Alli decisioncunata agllanataca canmi ricuna cangui
Ñucanchij decidishcacunami alli causaita o mana alli causaita cunga. Jehová Diosca chaita yachashcamantami pai mandashcacunata cazushpa causachun munan.
Jehová Diosca sumajta causachunmi munan
“Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani. ¡Ñuca mandashcacunata can cazushca cajpica, tucuipi can ima shinalla canaca jatun yacu shinami canman! Can cashcata ruranaca mama cucha yacu jataricuj shinami canman” (Isaías 48:17,18).
Causaipica chꞌican chꞌican decisioncunatami agllai tucunchij. Pero Jehová Diosca ñucanchijta rurashcamantami cushilla causachun ima decisioncunata agllana cashcata alli yachan. Chaimantami pai mandashcacunata cazuchun munan. Pai mandashcacunata cazushpaca alli decisioncunatami agllashun. Chashnami sumajta causashun.
Jehová Diosca ñucanchij rurai pudishcallatami mañan
“Cunan ñuca cancunata mandashca cai mandashcacunaca jahualla pajtachinallamari, pipish pajtachi tucunllami. Cancunamanta mana carupichu” (Deuteronomio 30:11).
Dios mandashca shina causangapajca ñucanchij yuyaita, ruraicunatachari cambiana canchij. Jehová Diosca ñucanchijta rurashcamantami cada uno imata rurai tucushcata yachan. Chaimantami ñucanchij pajtachi pudishcallata mañan. Paita alli rijsishpaca paipaj mandashcacunata pajtachina mana sinchi cashcatami cuentata cushun (1 Juan 5:3).
Jehová Diosca pai mandashcacunata cazujcunataca ayudasha ninmi
“Mandaj Dios ñuca cambaj Taita Dios cashcamanta cambaj alli maquipi charishpa pushaj cashcamanta: Ama manchaichu, ñucami cantaca ayudasha” (Isaías 41:13).
Diospaj ayudahuanmi pai munashca shina causai tucunchij. Paica paipaj Shimihuanmi ñucanchijmanca ánimo, esperanzatapish cun.
Muyundij allpapi achca gentecunami Dios mandashca shina causana alli cashcata yachashcacuna. ¿Bibliapi tiyaj consejocunamanta ashtahuan yachasha ninguichu? Callaringapajca Huiñai huiñaita cushilla causai nishca folletotami yachai tucungui. Caitaca jw.org paginapimi gratis descargai tucungui. Cai folletoca quimsa yachaicunatami charin:
¿Bibliata yachashpaca ima shinataj causangui?
Bibliapica cushilla causai tiyanatami huillan
Biblia nishcacunapimi confiai tucungui
Bibliata yachacushpaca chaipi tiyaj consejocuna cunan punllacunapajpish, huiñai huiñaipajpish ayudaj cashcatami cuentata cungui (Salmo 111:8). Bibliapi tiyaj consejocunata cazushpaca cushilla, allimi causashun. Shinapish Yaya Diosca pai mandashcacunata cazuchunca mana obliganchu (Deuteronomio 30:19, 20; Josué 24:15). Diosta cazunata o mana cazunataca cada unomi decidina canchij.