslla, cai huahuapaj causaita tigrachipai” nishpa mañarca. Chaimi huahuaca cutin causai callarirca. Chaica shuj milagromi carca. ¿Imamanta? Jehová Diosca chai punllacamaca ni pita mana causachishcachu carca. Ashtahuanpish viudapish, paipaj huahuapish mana israelitacunachu carca.

Huahua causarishca qꞌuipami Eliasca viudataca: “Ricui, cambaj huahuaca causacunmari” nirca. Paica achcata cushicushpami Eliastaca: ‘Canca Diosta sirvij cashcataca cunanmi yachani. Can nishcacunaca Jehovamantami shamun. Chaimantami siempre pajtarin’ nirca.