Huauqui panicunapajman cꞌuchuyanaca allimi can

1, 2. a) ¿Jehová Diospajca imataj ashtahuan importante can? b) ¿Paica imata rurachuntaj munan?

TUCUIMANTA yallica Jehová Diosca shujtajcunata cꞌuyachunmi munan. Jesusca: “Can quiquin cꞌuyarij shinallataj shujtajcunatapish cꞌuyangui” nircami (Mateo 22:​37-39). Diosta mana adorajcunatapish chashna cꞌuyachunmi yachachirca. Chaita rurashpami Jehová Dios shina cashcata ricuchishun. Paica “allicunamanpish, millaicunamanpishmi intita cun. Shinallataj cashcata rurajcunamanpish, cashcata mana rurajcunamanpishmi tamyata cachan” (Mateo 5:45).

² Jehová Diosca tucuicunata cꞌuyashpapish paita cazujcunatami ashtahuan cꞌuyan (Juan 14:21). Diosca pai laya cꞌuyachunmi munan. Chaimantami ñucanchij huauqui panicunamanca ‘shungumanta cꞌuyaita ricuchinacuchun’ ‘quiquin huauquindij shina cꞌuyaita ricuchinacuchun’ animan (1 Pedro 4:8; Romanos 12:10). Cashna laya cꞌuyaitaca ñucanchij dueño familiacunaman o shuj alli amigomanmi ricuchinchij.

3. a) ¿Cꞌuyaita ricuchishpa catingapajca imatataj rurana canchij?

³ Cꞌuyaica shuj planta shinami can. Planta alajata huiñachunca yacuta churashpami cuidanchij. Apóstol Pabloca Jesusta catijcunamanca: “Familia ucupi shina cꞌuyaita ricuchishpa catichij” nircami (Hebreos 13:1). Jehová Diosca shujtajcunata chashna cꞌuyachunmi munan. Cai yachaipica huauqui panicunapajman ima shina ashtahuan cꞌuchuyana cashcata, chaita rurangapaj imata rurashpa catina cashcatami yachashun.

¿IMAMANTATAJ HUAUQUI PANICUNAPAJMAN CꞌUCHUYANA CANCHIJ?

4. ¿Salmo 133:​1-pi nishca shina huauqui panicunahuan tandalla catingapajca imatataj rurana canchij? (Fotocunamantapish parlai).

⁴ (Salmo 133:​1-ta liyipai). Salmota quillcaj shinami Jehová Diosta cꞌuyajcunapaj amigocuna canaca “yallitaj alli, yallitaj sumajmari” can ninchij. Pero Jehová Diospaj pueblo tandalla cajtaca cungari tucunchijmi. Caipi yuyashun, ñucanchij causan ladopica shuj sumaj urcuchari tiyan. Chaitaca tucui punllacunachari ricunchij. Pero tiempohuanca chai urcu sumaj cashcatami cungari tucunchij. Ñucanchij huauqui panicunatapish semanapica huaquin cutinmi ricunchij. ¿Paicunata punta cutin ricushca shinallataj valorashpa catingapajca imatataj rurana canchij? Paicuna ñucanchijpajpish, huauqui panicunapajpish valishca cashcata yuyangapajmi tiempota surcuna canchij.

5. ¿Testigo de Jehovacuna cꞌuyaita ricuchinacujpica shujtajcunaca imatataj cuentata cuncuna?

⁵ Maijan ñucanchij tandanacuiman punta cutin rishpaca ñucanchijpura cꞌuyaita ricuchinacujpimi sorprendidos saquirincuna. Chaita ricushpami Jesusta alli catijcuna cashcata cuentata cuncuna. Jesusca: “Cancuna chashna caishuj chaishuj cꞌuyanacujpimi ñucata catijcunaca cashcata tucuicuna yachangacuna” nircami (Juan 13:35). Pani Alejandraca Bibliamanta yachacushpami jatun tandanacuipaj shuj invitacionta chasquirca.a Punta tandanacui qꞌuipaca Bibliata yachachij ñañamanca: “Ñuca yaya mamaca mana nunca ugllajchu carca. Pero jatun tandanacuipica punta punllallapimi 52 cutin ugllarcacuna. Jehová Diosca paipaj pueblohuanmi ñucata yallitaj cꞌuyashcata ricuchirca. Ñucapish cai familiapimi casha nini” nircami. Alejandraca 2024-pimi bautizarirca. Bibliamanta yachacujcunaca ñucanchij alli ruraicunata ricushpa, cꞌuyaita ricuchijta ricushpami paicunapish Jehová Diosta sirvinata munancuna (Mateo 5:16).

6. ¿Imamantataj huauqui panicunapajman cꞌuchuyanaca alli can?

⁶ Huauqui panicunapajman ashtahuan cꞌuchuyanaca achcatami ñucanchijta ayudan. Apóstol Pabloca: “Cada punlla caishuj chaishuj animanacushpa catichij. Chashnami pandachij munaihuan juchaca ni maijanta rumi shunguta mana ruranga” nircami (Hebreos 3:13). Allita rurana sinchi cajpica Jehová Diosca shuj huauquihuanmi ñucanchijta ayudanga (Salmo 73:​2, 17, 23). ¡Huauqui paicunapaj ayudata charinaca yallitaj sumajmari!

