Jesusca achca gentecunamanmi micunata cararca

Huata 32-pi Pascuata yuyarina punlla manaraj chayajpimi apostolcunaca predicashpa tigrarcacuna. Shaicushcacuna cajpimi Jesusca Betsaida llajtaman samaringapaj barcopi pusharca. Chaiman chayajpica achca gentecuna paicunata catishcatami Jesusca ricurca. Paica paipaj apostolcunallahuan casha nishpapish gentecunata llaquishcamantami paicunata alli chasquirca. Ungushcacunatapish alliyachishpami tucui punlla Diospaj Gobiernomanta yachachirca. Ña chishiyajpimi apostolcunaca: ‘Gentecunaca yaricachicungami. Micunata randichun cachailla’ nircacuna.

Chashna nijpimi Jesusca: ‘Paicunaca imapaj mana rinachu can, cancunallataj caraichijlla’ nirca. Apostolcunaca: ‘¿Cai tucuicunaman carangapajca maipitaj tandataca randishunyari?’ nircacunami. Chaimi Felipeca: ‘Achca cullquita charishpapish micunata randingapajca mana tucuicunapaj pajtangachu’ nirca.

Chaimi Jesusca: ‘¿Carangapajca imataj tiyan?’ nishpa tapurca. Andresca: ‘Pichca tandacunata, ishqui pescadocunallatami charinchij. Chaillaca mana pajtangachu’ nircami. Chashna nijpimi Jesusca: ‘Chaicunata caiman apamuichij’ nirca. Chai qꞌuipaca maijancunataca 50-pura, caishujcunataca 100-pura tiyarichunmi mañarca. Jesusca tandacunata, pescadocunata japishpami huichilla ricushpa Yaya Diosta mañarca. Qꞌuipaca apostolcunaman micunata cujpimi paicunaca chaupishpa tucui chaipi tiyacujcunaman cararcacuna. 5.000 cꞌaricuna, huarmicuna, huahuacunapishmi mana nijta micurcacuna. Micushca qꞌuipaca apostolcunaca ama ima desperdiciarichunmi 12 canastacunata tandarcacuna. Chai milagrota ricunaca sumajmi cashcanga ¿nachu?

Gentecunaca chai milagrota ricushpami Jesús rey tucuchun munarcacuna. Pero Jesús rey tucuchunca Diosca manaraj munarcachu. Chaitaca Jesuspish allimi yacharca. Chaimi gentecunataca cayacama nishpa cacharca. Apostolcunatapish Galilea cucha chꞌimba ladoman barcopi richij nishpami mandarca. Chai qꞌuipaca paipaj Yayata mañangapajmi Jesusca pailla shuj urcuman rirca. Paica ocupado cashpapish Diosta mañangapajca tiempotami surcuj carca.