1 | Diosta mañai: ‘Cambaj tucui preocupacioncunataca paiman mingai’

BIBLIAPICA CASHNAMI NIN: ‘Cancunapaj tucui preocupacioncunataca Diosman mingaichij. Paica cancunamanta sustarinmi’ (1 PEDRO 5:7).

¿Caica imatataj nisha nin?

Ima llaquipi cajpi, ima preocupacionhuan cajpica Yaya Diosca paita mañachunmi munan (Salmo 55:22). Shuj jatun o uchilla problemamanta sustarishca cajpica Diostami ayudachun mañana canchij. Paipish ñucanchijmanta sustarishpami ayudanlla. Shinaca ñucanchij yuyaipi, shungupi tranquilo sintiringapajca puntapica Yaya Diostami mañana canchij (Filipenses 4:6, 7).

¿Bibliapaj consejocunaca ima shinataj ayudan?

Ñucanchij yuyaipi yallitaj sustarishca cajpi o dimastij llaquilla sintirijpica, shujtajcunaca ñucataca mana intindingachu nishpami yuyanchij. Chaimantami sololla shina sintirinchij (Proverbios 14:10). Pero Dios ñucanchijta alli intindinata yachashpaca paimanca tucuitami huillai tucunchij. Jehová Diosca ñucanchijtaca ricuracunmi. Ñucanchijcuna llaquilla sintirishcata, ima llaquicunahuan chꞌimbapuracushcatami yachan. Chaimantami paica tucuita huillashpa mañachun munan (2 Crónicas 6:29, 30).

Diosta mañashpaca pai ñucanchijta cuidanapimi ashtahuan confianchij. Ñucanchijpish Salmota quillcaj runa shinami sintirishun. Paica: “Quiquinca ñuca llaquihuan cajtami ricushcangui. Ñuca alma llaquihuan huañucujtami rijsingui” nircami (Salmo 31:7). Jehová Dios ñucanchijmanta preocuparij cashcata yachashpami ñaupajman catingapaj fuerzata japinchij. Pero paica mana ñucanchijta ricurashpallachu saquirin. Ashtahuanpish paica Bibliapaj cushichij yuyaicunahuanmi ñucanchijtaca ñaupajman catichun ayudan.

¿Juliantaca Bibliaca ima shinataj ayudan?

Ansiedad ungüimi ñucata llaquichin

“Punllantami ansiedad ungüita charini. Shinallataj manapish yuyashcapimi llaquichij yuyaicuna shamujpi dimastij preocuparini. Por ejemplo, maipica tranquilomi sintirini. Pero imamantapish ratomi yallitaj sustari callarinilla. Shujtajcunahuan cashpacarin ñucata riparanata yuyashpami ashtahuan preocuparini.

Ñuca ungüi ima shina cashcata intindijcunaca ñucata ayudanatami munancuna. Pero maipica paicunaca ñuca mana shuyashca shinami parlancuna. Shina cajpipish paicuna ñucata animachingapaj esforzarishcamantami agradicini.

Maipica ñuca ungüimantami Diosta mañanaca mana jahualla can. Por ejemplo, imata yuyacushpaca ratomi ima shujtajcunata yuyanilla. Chaimantami Yaya Diosta ñuca tucui yuyaihuan mañangapaj achcata esforzarina cani. Ñuca yuyaicunata mana ordenpi charishpaca Jehová Diosmanca ñuca ima shina sintirishcataca mana huillai tucunichu”.

Bibliami ñucata ayudan

“Bibliapica Yaya Dios ñucata uyachunca mana achca shimicunata o sumaj shimicunallata nina cashcatami intindishcani. Maipica Jehová Diosman ñuca ima shina sintirishcata mana tucuita huillai tucushpaca, ‘Jehová Dios, ñucata ayudahuai’ nishpallami mañani. Ñuca chaillata nijpipish Jehová Dios ñucata intindishcatami yachani. Ñuca minishtishcata cushcatapishmi ricushcani. Diosta mañashpapish doctorcunapaj ayudatapishmi mashcashcani. Chaimantami ashtahuan alli sintirini. Ñucaca Jehová Diospajman cꞌuchuyangapajca achcatami esforzarina cani. Pero Jehová Dios ñucata cꞌuyashcata, ñucata ayudasha nishcata yachashpami chaitaca cushicuihuan rurani”.