JESÚS SHINA CAUSASHUNCHIJ
Jehová Dios mandashcata cazushunchij
Jehová Diosmi ñucanchij ima shina causana cashcataca yachachin. Por ejemplo, shuj cꞌarihuan shuj huarmihuan cazarachunmi Diosca mandan (Mt 19:4-6, 9). Shinallataj huainayashpa causajcunatapish Diosca millanayachinmi (1Co 6:9, 10). Ñucanchij churashca ropa ima shina cana cashcata, mana maipish cachun purichunpish Bibliaca consejocunatami cun. Ñucanchij churarishca ropaca Diosta servijcuna cashcatami ricuchina can (Dt 22:5; 1Ti 2:9, 10).
Cunan punllacunapica achca gentecunami Dios mandashcacunataca mana cazusha nincuna (Ro 1:18-32). Cunanlla llujshishca ropacunaca pinganai ropacunami can. Gentecunaca chai pinganai ropacunata churashpami pinganaita allichirincuna. Paicunaca millaita rurashpami cushicuncuna. Chaimantami Diosta cazushpa causajcunataca pꞌiñancuna (1Pe 4:3, 4).
Testigo de Jehovacunaca Dios ima shina causachun munashcatami mana manchashpa shujtajcunaman huillana canchij (Ro 12:9). Dios imata munashcataca cꞌuyaihuan, respetohuanmi yachachina canchij. Ñucanchijpish Dios munashca shinami causana canchij. Por ejemplo ima laya ropata churarinata agllacushpaca: “¿Dios mandashcacunatachu cazucuni o cai pachapaj yuyaicunatachu caticuni? ¿Ñuca churashca ropa, ima shina allichirishcapish Diosta servij cashcatachu ricuchin?” O televisionpi shuj programata o peliculata ricunata agllacushpaca: “¿Ñuca ricugrishcataca Diosca munangachu? ¿Cai peliculaca imatataj yachachin? ¿Diosmanta caruyachi tucunchu? (Sl 101:3). ¿Ñuca ima ricunata agllashcataca ima shinashi ñuca familiapish shujtajcunapish ricunga?” nishpa tapurishun (1Co 10:31-33).
¿Dios mandashcacunata cazunaca imamantataj minishtirishca can? Jesucristoca ñallami tucui llajtacunata paicunapaj millai ruraicunandij tucuchinga. Chaipica Diosta cazujcunallami quishpiringa (Eze 9:4-7; 1Jn 2:15-17). Chaimanta Dios mandashcacunata tucui shunguhuan cazushpa causashunchij. Chashnami shujtajcuna ñucanchijta ricushpaca Jehová Diosta jatunyachingacuna (1Pe 2:11, 12).
¿Ñuca churashca ropaca Diosta cazucushcatachu ricuchin?
JEHOVAPAJ AMIGO TUCUI: DIOSCA CꞌARITA HUARMITAMI RURARCA NISHCA VIDEOTA RICUSHPA CAI TAPUICUNATA CUTICHI:
¿Imamantataj Jehová Diospaj mandashcacunata cazuna canchij?
¿Yaya mamacunaca imamantataj huahuacunaman uchillamantapacha Dios imata mandashcata yachachina can?
¿Jovencunapish yuyajcunapish Dios cusha nishcacunataca ima shinataj gentecunaman yachachi tucunchij?