Jehová canta perdonaj cashcata yuyari

1, 2. ¿Jehová Dios ñucanchij juchacunamanta perdonajpica ima shinataj sintirinchij? .

REY DAVIDCA jatun juchacunata rurashcamantami llaquilla sintirirca (Salmo 40:12; 51:​3, callari shimicunatapish ricui). Shinapish shungumanta arrepintirijpimi Jehová Diosca paita perdonarca (2 Samuel 12:13). Rey Davidca Jehová Dios paita perdonashcata crishpami cushilla sintirirca (Salmo 32:1).

² Ñucanchijpish shungumanta juchacunamanta arrepintirijpi, cutin juchapi ama urmangapaj esforzarijpica Jehová Diosmi perdonanga (Proverbios 28:13; Hechos 26:20; 1 Juan 1:9). Jehová Diosca ñucanchij juchacunata perdonashpaca tucuitami cungarin. Chaita yachashpaca cushillami sintirinchij (Ezequiel 33:16).

3, 4. a) ¿Shuj ñañaca bautizarishca huashaca ima shinataj sintirirca? b) ¿Cai yachaipica ima tapuicunamantataj cutichishun?

³ Maipica juchacunata rurashcamantami Jehová Dios perdonashcata mana cri tucunchij. Pani Jenniferca chashnami sintirirca. Paica: “Ñuca yaya mamaca Jehová Diosmantami ñucamanca yachachircacuna. Shinapish ñuca jovenraj cashpaca cullquita charina munaillami causaj carcani, huainayanapimi urmaj carcani, achca tragotami ubyaj carcani, achcata colerajllami carcani. Tucui chaicunataca pacallami ruraj carcani. Huaquin huatacuna qꞌuipaca tucui chai juchacunata rurashcamanta arrepintirishpami bautizarircani. Jesús huañushcamanta Jehová Dios ñuca juchata perdonai tucushcataca yacharcanimi. Chaita yachashpapish Jehová Dios ñucata perdonashcata crinaca sinchimi carca” ninmi.

⁴ Shinapish Jehová Diosca ñucanchijta perdonashcata tucui shunguhuan crichunmi munan. ¿Imamantataj Jehová Dios ñucanchijta perdonashcata crina canchij? ¿Jehová Dios ñucanchijta perdonaj cashcata cringapajca imatataj rurana canchij? Chai tapuicunatami cai yachaipica ricushun.

¿IMAMANTATAJ JEHOVÁ DIOS ÑUCANCHIJTA PERDONASHCATA CRINA CANCHIJ?

5. ¿Millai Diabloca ñucanchijcuna imata crichuntaj munan? Shuj ejemplota churashpa parlai.

⁵ Millai Diabloca Jehová Diosta sirvinata saquichunmi munan. Chaipajca Jehová Dios ñucanchij juchacunata mana perdonaj cashcatami crichisha nin. Corinto congregacionmanta shuj runahuan ima tucushcata ricushun. Paitaca huainayana juchapi urmashcamantami congregacionmanta llujchircacuna (1 Corintios 5:​1, 5, 13). Shinapish chai runaca juchata rurashcamantami arrepintirirca. ¿Chai runa arrepintirijpica Satanasca ima shinataj pandachisha nirca? Satanasca huauqui panicuna chai arrepintirishca runata ama perdonachun, ama chasquichunmi munarca. Shinallataj chai arrepintirishca runa Jehová Dios paita mana perdonashcata yuyachunmi munarca. Chashnami millai Diabloca pai yallitaj llaquirishpa Diosta sirvinata saquichun pandachisha nirca. Chashnallatajmi Satanasca ñucanchijcuna Jehová Diosmanta caruyashpa paita sirvinata saquichun pandachisha nin. Chaimantami Diablo ama pandachichunca Jehová Dios ñucanchijta perdonaj cashcataca seguros cana canchij (2 Corintios 2:​5-11).

6. ¿Arrepintirishca huasha ama yallitaj llaquilla sintiringapajca imatataj rurana canchij?

⁶ Juchapi urmashpaca llaquillami sintirinchij (Salmo 51:17). Llaquilla sintirishcamantami shungumanta arrepintirishpa allicunata rurangapaj esforzarinchij (2 Corintios 7:​10, 11). Shinapish arrepintirishca huashaca ña mana yallitaj llaquillachu sintirina canchij. Yallitaj llaquilla sintirishpaca Diosta sirvinatami saqui tucushun. Chaimantami Jehová Dios ñucanchijta perdonashcata crina canchij. Chashnami cushilla sintirishun (Colosenses 1:​10, 11; 2 Timoteo 1:3).

¿DIOS ÑUCANCHIJTA PERDONASHCATA CRINGAPAJCA IMATATAJ RURANA CANCHIJ?

7, 8. a) ¿Jehová Diosca Moisesmanca imatataj nirca? b) ¿Jehová Dios llaquij cashcata yachashcamantaca imatataj yuyarina canchij? (Éxodo 34:​6, 7).