7. ¿Colosenses 3:​13, 14-pi nishca shinaca caishuj, chaishuj cꞌuyaita ricuchinacushpaca ima shinataj beneficiarinchij?

⁷ Cꞌuyaita ricuchingapaj achcata esforzarij huauqui panicunapurapimi causanchij. Chaimantami achca bendicioncunata chasquinchij (1 Juan 4:11). Cꞌuyaimantami caishuj chaishuj ahuantanacushpa catinchij. Chaimantami tandalla, shuj shinalla causanchij (Efesios 4:​2-6; Colosenses 3:​13, 14-ta liyipai). Chaimi ñucanchij tandanacuicunapica Jehová Diosta cushilla, tandalla adoranchij. Chaica shujtaj ladocunapica mana tiyanchu.

CAISHUJMANTA CHAISHUJMANTA RESPETANACUSHUJCHIJ

8. ¿Caishuj chaishuj tandalla cangapajca imatataj rurana canchij?

⁸ Jehová Diosllamantami muyundij allpapi caj huauqui panicunahuanca juchayujcuna cashpapish tandalla canchij (1 Corintios 12:25). 1 Tesalonicenses 4:​9-pica: “Diosllatajmi cancunamanca caishuj chaishuj cꞌuyanacunata yachachicun” ninmi. ¿Maipitaj chaita yachachin? Bibliapimi yachachin. Ñucanchijca Bibliata estudiashpa, chaipi ima nishcata pajtachishpami Jehová Dios ñucanchijman yachachichun saquinchij (Hebreos 4:12; Santiago 1:25). Testigo de Jehovacunaca chaita rurangapajmi esforzarinchij.

9. ¿Romanos 12:​9-13-pica caishuj chaishuj respetanamantaca imatataj yachachin?

⁹ Bibliaca huauqui panicunapajman cꞌuchuyachunmi yachachin. Apóstol Pablo ima nishcata ricushun (Romanos 12:​9-13 liyipai). Paica: “Cancunaraj shujtajcunata respetashcata ricuchichij” nircami. Cai shimicunaca huauqui panicunaman cꞌuyaita ima shina ricuchina cashcatami yachachin. Por ejemplo, paicunata perdonashpa, puzachishpa, shungumanta cujcuna cashpami cꞌuyaita ricuchinchij (Efesios 4:32). Shujtajcuna ñucanchijpajman cꞌuchuyachun shuyanapaj randica ñucanchijmi paicunapajman cꞌuchuyana canchij. Chashnami “Cujmi chasquijtapish yalli cushicun” nishca shimicuna pajtarijta ricushun (Hechos 20:35).

10. ¿Shujtajcunata ayudangapajca imamantataj sinchita trabajajcuna cana canchij? (Fotomantapish parlai).

¹⁰ Cancunapish shujtajcunata respetashcata ricuchichij nishca qꞌuipaca apóstol Pabloca: “Sinchita trabajaichij, ama qꞌuillacuna caichijchu” nircami. Trabajaj runaca cushicunmi, ima trabajota chasquishpapish utcami ruran. Proverbios 3:​27, 28-pica: “Huajchacuna canta ima allita rurachun mañajpica, ayudai tucushpaca, ama huahuayashpa ayudanguilla” ninmi. Chaimanta maijanpish ayudachun minishtijpica utca ayudashunchij. Qꞌuipaman ayudangapajca ama saquishunchijchu. Shujtajmi ayudanga nishpapish ama yuyashunchijchu (1 Juan 3: 17, 18).

11. ¿Huauqui panicunapajman cꞌuchuyangapajca imatataj rurana canchij?

¹¹ Shinallataj shujtajcunata respetashcata ricuchingapajca ñucanchijta llaquichijpipish utcami perdonana canchij. Efesios 4:​26-pica: “Inti huashicungacamaca ama pꞌiñarishcalla catichijchu” ninmi. Chashnami verso 27-pi nishca shinaca Diablo millaita rurachichunca mana saquishun. Jehová Diosca Bibliapimi shujtajcunata perdonanata cutin cutin yachachin. Colosenses 3:​13-pica: ‘Shungumanta perdonanacushpa catichij’ ninmi. Huauqui panicuna pandarijpi paicunata perdonashpaca paicunapajmanmi cꞌuchuyashun. Chashnami espíritu santo shuj shinallata rurashca shina caishujhuan chaishujhuan tandalla, sumajta causashun (Efesios 4:3). Shujtajcunata mana perdonashpaca mana tandalla, sumajta causashunchu.

12. ¿Shujtajcunata perdonachunca Jehová Diosca ima shinataj ayudan?

