YACHAI 7
CANTO 15 ¡Diospaj punta Churita alabashunchigari!
¿Jehová Diosca cantaca ima shinataj perdonan?
“Canca ñucanchij juchacunataca de verdadmi perdonashcangui” (SALMO 130:4, NWT).
CAITAMI YACHASHUN
Bibliapica huaquin chꞌimbapuraicunahuanmi Jehová Dios cada unota ima shina perdonaj cashcata intindichin. Chaicunata yachashpami Jehová Dios ñucanchijta perdonashcamanta agradicishun.
1. ¿Shujtajcuna ñucanchijta de verdad perdonashcata yachanaca imamantataj maipica sinchi can?
SHUJTAJCUNATA llaquichishcamantaca llaquillachari sintirinchij. Pero “cantaca perdonanimi” nijpica ¿manachu tranquilo sintirinchij? Shinapish ¿chaita nishpaca paica imatashi nisha nicurca? Tal vez paica alli amigocuna cashpa catinatami nisha nicushcanga. Mana cashpaca perdonashpapish ña mana ñaupa shina alli apanacunatami nisha nicushcanga. Caipi ricushca shinaca shujtajcuna ñucanchijta de verdad perdonashcata yachanaca maipica sinchimi can.
2. ¿Bibliapica Jehová Diospaj perdonmanta parlashpaca imatataj nin? (Notatapish ricui).
2 Jehová Diosca gentecuna shinaca mana perdonanchu. Chaimantami Salmota quillcaj runaca: “Canca ñucanchij juchacunataca de verdadmi perdonashcangui” nirca (Salmo 130:4, NWT).a Caipi ricushca shinaca Yayitu Diosllami shungumanta perdonan. Chaimantami ‘de verdad perdonanata’ yachangapajca paimanta yachana canchij. Ñaupa Testamentota quillcajcunaca Jehová Dios perdonaj cashcata parlangapajllami huaquinpica shuj palabrata utilizarcacuna. Pero gentecunapaj perdonmanta parlangapajca chai palabrataca mana utilizarcacunachu.
3. ¿Jehová Diosca gentecuna shinachu perdonan? (Isaías 55:6, 7).
3 Jehová Diosca pita perdonashpaca tucui paipaj juchacunata borraj shinami cutin paihuan alli apanacuchun saquin. Yayitu Diosca shungumantami tucui juchacunata perdonan. Chaica alajami can (Isaías 55:6, 7-ta liyipai).
4. ¿Jehová Dios pai ima shina perdonaj cashcata alli intindichunca imatataj rurashca?
4 Jehová Diosca gentecuna shinaca mana perdonanchu. Chaimantami pai ima shina perdonaj cashcataca ñucanchijllaca mana intindi tucunchij. Pero Jehová Diosca alaja chꞌimbapuraicunahuanmi ima shina perdonaj cashcata Bibliapi yachachishca. Chaicunata yachashpami Jehová Dios juchata anchuchingapaj, ñucanchijta perdonangapaj, shinallataj ñucanchijcuna paihuan cutin alli apanacuchun tucui imata rurashcata alli intindishun. Ashtahuanpish cꞌuyaj Yaya Diostaca ashtahuanmi valorashun.
JEHOVÁ DIOSCA ÑUCANCHIJ JUCHACUNATAMI APASHPA RIN
5. ¿Jehová Diosca ñucanchij juchacunataca ima shinataj perdonan?
5 Bibliapica ñucanchij juchacunamanta parlashpaca huaquinpica llashaj quipi shina cashcatami nin. Por ejemplo, rey Davidca: “Ñucallataj millaita rurashcamari ñuca uma jahuapi llapishpa caticun. Llashaj quipi shinamari ñuca jahuapi llapishca caticun” nircami (Salmo 38:4). Pero Salmo 25:18 y 32:5-pi nishca shinaca Jehová Diosca paicunapaj juchacunamanta arrepintirijcunatami perdonan. Hebreo rimaipi “perdonan” nishpaca “alzan” o “apan” ninmi. Shinashpaca Jehová Diosca shuj sinchi runa shinami ñucanchij apacushca juchacunataca apashpa rin.
‘Perdonan’ (Salmo 32:5).
6. ¿Jehová Diosca ñucanchij juchacunataca maimantaj apan?
6 ¿Jehová Diosca maimantaj ñucanchij juchacunataca apashpa rin? Chaita alli intindingapajca Salmo 103:12-pi shuj chꞌimbapuraita ricushun. Chaipica: ‘Inti llujshinmanta, inti huashicuncamaca yallitaj carumari. Chai shinallatajmari Diosca ñucanchij juchacunatapish caruyachirca’ ninmi. Inti llujshin ladoca inti huashicun ladomantaca carupimi can. ¿Chaimantaca imatataj yachanchij? Jehová Diosca ñucanchij juchacunata perdonashpaca yallitaj caruman apashca shinami can. Chaita yachashpaca, ¿manachu cushilla sintirinchij?
