“Allpaca pꞌucungami. Taita Diosca alli cashca cachun ningami. Paica ñucanchij Taita Diosmari” (SALMO 67:6).
Diospaj bendicioncunata chasquishpa huiñaita cushilla causai
Diosca profeta Abrahammanca, cambaj huahua huahuacunamanta shamuj shujmantami “tucui cai pachapi causajcunapish” bendiciashca canga nircami (Génesis 22:18). ¿Pimantataj parlacurca?
Jesusmi Abrahampaj huahua huahuacunamanta carca. Casi 2 mil huatacuna huashamanmi Diosca milagrocunata rurai tucuna poderta Jesusman curca. Chai milagrocunata rurashpami Jesusca Dios Abrahamman cusha nishcacuna paimanta pajtarina cashcata ricuchirca (Gálatas 3:14).
Jesuspaj milagrocunaca Yaya Dios tucuicunata bendiciangapaj paita agllashcata gentecuna intindichunmi ayudarca. Chai milagrocunaca Dios shamuj punllacunapi gentecunata huiñaicama bendiciachun Jesusta agllashcatapishmi ricuchirca. Jesús rurashca milagrocuna paimanta imata yachachishcata ricushun.
Jesusca cꞌuyajmi carca. Paica ungushcacunatami alliyachirca.
Shuj cutinpica lepra ungüihuan caj runami Jesustaca: “Ñucata alliyachisha ninguipishchari” nishpa rogarca. Chaimi Jesusca paita tuparishpaca: “Ari, alliyachisha ninimi” nirca. Chaimi lepra ungüica chai rato anchurca (Marcos 1:40-42).
Jesusca generosomi carca. Yaricaihuan cajcunamanmi cararca.
Jesusca gentecuna yaricaihuan pasachunca mana munarcachu. Huaquinpica asha tandahuan, asha pescadocunallahuanmi achca gentecunaman shuj milagrota rurashpa cararca (Mateo 14:17-21; 15:32-38). Jesús carashcamantami gentecunaca mana nijta micurca y achca micunapishmi sobrarca.
Jesusca llaquijmi carca. Huañushcacunatami causachirca.
Shuj cutinpica shuj viuda huarmipaj shujlla churimi huañushca carca. Chaimantami chai huarmitaca mana pi cuidaipaj carca. Jesusca achcata llaquirishpami chai joventa causachirca (Lucas 7:12-15).