Alli decisioncunata agllachunca Bibliami ayudai tucun

Ñucanchij yuyashca shina o shujtajcuna yuyashca shina imamanta mana decidina cashcatami Bibliaca yachachin. Chashnallataj alli decisioncunata agllashpa cushilla causangapaj imata rurana cashcatami yachachin.

DIOS YACHACHICHUNMI MINISHTINCHIJ

Gentecuna paicunallataj imata decidinapaj randi Jehováa Diospaj ayudata mashcana cashcatami Bibliapica yachachin (Jeremías 10:23). Paica tucui gentecunata cꞌuyashcamantami ñucanchij mana alli decidishcacunahuan llaquipi ama urmachun Bibliapi consejocunata cushca (Deuteronomio 5:29; 1 Juan 4:8). Ashtahuancarin pai ñucanchijta ruraj cashcamantami tucuita alli yachan. Shinallataj ñucanchijta alli rijsij cashcamantami ima alli cashcata yachan (Salmo 100:3; 104:24). Shinapish pai mandashca shina causachunca pita mana obliganchu.

Jehová Diosca punta cꞌari Adanman, paipaj huarmi Evamanca cushilla causachunca tucui minishtishcatami curca (Génesis 1:28, 29; 2:8, 15). Chashnallataj paita cazuchunca mana sinchi mandashcacunatami curca. Diosca pai mandashcacunata cazunata o mana cazunata paicunallataj agllachunmi saquirca (Génesis 2:9, 16, 17). Pero cazunapaj randica paicuna munashca shinami causanata decidircacuna (Génesis 3:6). Chaimanta ¿allichu causarcacuna? Mana. Callari pachamanta cunan punllacunacama gentecuna Dios mandashcata mana cazushcamantami llaquilla causashcata tucuicuna ricunchij (Eclesiastés 8:9).

Maimanta cashpapish Bibliapi tiyaj consejocunata cazushpaca alli decisioncunatami japishun (2 Timoteo 3:16, 17; “Bibliaca tucuicunapaj shuj alli libromi” nishca recuadrota ricui). Biblia ima shina tucuicunata ayudaj cashcata ricushun.

Biblia imamanta “Diospaj Shimi” cashcata ashtahuan yachangapajca ¿Bibliataca pitaj rurarca? nishca videota jw.org paginapi ricui (1 Tesalonicenses 2:13).

MAIJANCUNACA BIBLIA MANA AYUDAI TUCUSHCATAMI YUYANCUNA

Maijancunaca Bibliapi tiyaj consejocuna mana ayudai tucushcatami yuyancuna. Paicunaca caitami nincuna:

Huaquincunaca: “Bibliamanta huaquin versocunapica shuj yuyaitami nin, cutin shujtaj versocunapica chaillatatajmi contradicin” nincunami.

Chaica mana ciertochu: Gentecunaca huaquinpica shuj versohuan caishuj versohuan chꞌimbapurashpaca mana igual cashcata ricushpami Biblia contradicicushcata yuyancuna. Pero chai versocunata pi escribishcata, ima horas escribishcata analizashpami mana contradicishcata yachanchij.

Biblia mana contradicishcata yachangapajca jw.org paginapi “¿Se contradice la Biblia?” temata liyi.

Huaquincunaca: “Bibliamanta yachanimi nij gentecunaca huaquinpica mana allicunatami rurancuna. Chaimanta Bibliaca mana ayudai tucunchu” nincunami.

Chaica mana ciertochu: Bibliapi nishcacunata gentecuna mana cazushcamantaca Bibliaca mana culpata charinchu. Bibliallapitajmi achca gentecunapish, religionta pushajcunapish mana allicunata rurana cashcata huillan. Paicunapaj culpamantami achcacunaca Bibliapi yachachishcacunamanta “llaquichij shimicunahuan” rimancuna (2 Pedro 2:1, 2).

Achca religionta pushajcuna mana allicunata ruracushcata yachangapajca jw.org paginapi “La religión, ¿un gran negocio?” temata liyi.

Huaquincunaca: “Bibliamanta yachajcunaca paicuna shina mana yuyashcamanta shujtaj gentecunataca mana respetanchu” nincunami.

Chaica mana ciertochu: Bibliapica shujtajcunata respetohuan tratachunmi yachachin. Por ejemplo:

Shujtajcuna ñucanchijta yalli cashcata yuyachun, humilde cachunpishmi Bibliaca animan (Filipenses 2:3).
Shujtajcuna ñucanchij shina crishcacunata mana charijpipish paicunata igual tratachunmi Bibliaca animan (1 Pedro 2:17).
Bibliaca can yuyashca shina shujtajcunatapish yuyachun obliganami cangui nishpaca mana yachachinchu (Mateo 10:14).

Dios tucui gentecunata cꞌuyaihuan, cashcata rurashpa trataj cashcatami huillan. Ñucanchijpish shujtajcunata chashnallataj tratachun munashcatami Bibliaca yachachin (Romanos 9:14).

Caimanta ashtahuan yachangapajca jw.org paginapi “¿Nos ayuda la Biblia a ser tolerantes?” temata ricui.

BIBLIAPICA DIOS IMATA RURACHUN MUNASHCATAMI HUILLAN

Dios ima shina gentecunata trataj cashcataca tucuitami Bibliaca huillan. Bibliata alli estudiashpami Dios imata munashcata, imata mana munashcata yachashun (Salmo 19:7, 11). Chashnami siempre alli decisioncunata agllashun.

Por ejemplo, Proverbios 13:20-pica: “Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman” ninmi. Cai consejoca ñaupa punllacuna shinallatajmi cunan punllacunapish valishca can. Bibliaca alli yachaicunahuan, valishca consejocunahuan jundami. “Bibliapi tiyaj consejocunaca siempremi ayudan” nishca recuadrota ricui.

Tapurishcanguichu, ‘Bibliapi tiyaj consejocuna ñucanchijta ayudai pudishcataca, ¿imamantataj seguros canchij?’ Catij yachaipimi Bibliapi tiyaj consejocuna ima shina shujtajcunata ayudashcata yachashun.

a Diospaj shutica Jehovami can (Salmo 83:18).

BIBLIAPI TIYAJ CONSEJOCUNACA SIEMPREMI AYUDAN

Biblia casi 2.000 huatacuna huashaman escribishca cajpipish chaipi quillcashca consejocunaca cunancamami ñucanchijta ayudan. Gentecunaca tucui tiempomi cushi alli causaita mashcashcacuna (Eclesiastés 1:9). Caita pajtachichunca Bibliapaj consejocunami ayudan.

Honrado cana

“Tucuipi allita rurashpami causasha ninchij” (Hebreos 13:18).
“Shuhuajpish ama ashtahuan shuhuashpa catichun. Ashtahuanpish quiquin maquihuan allita rurashpa sinchita trabajachun” (Efesios 4:28).

Shujtajcunahuan alli apanacuna

“Quiquinlla alli canata mashcanapaj randica, shujtajcunapaj allita mashcashpa catichij” (1 Corintios 10:24).
“Caishuj chaishuj ahuantanacushpa catichij. Maijanpish cancunata llaquichijpica shungumanta perdonanacuichij” (Colosenses 3:13).

Decidicushpa

“Yachai illaj runaca imata nijpipish, crishpa catinllami. Ashtahuanpish yachajcunaca imata rurangapajpish, alli yuyarinrajmi” (Proverbios 14:15).
“Alli yuyaiyuj runaca, ima llaqui japina cajpica anchurinmi. Ashtahuanpish yachai illaj runaca, quiquin chaquihuan llaquipi yaicunllami” (Proverbios 22:3).