“Inti llujshinmanta, inti huashicuncamaca yallitaj carumari” (Salmo 103:12).
7. ¿Jehová Diosca ñucanchij juchacunahuanca imatataj ruran? (Miqueas 7:18, 19).
7 ¿Jehová Diosca ñucanchij juchacunata apashpa rishpaca chaicunahuanchu saquirin? Mana. Chaimantami mandaj Ezequiasca: “Ñuca tucui juchacunataca cambaj huashamanmi shitarcangui” nirca (Isaías 38:9, 17). Shinashpaca ñucanchij juchacunamanta arrepintirijpica Jehová Diosca chai juchacunata japishpa caruta shitashca shinami can. Chaimantami chai juchacunataca ña mana nunca ricun. Isaías 38:17-taca cashna nishpapishmi traducishcacuna: “Canca ñuca ima juchatapish nunca mana rurashca layami ñucataca ricungui”. Cai yuyaita ashtahuan intindingapajca Bibliapi shujtaj chꞌimbapuraita ricushun (Miqueas 7:18, 19-ta liyipai). Ñaupa punllacunapica ima cosastapish jatun mama cuchaman shitajpica cutin ña mana japi tucunallami carca. Chai shinallatajmi Jehová Diosca tucui ñucanchij juchacunataca mama cucha ucuman shitaj shina perdonan.
“Ñuca tucui juchacunataca cambaj huashamanmi shitarcangui” (Isaías 38:17).
“Ñucanchij juchacunatapish mama cucha ucumanmi shitanga” (Miqueas 7:19).
8. ¿Caicamaca imatataj yachashcanchij?
8 Caipi yachashca shinaca ñucanchij juchacunaca llashaj quipita aparicushca shinami can. Shinapish Jehová Diosca ñucanchij juchacunata perdonashpaca chai llashaj quipita anchuchishpa apashpa rishca shinami can. Chaimantami Davidca: “Mana allita rurajcunaca paicunata perdonashcamantami cushicuncuna. Juchata rurajcunapish paicunapaj juchacunata perdonashcamantami cushicuncuna. Shuj runaca paipaj juchacunata Jehová Dios mana yuyarijpimi cushicun” nirca (Romanos 4:7, 8). Shinaca Jehová Diosca de verdadtajmi perdonan.
DIOSCA ÑUCANCHIJ JUCHACUNATAMI CHINGACHIN
9. ¿Diosca ima shina perdonaj cashcata intindichingapajca ima chꞌimbapuraicunatataj churarca?
9 Jehová Dios paipaj Churita cushpa ñucanchijta ima shina perdonaj cashcata intindingapajca shujtaj chꞌimbapuraicunata ricushun. Shungumanta arrepintirijpimi paica tucui ñucanchij juchacunata chingachinga. Bibliapi nishca shinaca Jehová Diosca ñucanchij juchacunata maillaj shina, pꞌichaj shinami perdonan (Salmo 51:7; Isaías 4:4; Jeremías 33:8). ¿Jehová chaita rurashcamantaca paipaj ñaupajpica ima shinataj ricurinchij? Paica: “Cancunapaj juchacuna amsa puca cajpipish, rasu shina yurajllata yurajyachishcami canga. Cancunapaj juchacuna pucanicuj cashpapish, yurajlla millmata shina rurashcami canga” ninmi (Isaías 1:18). Amsa puca colorhuan o pucanicuj colorhuan mapayachishcata anchuchinaca sinchimi can. Pero cai ejemplota churashpami Jehová Diosca ñucanchij juchacunata perdonashcamanta paipaj ñaupajpi ima juchata mana rurashca shina ricuri tucushcata intindichin.
“Cancunapaj juchacuna amsa puca cajpipish, rasu shina yurajllata yurajyachishcami canga” (Isaías 1:18).
10. ¿Jehová Diosca shungumanta perdonaj cashcata intindichingapajca ima chꞌimbapuraitataj churarca?
10 Yachai 31-pi yachashca shinaca ñucanchij juchacunaca dibicuna shinami can (Mateo 18:32-35). Chaimantami ima juchata rurashpaca Jehová Dioshuan ashtahuan dibiyacushca shina can. Pero Jehová Diosca ñucanchij juchacunata perdonashpaca chai dibicunata ña mana pagachun nishca shinami can. Ñucanchij juchacunamanta ña mana pagana cashcata yachashpami tranquilos sintirinchij.
