¿Profetacunaca imatataj Diosmanta yachachin?
Achca huatacuna huashamanmi Diosca paipaj profetacunata cachashpa valishca huillaicunata gentecunaman huillarca. Profetacuna huillashcacunata liyishpaca, ¿imatataj Diosmanta yachanchij? Diosta alli sirvij quimsa profetacuna ima nishcata yachashun.
ABRAHAM
Diospajca tucuicunami igual canchij. Paica tucuicunatami bendiciasha nin.
Diosca Abrahammanca: “Cai pachapi tucui causajcunaca canmantami alli nishca cangacuna” nircami (Génesis 12:3).
¿Imatataj yachanchij? Diosca tucuicunatami cꞌuyan. Paica paita cazuj cꞌaricunata, huarmicunata, huahuacunatami bendiciasha nin.
MOISÉS
Diosca llaquijmi can. Paica paita rijsisha nijcunatami bendician.
Tucui poderta charij Diosca profeta Moisesmanca milagrocunata rurachunmi poderta curca. Shinapish Moisesca Diostaca: ‘Cambaj ñahuipi alli ricurishpa catingapaj, can ima shina cashcata ñuca alli rijsingapaj cambaj ñanta ricuchichunmi rogani’ nircami (Éxodo 33:13). Moisés chashna mañajpica Diosca achcatami cushicurca. Chaimantami yachaita cushpa pai ima shina cashcata rijsichun ayudarca. Por ejemplo, Tucuita ruraj Diosca “llaquij, cꞌuyaj shungu” cashcatami Moisesca yacharca (Éxodo 34:6, 7).
¿Imatataj yachanchij? Diosca paita rijsingapaj esforzarij cꞌaricunata, huarmicunata, huahuacunatami bendicianga. Paipaj Shimipimi paita ima shina adorachun munashcata, pai ñucanchijta bendiciasha nishcata yachachin.
JESÚS
Jesusca llaquij cashpami tucui laya ungüicunata jambirca.
Jesús imalla rurashcata, imalla yachachishcata yachajpimi Diosca ñucanchijta huiñaicama bendicianga.
Diospaj Shimipimi Jesuspaj causaimanta, pai imallata yachachishcamantaca achcata parlan. Yaya Diosca ciegocunata, sordocunata, mana purij tucujcunata jambichunmi Jesusmanca poderta curca. Hasta huañushcacunata causachichunmi poderta curca. Chaita rurashpami Jesusca shamuj punllacunapi Yaya Dios ñucanchijpaj imalla ruragrishcata ricuchirca. Shinallataj Jesusca cai bendicioncunata chasquingapaj imata rurana cashcatami yachachirca. Paica: “Huiñai causaita charinaca cashnami: Diostajca can cashcata rijsinami, Jesucristopish can cachashca cashcata crinami” nircami (Juan 17:3, QC, 1989).
Jesusca llaquij, cꞌuyaj, shujtajcunata alli tratajmi carca. Chaimantami chꞌican chꞌican edadta charij cꞌari huarmicuna pai invitashcata chasquircacuna. Paica: “Ñuca yachachishcata catichij. Ñucaca mana pꞌiñarij, alli shungumi cani. Ñucamantami cancunapaj almaca samaringa” nircami (Mateo 11:29, QC, 1989). Jesús causashca punllacunapimi huaquin cꞌaricunaca huarmicunataca maipish cachun tratajcuna carca. Pero Jesusca huarmicunataca cꞌuyaihuan, respetohuanmi trataj carca.
¿Imatataj yachanchij? Jesusca gentecunataca achcatami cꞌuyaj carca. Shinallataj caishuj chaishuj ima shina tratana cashcatami paipaj ejemplohuan yachachirca.
JESUSCA MANA DIOSCHU CAN
Diospaj Shimipica, “shujlla Taita Diosmi tiyan”, Jesucristopish Diosmanta huillajmi can ninmi (1 Corintios 8:6). Jesusca Diosca paita yalli cashcata, Dios paita cai Allpaman cachashcatami nirca (Juan 11:41, 42; 14:28).a