¹² Pi ñucanchijta llaquichijpi perdonanaca huaquinpica sinchichari can. Pero Diosmi paipaj espirituhuan ayudanga. ‘Huauquindij shina caishuj chaishuj cꞌuyanacuichij, sinchita trabajaichij’ nishca qꞌuipaca Romanos 12:​11-pica: “Espíritu santo cancunata sinchiyachichun” ninmi. Caipi nishca shinaca espíritu santomi quiquin huauquindij shina caishuj chaishuj cꞌuyanacungapaj, shungumanta perdonanacungapaj ayudan. Chaimantami Jehová Dios ñucanchijta ayudachun rogarina canchij (Lucas 11:13).

CANCUNAPURAPICA CHꞌICANYANACUI AMA TIYACHUN

13. ¿Imataj huauqui panicunamantaca caruyachi tucun?

¹³ Congregacioncunapica ‘tucui laya gentecunami tiyanchij’ (1 Timoteo 2:​3, 4). Ñucanchijca chꞌican chꞌican cashcamantami chꞌican laya decisioncunata agllanchij. Chaimantami cada uno ima shina allichirinata, ima shina jambirinata, imata ricunata, imata uyanata agllanchij. Pero cada uno imata decidishcata mana respetashpaca paicunamantami caruyashun (Romanos 14:4; 1 Corintios 1:10). Jehová Diosca caishuj chaishuj cꞌuyanacuchunmi yachachin. Chaimi ñucanchij decidishcaca ashtahuan alli nishpaca mana yuyana canchij (Filipenses 2:3).

14. a) ¿Imata rurangapajtaj siempre esforzarina canchij? b) ¿Imamantataj esforzarina canchij?

¹⁴ Congregacionpi chꞌicanyanacui ama tiyachunca shujtajcunata animangapaj, sinchiyachingapajmi esforzari tucunchij (1 Tesalonicenses 5:11). Cunan punllacunapica espiritualmente chiriyashcacuna o congregacionmanta llujshichishca achca huauqui panicunami Jehová Diospajman tigrashcacuna. Paicunataca cushicushpami chasquinchij (2 Corintios 2:8). Shuj panica chunga huatacunata espiritualmente chiriyashca qꞌuipami shuj tandanacuna huasiman tigrarca. Paica: “Tucuicunami ñucataca cushicushpa saludarcacuna” ninmi (Hechos 3:19). ¿Cꞌuyaihuan chasquijpica paica ima shinataj sintirirca? Paica: “Cutin cushilla cangapaj Jehová Dios paipaj maquihuan ñucata pushamucushcatami sintircani” ninmi. Shujtajcunata animangapaj esforzarijpica Jesusca llashaj quipita aparishcacunata animangapajmi yuyaita cunga (Mateo 11:​28, 29).

15. ¿Tandalla cangapajca imatataj rurana canchij? (Fotomantapish parlai).

¹⁵ Shinallataj ñucanchij rimashcahuanmi caishuj chaishuj tandalla cachun ayudashun. Job 12:​11-pica: “Rinrin uyajpimi alli shimi cashca, mana alli shimi cashcapish yacharin. Micunapish shimiman chayashpami, ima shina cashca yacharin” ninmi. Shuj alli yanuj runaca micunata manaraj carashpami mishqui cashcataca pairaj proban. Chashnallatajmi ñucanchijpish manaraj rimashpa alli yuyanaraj canchij. Chashnami ñucanchij shimicunaca shujtajcunata sinchiyachinga, animanga, ayudanga (Salmo 141:3; Efesios 4:29).

16. ¿Picunataj ashtahuantajca animaj shimicunahuan parlana can?

¹⁶ Ashtahuantajca cazarashca runacuna, yayacuna, mamacunami animaj shimicunahuan parlangapaj esforzarina can (Colosenses 3:​19, 21; Tito 2:4). Ancianocunapish Jehová Diospaj ovejitacunatami animancuna, cushichincuna (Isaías 32:​1, 2; Gálatas 6:1). Bibliapica: “Minishtirishca horaspi alli rimanaca mai sumajmari” ninmi (Proverbios 15:​23, NWT).

RURAICUNAHUAN, TUCUI SHUNGUHUAN CꞌUYASHUNCHIJ

17. ¿Huauqui panicunaman shungumanta cꞌuyaita ricuchingapajca imatataj rurana canchij?

¹⁷ Apóstol Juanca: “Ñuca huahuacunalla, ama rimashcallahuan, jahua shimillahuan cꞌuyashunchijchu. Ashtahuanpish ruraicunahuan, tucui shunguhuan cꞌuyashunchij” nircami (1 Juan 3:18). ¿Shungumanta cꞌuyaita ricuchingapajca imatataj rurana canchij? Ñucanchijca huauqui panicunahuan tandanacuicunapi cangapaj, huillanaman llujshingapajmi esforzarina canchij. Shinallataj paicunata visitangapajmi tiempota surcuna canchij. Chaita rurajpica: “Diosllatajmi cancunamanca caishuj chaishuj cꞌuyanacunata yachachicun” ningacunami (1 Tesalonicenses 4:9). Chashnami ‘huauquindijcuna tandalla, shuj shinalla causanaca yallitaj alli, yallitaj sumaj’ cashcata ricuchun (Salmo 133:1).