⁷ ¿Jehová Diosca paimanta parlashpaca Moisesmanca imatataj nirca? Diosca: ‘Ñucaca llaquij, alli shungumi cani’ nircami (Éxodo 34:​6, 7-ta liyipai).a ¿Chashna llaquij, cꞌuyaj Diosca juchayuj runa arrepintirijpica manachu perdonanga? Ari. Paica perdonaj Diosmi can. Millai, rumi shungu Diosca mana canchu.

⁸ Jehová Diosca “llaquijmi cani” nishpaca mana llullanchu (Salmo 31:5). Chaimantami ñucanchij juchacunata perdonashcata cringapajca pai cꞌuyaj, llaquij, alli shungu Dios cashcata yuyarina canchij. Pi juchata rurashpa arrepintirijpi perdonaj cashcatapishmi yuyarina canchij. Chaimi cantapish perdonashcata cri tucungui.

9. ¿Salmo 32:​5-pi perdonana shimica imatataj nisha nin?

⁹ Jehová Diosca Bibliapimi pai perdonaj cashcata quillcachirca. Por ejemplo, rey Davidca: “Millaita rurashpa ñuca juchallishcataca perdonarcanguimi” nircami (Salmo 32:5-ta liyipai). Salmo 32:​5-pi “perdonana” shimica “anchuchina o apana” nisha ninmi. Jehová Diosca Davidpaj juchata perdonashpaca paipaj juchata aparicuj layami carca. Chaimantami rey Davidca Jehová Dios paita perdonashcamanta llashaj quipita anchuchishca laya cushilla, alli sintirirca (Salmo 32:​2-4). Ñucanchijpish shungumanta arrepintirijpica Jehová Dios ñucanchij juchacunata aparicuj shinami canga. Chaimantami ñucanchijpishmi llashaj quipita anchuchishca shina cushilla, alli sintirishun.

10, 11. ¿Salmo 86:​5-pica Jehová Diosmantaca imatataj yachachin?

¹⁰ (Salmo 86:​5-ta liyipai). Davidca Jehová Diosmanta parlashpaca: ‘Canca perdonajmari cangui’ nircami. Chai shimicunaca ñucanchij pandarijpi Jehová Dios mana rato pꞌiñarijlla cashcata, ashtahuanpish ñucanchij arrepintirijpi siempre perdonasha nishcatami ricuchin. ¿Jehová Diosca imamantataj chashna can? Cai versopaj último partepica: “Quiquinta mañajcunataca tucuicunata jatunta llaquijmari cangui” ninmi. Pasaj yachaipica Jehová Dios paita cꞌuyajcunaman mana tucurij cꞌuyaita ricuchij cashcata, paicunata mana nunca saquina cashcatami yacharcanchij. Chaimantami ima juchata rurashca cashpa arrepintirijpica Jehová Diosca mana tucurij cꞌuyaita ricuchishpa jatunta perdonan (Isaías 55:7). Shinashpaca ima juchata rurashcamanta Jehová Dios mana perdonashcata yuyacushpaca cashna tapuri: “¿Juchata rurashpa arrepintirijcuna Jehová Diosta mañajpi pai paicunata llaquishpa perdonasha nishcataca tucui shunguhuanchu crini? ¿Ñucapish Jehová Diosta ‘ñucata llaquishpa perdonahuai’ nishpa tucui shunguhuan mañajpica manachu ñucatapish perdonanga?”.

¹¹ Jehová Diosca llaquij Diosmi can. Chaimantami paica ñucanchij pandarijlla cashcataca alli yachan (Salmo 139:​1, 2). Cunanca rey David shujtaj versocunapi imata nishcata yachashun.

JEHOVÁ DIOSCA PERDONANGAPAJCA LISTOMI CAN

12, 13. ¿Ñucanchijcuna allpamanta rurashca cashcata yuyarishcamantaca Jehová Diosca imata rurangapajtaj listo can? (Salmo 103:14).

¹² (Salmo 103:​14-ta liyipai). Davidca ‘ñucanchij allpamanta rurashcataca Jehová Diosca yuyaipimi charin’ nircami. ¿Chaita nishpaca Davidca imatataj yachachisha nirca?.

¹³ Jehová Diosca punta cꞌari Adantaca allpamanta rurashpami tulluyuj, aichayujta rurarca (Génesis 2:7). Chashna rurashca cashcamantami Adanca jucha illaj cashpapish micunata, dorminata, samaita aisanata minishtirca. Adán shinallatajmi ñucanchijpish chaicunata minishtinchij. David nishca shinaca chai tucuita minishtishcataca Jehová Diosca allimi yachan. Chaita yachashcamantami Jehová Diosca ñucanchijtaca cꞌuyaihuan cuidan. Shinapish Adán y Eva juchapi urmashcamantami ñucanchijcunapish juchayujcuna tucushcanchij. Juchayujcuna tucushcamantami ñucanchijcunaca pꞌaquirijlla allpa puñu shina canchij. Chaimantami allpa puñu rato pꞌaquirij shina ñucanchijpish rato pandarinchij, ñapish juchapi urmanchij. David nishca shinaca chaitapishmi Jehová Diosca yuyaipi charin. Chaita yuyaipi charishcamantami ñucanchijcuna shungumanta arrepintirijpica paica cꞌuyaihuan perdonangapaj listo can (Salmo 78:​38, 39).

