¿Diosca imamantataj mana tucui mañashcacunata cutichin?
Jehová Diosca ñucanchij shungumanta mañashcacunatami uyanata munan. Shinapish paica mana tucui mañashcacunatachu cutichin. ¿Imamanta? Diosta mañacushpaca ¿imatataj yuyaipi charina canchij? Bibliapi ima nishcata ricushun.
“Mañacushpaca cutin cutin ama chaillatataj rimarishpa mañaichijchu” (Mateo 6:7).
Jehová Diosca de memoria oracioncunata nichun, shuj libropi oracioncunata liyishpa mañachunca mana munanchu. Paica ñucanchijcuna shungumanta parlachunmi munan. Caipi yuyashun: Shuj amigo tucui punllacuna chaillatataj chaillatataj parlajpica shaicunchijmanmi ¿nachu? Alli amigocunaca achca cosascunatami shungumanta parlancuna. Jehová Dioshuan ñucanchij shungumanta parlashpaca pai ñucanchij alli amigo cashcatami ricuchishun.
“Mañashpapish mana chasquinguichijchu. Mana alli yuyaihuan mañashcamantami mana chasquinguichij” (Santiago 4:3).
Dios imata mana munashcata yachashca jahua paita mañajpica mana uyangachu. Por ejemplo, ¿pugllashpa cullquita ganangapaj suerteta cuhuai nishpa mañajpica Diosca uyangachu? Diosca charijyana munaicunata ama charichun, suertepi ama crichunmi mandashca (Isaías 65:11; Lucas 12:15). Chaimantami chai laya mañashcacunataca mana uyanga. Ñucanchij mañashcacunata pai uyachunca paipaj munai maijan cashcatami Bibliapi yachana canchij.
“Mandashcata mana uyasha nijtaca, pai mañashcatapish Diosca manataj uyanachinchu” (Proverbios 28:9).
Ñaupa punllacunapica Diosca paipaj mandashcacunata mana cazujcunapaj mañashcataca mana uyarcachu. Diosca mana cambiashcachu (Isaías 1:15, 16; Malaquías 3:6) Chaimantami Dios ñucanchijta uyachunca paipaj mandashcacunata cazungapaj esforzarina canchij. Pero ñucanchij causaipi ima mana allicunata rurashca cajpica, ¿Diosca ña mana nuncachu ñucanchij mañashcata uyanga? Diosca ñucanchij juchacunamanta arrepintirijpi, paipaj munaita rurangapaj esforzarijpica perdonashpami ñucanchij mañashcatapish uyanga (Hechos 3:19).