Tucuicunami alli causaita mashcancuna
¿Shamuj punllacunapica canpish, cambaj familiapish ima shina causanatataj munanguichijman? Seguromi canca tranquilo, alli saludhuan, cushilla causanata munangui. Alli causaita charinataca tucuicunami munanchij.
Shinapish achcacunaca, alli causaita charinaca sinchimi can nishpami yuyancuna. Ñucanchij causaica rato cambiajlla cashcamantami chashna yuyancuna. Por ejemplo, COVID-19 ungüimantami achca gentecunapaj causaica cambiashca. Maijancunaca cullqui illajmi saquirishcacuna. Cutin shujtajcunacarin huañushcacunami. Chaimantami achcacunaca, chashna alli causaitaca nunca mana charishunchu nishpa yuyancuna.
Chashna llaquicuna ñapish ricurishcamantami achca gentecunaca alli causaitaca tucui layata rurashpa mashcacuncuna. Por ejemplo, maijancunaca destinopi, suertepimi crincuna. Shinallataj achcacunaca alli titulota charishpa, achca cullquita charishpa alli causanatami mashcancuna. Cutin shujtajcunaca, alli persona cashpami alli causaitaca charishun nishpami yuyancuna.
¿Pero ciertochu chaicunaca alli causaita cui tucun? Chaicunamanta yachangapajca caicunapi yuyai:
¿Shamuj punllacunapi alli causangapajca imatataj rurana cangui?
¿Shuj titulota charina, cullquiyuj canaca alli causachunchu ayudanga?
¿Alli persona canaca alli causachunchu ayudanga?
¿Shamuj punllacunapi cushilla causangapajca imataj ayudanga?
Cai revistami cai tapuicunamanta yachangapaj ayudanga.