14. a) Salmo 103:​12-pi nishca shinaca ¿Jehová Dios shungumanta perdonashcataca imamantataj seguros cana canchij? b) ¿Jehová Dios Davidta perdonashcamantaca imatataj yachai tucunchij? (“Perdonashpaca Jehová Diosca ñucanchij juchacunatami cungarin” nishca recuadrota ricui).

¹⁴ ¿Jehová Dios shungumanta perdonashcataca imamantataj seguros cana canchij? (Salmo 103:​12-ta liyipai). Davidca: ‘Inti llujshinmanta, inti huashicuncamaca yallitaj carumari. Chai shinallatajmari ñucanchij juchacunatapish caruyachirca’ nircami. David nishca shinaca Jehová Diosca shungumanta perdonashpaca ñucanchij juchacunata caruman cachashca shinami ña mana nunca yuyarin. Caipi yuyashun. Shuj ismushca papa fierota ashnacujpica carumanmi shitanguiman. Chaimi ña mana ashtahuan ashnashpa catinga. Chashnallatajmi Jehová Diosca ñucanchij juchacunata perdonashpa caruman shitaj shina ña mana ashtahuan yuyaringa. Chai juchacunamantaca ñucanchijtapish ña mana ashtahuan yuyachishpa catingachu (Ezequiel 18:​21, 22; Hechos 3:19).

15. ¿Ñucanchij juchacunamanta dimastij llaquilla sintirishpaca imatataj rurana canchij?

¹⁵ ¿Salmo 103:​12, 14-pi David nishcacunaca ñucanchijtaca ima shinataj ayudan? Maipica ñucanchij pandarishcacunata yuyarishpami dimastij llaquilla sintirinchij. Chashna sintirishpaca ñucanchijcuna pandarijllacuna cashcata Jehová Dios yuyaipi charishcatami yuyarina canchij. Shinallataj ñucanchijcuna shungumanta arrepintirijpi Jehová Dios perdonangapaj listo cashcatapishmi yuyarina canchij. Ashtahuancarin Jehová Dios ñucanchij juchacunata cungarishca shinallatajmi ñucanchijpish chaicunata cungarina canchij (Salmo 130:3). Ñucanchij juchacunata Jehová Dios perdonashcata tucui shunguhuan crishpaca ña mana llaquilla sintirishunchu. Ashtahuanpish Jehová Diostami cushicushpa sirvishpa catishun.

16. ¿Imamantataj pandarishcacunallapi yuyashpaca mana causana canchij? (Shuj ejemplota churashpa parlai, fotomantapish parlapai).

¹⁶ Shuj carrota manejajpi yuyashun. Carrota manejajca huaquinpica huashata ima shamucujta ricungapajmi espejocunapi ricuna can. Shinapish mana huasha solota ricushpachu manejana can. Huasha solota ricushpa manejashpaca chocai tucunmi. Ama chocangapajca ashtahuantajca ñaupajta ricushpami manejana can. Chai shinallatajmi juchapi ama cutin tigra urmangapajca huaquinpica ñucanchij imapi pandarishcata yuyarina canchij. Shinapish chai juchacunallapica mana yuyashpachu saquirina canchij. Chaicunallapi yuyashpa causashpaca mana Jehová Diosta cushicushpa sirvi tucushunchu. Chaipaj randica Jehová Diosta sirvina yuyailla causashunchij. Shinallataj Jehová Dios cusha nishca Paraíso Allpapipish yuyashunchij. Chaipica ñaupaman imalla tucushcacunatapish ña mana ashtahuan yuyarishunchu (Isaías 65:17; Proverbios 4:25).

JEHOVÁ DIOS PERDONAJ CASHCAPI CRISHPA CATI

17. ¿Jehová ñucanchijta cꞌuyashcata, perdonashcataca imamantataj crishpa catina canchij?

¹⁷ ¿Jehová Dios ñucanchijta perdonashcataca imamantataj crishpa catina canchij? (1 Juan 3:19). Millai Diabloca ashalla tiempotami charin (Apocalipsis 12:12). Chaimantami Jehová Dios ñucanchijta mana cꞌuyashcata, mana perdonashcata crichun pandachishpa catinata munan. Diablo ama pandachichunca Jehová ñucanchijta cꞌuyashcata, perdonashcatami crishpa catina canchij.

18. ¿Jehová Dios canta cꞌuyashcata, canta perdonashcata tucui shunguhuan cringapajca imatataj rurana cangui?

¹⁸ Jehová Dios canta cꞌuyashcata cringapajca pasaj yachaipi yachashcacunatami pajtachina cangui. Cutin ¿Jehová Dios canta perdonashcata cringapajca imatataj rurana cangui? Jehová Dios can pandarijlla cashcata intindishcamanta canta perdonangapaj listo cashcata yuyari. Shinallataj cambaj juchacunata cungarishpa canman cꞌuyaita ricuchishcatapish yuyari. Caicunata yuyarishpami canpish David shinallataj Jehová Dios perdonaj cashcata tucui shunguhuan cringui (Salmo 32:5).