¿SHUJTAJCUNATA AMA PꞌIÑANGAPAJCA IMATATAJ RURANA CANCHIJ?

4 | Diospaj ayudata mashcai

Bibliapica cashnami nin:

“Espiritupaj granoca cꞌuyaimi, cushimi, sumaj causaimi, mana utca pꞌiñarinami, alli shungumi, alli cajmi, crijmi, manso shungumi, quiquinllataj jarcarijpishmi” (GÁLATAS 5:22, 23).

¿Imatataj nisha nin?

Shujtajcunata pꞌiñanata saquichunca Yaya Diosmi ayudai tucun. Diospaj espíritu santomi alli cualidadcunata charichun ayudai tucun. Chaimantami ñucanchij fuerzallahuan shujtajcunata pꞌiñana yuyaicunata mishanapaj randica Diospaj ayudata mashcana canchij. Chaita rurashpaca apóstol Pablo layami sintirishun. Paica: “Dios poderta cujpimi ñucaca tucuita rurangapaj fuerzata charini” nircami (Filipenses 4:13, NWT). Chashnami “ñucapaj ayudaca Mandaj Diosmantamari shamun” nishun (Salmo 121:2).

Caita rurai:

“Ñaupaca pꞌiñaj runami carcani. Pero Jehová Diospaj ayudahuanmi cunanca shujtajcunahuan sumajta apanacushpa causani” (WALDO)

Alli cualidadcunata charingapajca Jehová Diosta paipaj espíritu santohuan ayudachun mañai (Lucas 11:13). Shujtajcunata ama pꞌiñangapajca cꞌuyaj, tucuicunahuan sumajta causaj, mana utca pꞌiñarij, ñucanchijllataj jarcarijmi cana canchij. Chai cualidadcunamanta Biblia ima yachachishcata yachashpa cambaj causaipi pajtachi. Shinallataj cai cualidadcunata pajtachijcunahuan apanacungapaj esforzari. Chashnami paicuna shina shujtajcunaman cꞌuyaita ricuchishpa allita ruranata munangui (Hebreos 10:24).

Experiencia: WALDO

Shujtajcunata pꞌiñanata, llaquichinatami saquirca

Waldoca huahuamantapachami sinchi causaita charirca. Chaimantami shujtajcunata pꞌiñashpa causarca. Paica: “Drogacunata cꞌatujcunahuanmi siempre callecunapi macanacushpa pasaj carcani. Shuj punllaca, shuj pandillaca ñucata huañuchichunmi shuj millai runaman pagarca. Chai runa ñucataca cuchillohuan chugrichijpipish miticushpami rircani” ninmi.

Waldoca testigo de Jehovacunahuan paipaj huarmi Bibliata yachachunca mana munarcachu. Paica: “Ñucaca paicunata achcata pꞌiñashcamantami mapa shimicunata caparishpa rimaj carcani. Pero paicunaca ñucahuanca mana pꞌiñarijcunachu carca” ninmi.

Asha tiempo huashaca Waldopishmi Bibliata estudiai callarirca. Paica: “Ima yachashcacunata practicapi churanaca sinchimi carca. Ñucaca pꞌiñaj canataca mana nunca saqui tucushachu nishpami yuyaj carcani” ninmi. Pero Bibliapi tiyaj shuj versomi paitaca achcata ayudarca.

Waldoca: “Shuj cutinca ñucaman Bibliamanta yachachij Alejandromi Bibliapi Gálatas 5:22, 23-ta liyichun mañarca. Paica cai sumaj cualidadcunata charingapaj mana ñuca fuerzallapi confiana cashcata, ashtahuanpish Diospaj espíritu santopi confiana cashcatami intindichirca. Chaimi Diospaj ayudahuan pꞌiñaj canata saqui tucushcata intindircani” ninmi.

Waldoca Dios paita ayudachun saquishcamantami shujtajcunata pꞌiñanata saquirca. Paica: “Ñuca familiacuna, amigocunapish ñuca ima shina cambiashcata ricushpaca achcatami mancharincuna. Ñaupaca pꞌiñaj runami carcani. Pero Jehová Diospaj ayudahuanmi cunanca shujtajcunahuan sumajta apanacushpa causani” ninmi.