“Can tucui dibishcatamari perdonarcani” (Mateo 18:32).
11. ¿Bibliapica Jehová Diosca ñucanchij juchacunatami borranga nishpaca imatataj nisha nin? (Hechos 3:19).
11 Jehová Diosca ñucanchij juchacunataca dibicunata ama pagachun nij shinallaca mana perdonanchu. Ashtahuanpish paica tucui ñucanchij dibicunata borraj shinami perdonan (Hechos 3:19-ta liyipai). Caipi yuyashun. Shuj runaca shujtaj runa mashnata dibishcataca shuj papelpichari anotashcata charin. Chai dibita perdonashpaca paica mashnata dibishcatami tachan. Pero chaita tachajpipish mashna dibishcaca ricurishpami catin. Jehová Diosca ñucanchij juchacunataca tachaj shinallaca mana perdonanchu. Ashtahuanpish tucuita borraj shinami perdonan. Ñaupa punllacunapica quillcana tintataca carbonhuan, gomahuan, yacuhuanmi rurajcuna carca. Shuj shutujlla esponjahuan chai tintahuan quillcashcata borranaca jahuallami carca. Chaimi mashnata dibishcata borrajpica tucui chingarij carca. Ima dibita nunca mana charishca shinami carca. Jehová Dios tucui ñucanchij juchacunata borraj shina perdonaj cashcamantaca, ¿manachu agradecidos sintirinchij? (Salmo 51:9).
‘Diosca paillatajmi cancunapaj juchacunata borranga’ (Hechos 3:19).
12. ¿Isaías 44:22-pica Jehová Diosca imatataj yachachin?
12 Jehová Diosca ñucanchij juchacunahuan imata ruraj cashcata intindichingapajca shujtaj chꞌimbapuraitami churarca. Paica: “Can pandarishcacunataca pꞌuyu tapaj shinami chingachisha,cambaj juchacunataca yana amsa pꞌuyu tapaj shinami chingachisha” nircami (Isaías 44:22, NWT). Shinaca Jehová Diosca ñucanchij juchacunata perdonashpaca shuj jatun pꞌuyuhuan tapacushca shinami can. Chaimantami ñucanchij juchacunataca pi mana cutin ricui tucun.
“Can pandarishcacunataca pꞌuyu tapaj shinami chingachisha” (Isaías 44:22, NWT).
13. ¿Jehová Dios ñucanchij juchacunata perdonashcamantaca ima shinataj sintirinchij?
13 Shinaca Jehová Dios ñucanchij juchacunata ña perdonashca cajpica chai juchacunata rurashcamanta tucui vida llaquirishpa mana causanachu canchij. Paica Jesuspaj yahuarhuan pagaj shinami ñucanchij juchacunata perdonarca. Chaimantami ñucanchijca imata mana pagana canchij. Ashtahuanpish ñucanchij dibicunaca tucuimi chingarishca. Chai juchacunata nunca mana rurashca layami ricurinchij. Caipi ricushca shinaca shungumanta arrepintirijcunatami Jehová Diosca de verdadtaj perdonan.
JEHOVÁ DIOSCA CUTINMI PAIPAJ ALLI AMIGOCUNATA SHINA CHASQUIN
Jehová Dios perdonashcamantami paihuan alli apanacui tucunchij. (Párrafo 14-ta ricui).
14. ¿Jehová Dios ñucanchijta perdonanataca imamantataj seguros canchij? (Fotocunamantapish parlapai).
14 Jehová Dios ñucanchijta perdonashca qꞌuipa cutin ñucanchij alli amigo canatami seguros cana canchij. Chaita yachashcamantami ñucanchij juchacunamanta ña mana llaquirishpalla causanchij. Shinallataj Jehová Dios ñucanchijhuan pꞌiñarishca cashcata o ñucanchij juchacunamanta llaquichinatapish mana yuyanachu canchij. ¿Imamanta? Jehová Diosca profeta Jeremiasmanca: “Ñucallatajmari paicunapaj tucui juchacunata perdonasha. Paicuna mana allita rurashcataca, manataj cutinca yuyarishachu” nircami (Jeremías 31:34). Apóstol Pabloca, Jehová Dios Jeremías 31:34-pi ima nishcatami yuyachirca. Paica: ‘Jehová Diosca, paicunapaj juchacunatapish mana ashtahuan yuyarishachu ninmi’ nircami (Hebreos 8:12). ¿Chaita nishpaca Jehová Diosca imatataj nisha nicurca?
“Paicuna mana allita rurashcataca, manataj cutinca yuyarishachu” (Jeremías 31:34).
15. ¿Jehová Diosca “cancunapaj juchacunataca manataj yuyarishachu” nishpaca imatataj nisha nin?
