“¿Diosca maipishi cashcanga?”
‘CHAI GENTECUNATA HUAÑUCHICUI HORASCA ¿DIOSCA MAIPISHI CASHCANGA?’—Polonia llajtata Papa Benedicto XVI (16) visitacushpami caita nirca. Chaipica casi 70 huatacuna huashamanmi achca gentecunata huañuchircacuna.
LLAQUI ATRASO JAPI HORASCA DIOSCA ÑUCATA CUNGARISHCAMI ¿NINGUICHU?
Sheila huarmica, Estados Unidosmantami can. Paipaj familiaca uchillamantami shuj religión ucupi huiñachirca. Paica: “Ñucaca uchillamantami Dios tucuita rurashcata crij carcani. Shinallataj Dios ñucata ricuj cashcatapish allimi intindircani. Pero Dios ñucata ayudaj cashcataca mana sintircanichu. Ashtahuanpish Diospajca imapish mana vali shina cashcatami sintircani” ninmi. Cai huarmica ¿imamantashi shina yuyashca canga? Paica: “Ñuca familiatami llaqui atraso cada rato japij carca. Chashna llaqui horasca Yaya Dios mana ayudacushcatami sintircani” ninmi.
Ñucanchijpish Sheila huarmi layallatajmi Dios tucui poderyuj cashcataca crinchij. Chashna jahuapish ¿Diosca ñucamanta sustarinchu? nishpami maipica tapurinchij. Job runaca Dios tucui poderta charij cashcata, pailla imatapish yachaj cashcataca allimi intindirca (Job 2:3; 9:4). Chashna yachashpapish Jobca llaqui atrasocunata charishpami, “¿imamantataj cambaj ñahuitaca pacanguiyari? ¿imamantataj ñucataca canta pꞌiñaj cashcata yuyanguiyari?” nishpa Yaya Diosta tapurca (Job 13:24).
¿Dioschu llaquicunata cachan? ¿Diosca tucui gentecunamantachu sustarin? ¿Llaqui atraso horasca Diosca ñucanchijta ayudanchu? Cai tapuicunatami Bibliapi yachai tucunchij.
Yaya Dios rurashcacunata ricushpa, Bibliapi tiyaj yuyaicunata yachashpami Dios canmanta preocuparishcata yachangui. Chaitaca shamuj yachaipimi ricushun (Romanos 1:20). Jehová Diosta alli rijsishpami pai canta dimastij cꞌuyaj cashcataca sintingui (1 Juan 2:3; 1 Pedro 5:7).