15 Bibliapica yuyarina nishpaca ñaupa punllacunapi ima tucushcata yuyarinallataca mana ninchu. Ashtahuanpish huaquinpica shujtajcunata ayudanamanta o imata ruranamantapishmi parlacun. Por ejemplo, jatun caspipi Jesús huañucujpica paipaj ladopi caj runaca: “Can ña mandaj cashpaca ñucata yuyaripangui” nircami (Lucas 23:42, 43). Chai runaca Jesús paita yuyarichunllaca mana mañacurcachu. Ashtahuanpish paita ayudachunmi mañacurca. Jesuspish chai runata causachina cashcatami nirca. Shinashpaca Jehová Dios “cancunapaj juchacunata manataj yuyarishachu” nishpaca ñucanchijta perdonashcamanta cunan punllacunapi, shamuj punllacunapipish ña mana llaquichinatami nicun.
16. ¿Jehová perdonashcamantaca ima shinataj sintirinchij?
16 Jehová Dios ñucanchij juchacunata perdonajpi ñucanchijcuna ima shina sintirishcata intindichingapajca Bibliaca shujtaj chꞌimbapuraitami churan. Tucuicuna juchayujcuna cashcamantami juchapaj esclavocuna shina canchij. Pero Jehová Dios ñucanchijta perdonashcamantami juchapaj cadenacunamanta cacharichishca canchij (Romanos 6:17, 18; Apocalipsis 1:5). Shuj esclavo cacharichishca cashpaca achcatami cushicun. Ñucanchijpish Jehová Dios ñucanchij juchacunata perdonashcamantami achcata cushicunchij.
‘Juchamantami cacharichishca carcanguichij’ (Romanos 6:18).
17. ¿Jehová Dios ñucanchijta perdonajpica imamantataj shuj millai ungüimanta jambishca shina can? (Isaías 53:5).
17 (Isaías 53:5-ta liyipai). Shuj tucuri chꞌimbapuraimanta parlashun. Bibliapi nishca shinaca juchayujcuna cashcamantami huañuiman apaj ungüita charij shina canchij. Pero Jehová Diosca paipaj Churita cushcamantami chai millai ungüimanta ñucanchijcunataca jambishca. Chaimantami juchacunata rurashca cashpapish cutin Jehová Diospaj alli amigocuna cai tucunchij (1 Pedro 2:24). Shuj runa millai ungüimanta alli tucushpaca yallitaj cushillami sintirin. Ñucanchijpish Jehová Dios perdonajpica achcatami cushicunchij.
“Paipaj chugrihuanmi ñucanchijca jambishca carcanchij” (Isaías 53:5).
¿JEHOVÁ DIOS PERDONASHCAMANTACA IMA SHINATAJ BENEFICIARINCHIJ?
18. ¿Cai chꞌimbapuraicunapica Diospaj perdonmantaca imatataj yachashcanchij? (“¿Jehová Diosca ñucanchijtaca ima shinataj perdonan?” nishca recuadrotapish ricui).
18 ¿Cai chꞌimbapuraicunapica Jehová Diospaj perdonmantaca imatataj yachashcanchij? Jehová Dios perdonajpica ñucanchij juchacunaca para siempremi chingarin. Chaimantami Jehová Dioshuan alli apanacui tucunchij. Shinapish Jehová Dios ñucanchijta perdonachun mana obligai tucushcatami yuyarina canchij. Jehová Diosca yallitaj cꞌuyaj cashcamantami ñucanchijtaca perdonan (Romanos 3:24).
19. a) ¿Imamantataj Jehová Diosta agradicina canchij? (Romanos 4:8). b) ¿Catij yachaipica imatataj yachashun?
19 (Romanos 4:8-ta liyipai). Salmo 130:4-pi nishca shina Jehová Dios de verastaj perdonaj cashcamantaca achcatami agradicinchij. Shinapish Jehová Dios ñucanchijta perdonachun munashpaca Jesús ima nishcatami yuyarina canchij. Paica: “Shujtajcuna cancunata ima mana allita rurajpi cancuna mana perdonajpica, jahua pachapi caj cancunapaj Yayapish cancunapaj juchacunataca mana perdonangachu” nircami (Mateo 6:14, 15). Shinashpaca Jehová Dios shinami perdonajcuna cana canchij. Catij yachaipimi Jehová Dios shina perdonajcuna cangapaj imata rurana cashcata yachashun.
CANTO 46 Pagui Jehová
a Hebreo rimaipica cai versoca “Jehová Diosllami juchacunataca de verdad perdonai tucun” ninmi. Pero Bibliata huaquin traducijcunaca chai yuyaitaca mana churashcacunachu.